Əkbər Qoşalı: “Bütün hallarda, xalqımız, dövlətimiz inkişaf və tərəqqinin yanındadır”
Məlum olduğu kimi, bu il Prezident İlham Əliyevin sərəncamı ilə “Azərbaycan Xalq Cümhuriyyəti İli” elan olunub. Həmçinin, bu il Azərbaycan Parlamentinin yaradılmasının 100-cü ildönümüdür. Bu səbəbdən də parlamentin 100 illiyi ilə bağlı sentyabrın 21-də Milli Məclisin xüsusi təntənəli iclası keçiriləcək. Bu münasibətlə bir sıra ölkələrin parlament rəhbərləri Azərbaycana dəvət olunub.
Bununla bağlı hazırlıq işləri davam edir. Məlumata görə, yubiley tədbirinə 150 ölkənin parlamentlərinin nümayəndə heyəti qatılacaq. Tədbirdə bu ölkələrdən 14-nün parlament sədri, 13 ölkənin parlament sədri müavinləri, 11 ölkənin isə parlamentlərarası işçi qrupları iştirak edəcək.
Bundan əlavə, yubiley iclasına 10-a yaxın beynəlxalq təşkilatın nümayəndə heyəti də qatılacaq. Ümumilikdə, 40-a yaxın ölkənin nümayəndəsinin tədbirdə iştirakı nəzərdə tutulub.
Nəzərə almaq lazımdır ki, 100 il əvvəl Azərbaycanda Xalq Cümhuriyyətinin elan olunması və bir neçə aydan sonra ölkə parlamentinin fəaliyyətə başlaması o zaman Şərqdə böyük hadisə idi. Bu bir daha Azərbaycanın demokratik ənənələrə sahib olmasının göstəricisidir.
Sözügedən tədbirin keçirilməsi beynəlxalq münasibətlər sistemində parlamentarizm ənənələrinin möhkəmlənməsi, Azərbaycanın bununla bağlı nüfuzunun artması baxımından necə rol oynayacaq?
Məsələyə münasibət bildirən Azərbaycanda Atatürk Mərkəzinin şöbə müdiri, Milli QHT Forumu İdarə Heyətininü üzvü Əkbər Qoşalının sözlərinə görə, “Xalq Cümhuriyyəti İli” çərçivəsində indiyədək keçirilmiş çoxsaylı yerli və beynəlxalq tədbirdən daha birinin keçirilməsinin mühüm əhəmiyyəti var: “Dünya birliyinə daxil olan irili-xırdalı, yaxın-uzaq, dost və neytral 150 ölkənin parlament üzvlərinin iştirakı ilə keçirilməsi nəzərdə tutulan tədbir sıradan bir hadisə deyil. Bilirsiniz, beynəlxalq səviyyədə tanınmış, BMT-yə üzv və ya daimi müşahidəçisi olan 195 müstəqil dövlət varkən, onlardan 150-nin, yəni böyük əksəriyyətinin qanunvericilərinin Bakıya gəlməsindən danışırıq. Bu səviyyə və miqyasda xarici qonaq adi turist kimi, yaxud mahnı və ya idman yarışı üçün gəlsəydi belə, diqqətəlayiq hal sayılardı. Lakin onlar indi məhz parlamentimizin 100 illik yubiley tədbirinə gəlirlər. Belə hadisələr heç də hər ölkədə tez-tez baş vermir. Özü də çoxlu sayda parlament başçısının iştirakının müəyyənləşməsi də, sözün yaxşı mənasında, hadisə içində hadisə, yüksək dəyərə, diqqətə layiq işdir. Bu miqyas və səviyyədə olacaq bir tədbir beynəlxalq münasibətlər sistemində parlamentarizm ənənələrinin daha da möhkəmlənməsi, eləcə də dövlətimizin nüfuzunun artması, ümumilikdə, həqiqətlərimizin daha çox və yeni ünvanlar qazanması baxımından faydalıdır. Heç şübhəsiz, respublikamızın ərazi bütövlüyünün pozulması, bu pozuntudan irəli gəlmiş məhrumiyyətlər, insanların öz doğma yurdlarından didərgin salınması, qaçqın və məcburi köçkün düşməsi kimi məsələlər də çıxışlarda keçəcək, bizim ən əsas məsələmizə diqqəti cəlb edəcək. Gələnlər sıradan adamlar deyil, onlardan bir qismi Bakıda eşidəcəklərini öz parlamentində səsləndirəcək, öz ölkəsinin mediasına danışacaq, yazacaq, bəlkə hansısa əsərdə əks etdirəcək və s.
Bir də qonaqların təmsil etdiyi parlamentlərin bir çoxu bizim parlamentdən cavandır, onlar 100 yaşlı bir parlamentin yubileyinə gəlir və bu fakt özlüyündə çox şey ifadə edir. Azərbaycan onsuz da dünyada birgəyaşayışa, sülhyaratma işinə, beynəlxalq hüquq norma və prinsiplərinin bütün ölkə və xalqlara eyni güclə tətbiqi işinə, sivilizasiyalar və mədəniyyətlərarası dialoqa töhfələr verməkdədir. Bu xoşməramlı missiya istər parlamentlər səviyyəsində olsun, istər hökumətlər və ya hakimiyyətin digər qolları vasitisilə, bütün hallarda, xalqımız, dövlətimiz inkişaf və tərəqqinin yanındadır. Bu fəlsəfi baxışın, praktik yanaşmanın gələcəkdə də davam edəcəyi şübhəsizdir. Çünki dövlətimizin, xalqımızın xoşməramlılığı təsadüfi deyil, qanunauyğun xarakter daşıyır”.
Vidadi ORDAHALLI
