Məhərrəm Zülfüqarlı: “Rusiyada yaşayan erməniləri bu cür qızışdırmaqla vəziyyəti gərginləşdirmək istəyirlər və onları olmayan şeylərdən danışdırırlar”
Rusiya Erməniləri İttifaqı Azərbaycana qarşı əsassız iddialar səsləndirməkdən qalmırlar. Onlar bəyanat yayıblar ki, Azərbaycanda guya “erməni xristian” irsi varmış və “mədəni-tarixi” “irsləri məhv edilib”. Rusiyada yaşayan ermənilər 24 aprel ərəfəsində belə bir qondarma iddialar səsləndiriblər. Heç şübhəsiz ki, bu təxribatdır və məqsədli şəkildə ortaya atılır. Ekspertlər hesab edirlər ki, Rusiya ermənilərinin belə bir təxribata əl atmasının arxasında Rusiyanın müəyyən dairələrinin durduğu gizlin deyil. 24 aprel qondarma erməni “soyqırımı” “ideyasının” müəlliflərinin birinin Sovet Rusiyası olduğuna diqqət çəkən ekspertlərə görə, indi də guya Azərbaycanda hansısa “erməni irsi”nin olduğu və onların “məhv edildiyi” yalanı tirajlanır. Ekspertlərin fikrincə, Rusiya Erməniləri İttifaqının bu əsassız bəyanatının arxasında Rusiyanın müxtəlif qüvvələrinin dayanır və bu təxribat birbaşa Ermənistanın Azərbaycan və Türkiyə ilə münasibətlərinin normallşmasına qarşı yönəlib. Yəni Rusiya və oradakı qüvvələr Ermənistanın iki türk-müsəlman dövləti ilə yaxınlaşmasını istəmir və yalan məlumatlarla pozuculuq edir.
Tarix elmləri doktoru, professor Məhərrəm Zülfüqarlı baki-xeber.com-a bidirdi ki, ermənilərin bu kimi fikirləri, sayıqlamaları daim mərhələ-mərhələ olub. “Özü də bu onların öz fikirləri deyil, onlara kənardan dəstək verən müəyyən qüvvələrin təsiridir. Burada əsasən Rusiya rol oynayıb və tarixən bu məsələdə yaxından iştirak edib. Düzdür, Fransa da, Avropanın bəzi ermənipərəst qüvvələri də zaman-zaman müsəlmanlara, türklərə qarşı bu cür qızışdırma siyasətdə rol oynasalar da, amma bu siyasətin başında həmişə rus imperiyası durub. Yadda saxlamaq lazımdır ki, Azərbaycan xalqı həmişə tolerant xalq olub və öz müqəddəs yerlərinə, dini məkanlarına necə yanaşıbsa digər dinlərin də dini dəyərlərinə o cür yanaşıb. Azərbaycanın paytaxtında məscidlərə yanaşı sinaqoqlar var, xristian kilsəsinin müxtəlif məzhəblərinə aid kilsələr mövcuddur. Bakıda hətta erməni kilsəsi də var. Onlar hamısı dövlət tərəfindən qorunur.
Bilirsiz ki, bu sayıqlamalar həmişə olub. Çar Rusiyası dövründən başlayaraq indiki Putin rejiminə qədər ermənilərdən bir vasitə kimi istifadə olunub. Ermənilərin bir hissəsi 44 günlük müharibədən sonra ağllandılar. Buna Paşinyanın və onun komandasını misal çəkə bilərik. Rusların əsl siyasətini, ermənilərdən alət kimi istifadə etdiyini başa düşdülər və xalqa da bəyan etdilər ki, bundan sonra normal yaşamaq istəyirsinizsə Azərbaycan və Türkiyə ilə münasibətlərin normallaşdırılmasına ehtiyac var, bu da erməni xalqının xeyrinədir. Amma bunu Rusiya istəmir. İyunun 7-də Ermənistanda keçiriləcək parlament seçkilərdə Rusiya çalışır ki, revanş götürsün. Yəni Qərb yönümlü siyasət yürüdən Paşinyanın devirəmək üçün Rusiyada yaşayan ermənilərdən və Ermənistandakı ruspərəst qüvvələrdən istifadə etsin. Bu Putinin diqtəsidir. Bizdə bir misal var:”İlanı Seyid Əhməd əli ilə tutmaq”. Yəni arxada həmişə rus olub, öndə isə oyuncaq siyasətin qurbanı olan ermənilər. Putin Paşinyandan "mədəni şəkildə" tələb edib ki, seçkilərdə Rusiya vətəndaşı olan ermənilər də iştirak etsin. Amma Paşinyan bildirib ki, konstitusiyaya görə, bu seçkilərdə ancaq Ermənistan vətəndaşları iştirak edə bilərlər. İndi də Rusiyada yaşayan erməniləri bu cür qızışdırmaqla vəziyyəti gərginləşdirmək istəyirlər və onları olmayan şeylərdən danışdırırlar”.
M.Zülfüqarlı qeyd etdi ki, tarixən ermənilər bu yalanlarla müxtəlif dövlətlərin yürütdüyü anti-Azərbayca və anti-Türkiyə siyasətinin oyuncağına çevriliblər. “Necə ki, Türkiyəyə düşmən olan qüvvələr qondarma “soyqırım” məsələsindən qardaş ölkəyə qarşı istifadə edirlər, eləcə də indi ermənilərin əli ilə bu şəkildə təxribatlar törədirlər. Hazırda da bu cür sərsəmləmələrlə Azərbaycana qarşı bunlardan istifadə olunur. Rusiyada yaşayan ermənilərin itirəcəyi heç bir şey yoxdur. Çünki onlar Rusiya vətəndaşlarıdır, orada yaşayırlar. İtirən Ermənistanda yaşayan əhali olacaq. Ona görə də Paşinyanın yetirdiyi siyasətə uyğun olaraq onlar hərəkət edərlərsə rusun caynağından qurtara və normal həyat yaşaya bilərlər”.
M.Zülfüqarlı hesab edir ki, bundan sonra ermənilər kiminsə oyuncağı olmamalıdırlar, bu cür saxta fikirlər yaymamalıdırlar, qonşularla normal münasibətlər yaradaraq regionda sülhün olmasına öz dəstəklərini verməlidirlər.
İradə SARIYEVA
