Hatəm Cabbarlı: “Bu amil Sarkisyan və Köçəryanın da mövqeyini möhkəmləndirəcək”
Avropa Şurası Parlament Assambleyasının (AŞPA) siyasi məsələlər və demokratiya üzrə monitorinq komissiyası Ermənistanda siyasi təqibləri araşdıracaq. Bu barədə Ermənistan parlamentinin vitse-spikeri, Ermənistanın AŞPA-dakı nümayəndə heyətinin rəhbəri Arpine Ovannisyan bildirib.
Onun sözlərinə görə, AŞPA-nın siyasi məsələlər və demokratiya üzrə komissiyasıın iclasında Ermənistandakı daxili siyasi vəziyyət və son zamanlar ölkədə baş verən proseslər müzakirə olunub: “AŞPA-nın iclasında konkret olaraq Ermənistanda söz azadlığının boğulması, nifrət təbliğ edən materialların yayılması, Ermənistanın ikinci prezidenti (Robert Köçəryan) və digər çoxsaylı keçmiş məmurlar və onların ailə üzvlərinə qarşı açılan cinayət işləri, baş nazirin hakimiyyətinə qarant olaraq təzyiq vasitəsi kimi Ermənistan Konstitusiyasına yenidən dəyişikliklər edilməsinə cəhdlər və digər məsələlər müzakirə olunub”.
Erməni diplomat, həmçinin, bildirib ki, AŞPA-nın monitorinq komissiyasının iclasında Ermənistan Milli Təhlükəsizlik Xidməti və Xüsusi İstintaq Xidməti rəhbərlərinin yayılan gizli səs yazısı da qızğın müzakirələrə səbəb olub. Bütün bunları nəzərə alaraq, AŞPA-nın siyasi məsələlər və demokratiya üzrə komissiyası qanunun aliliyinin və qanunverici və məhkəmə hakimiyyətinin müstəqilliyinin təmin olunmasını yoxlamaq, o cümlədən siyasi təqiblərlə bağlı Ermənistanda monitorinq keçirmək barədə qərar qəbul edib və bu barədə rəsmi İrəvana məktub göndərilib.
AŞPA-nın bu qərarından hansı gözləntiləri proqnozlaşdırmaq olar?
Siyasi elmlər doktoru Hatəm Cabbarlı “Bakı-Xəbər”ə bildirdi ki, AŞPA-ının Ermənistanda insan haqları ilə bağlı monitorinqin aparılması barədə verdiyi qərar birmənalı dəyərləndirilə bilməz: “Burda son 4-5 ay ərzində Ermənistanda cərəyan edən hadisələri də diqqətdən qaçırmaq olmaz. Paşinyan hakimiyyətə gələndən sonra yeni hakimiyyət müxalif qüvvələrə qarşı təzyiq və təqiblərə başlayıb. Bura generalların həbsini, ölkənin sabiq iki başçısının cinayət məsuliyyətinə cəlb edilməsini, hətta birinin həbs edilərək zindana salınmasını aid edə bilərik. Bütün bu hadisələr Ermənistanın ictimai rəyində və beynəlxalq aləmdə birmənalı qarşılanmayıb. Reallaşdırılan həbsləri Paşinyan intiqam duyğusu ilə həyata keçirib kimi dəyərləndirənlər də az deyil. Son 10 ildə Ermənistanda insan haqlarının təftişi ilə bağlı heç bir təşəbbüs gəlmirdi. Bu qərarın verilməsi göstərir ki, AŞPA da dərin narahatlıq keçirir. Paşinyan siyasi rəqiblərinin təqibi ilə bağlı sözügedən qurumla ortaq fikirə gələ bilmədi. Bu günlərdə iki mühüm post tutan şəxsin arasında olan danışığın da internet məkanına sızdırılması da təsadüfi deyildi. Söhbət edən hər iki mühüm idarənin rəhbəri Ermənistanın sabiq prezidenti Robert Köçəryanın həbsini müzakirə edirdi. Maraqlıdır ki, onlar bunu Paşinyanın tələb etdiyini deyirlər. Həmin danışıqdakı tərəflərdən biri Köçəryanı həbs edən hakimin qorxduğunu bildirir. Bu da onu göstərir ki, reallaşan həbslər heç də Ermənistanın qanunları çərçivəsində həyata keçirilmir. Qanunların aliliyindən daha çox siyasi ambisiyalar gözə dəyir”.
Hatəm Cabbarlı hesab edir ki, AŞPA-nın bu cür qərar qəbul etməsi Paşinyan hakimiyyətinə vurulan böyük zərbə kimi dəyərləndirilə bilər: “Bu amil Sarkisyan və Köçəryanın da mövqeyini möhkəmləndirəcək. Onlar bu vəziyyətdən yaxşı istifadə edə bilərlərsə, təhlükəsizlikləri təmin edilə və həbs olunma ehtimalı ertələnə bilər. AŞPA-nın qərarının təsirini biz Ermənistanın siyasi həyatında hiss edəcəyik. Burada bir məsələni də xüsusi olaraq vurğulamaq olar ki, Paşinyan hər nə qədər görünüşdə demokratik görünməyə çalışsa da, baş verən proseslər bunun əksini sübut edir”.
Məhəmmədəli QƏRİBLİ
