Abutalıb Səmədov: “Əgər vaxt qoyarsa vaxt bitən kimi İranda artıq yenə də canlı qalxanlar yaradılmağa başlayacaq və Tramp da İrana zərbə endirə bilməyəcək”
ABŞ Prezidenti Donald Tramp Pakistanın müraciəti əsasında İrana qarşı hücumların dayandırıldığını açıqlayıb və o, bildirib ki, atəşkəs danışıqlar başa çatana qədər uzadılacaq. Tramp İrana atəşkəslə bağlı müddətsiz vaxt qoyub. ABŞ prezidenti konkret müddət söyləməyib, deməyib ki, tutalım, İrana 20 gün, yaxud 1 ay vaxt verirəm, bu müddət ərzində tutalım, tələblərin yerinə yetirilməsə ona qarşı bu addımları atacağam.
Tramp hərbi əməliyyatları da bərpa etmir, atəşkəs üçün də müddət müəyyən etmədi. Sadəcə deyir ki, İranla razılaşaq qədər Hörmüz boğazınında blokadanı davam etdirəcəyəm. Məsələ burasındadır ki,
Tramp həmişə konkret vaxt qoyurdu. Məsələn, İrana qarşı müharibə aparanda demişdi ki, iki həftəyə müharibə başa çatacaq. Keçən dəfə isə İrana 48 saat vermişdi ki, bu müddət ərzində onun tələblərini yerinə yetirməsə müvafiq addım atacaq. Amma bu dəfə bunların heç biri olmadı.
Tramp bu dəfə İrana vaxt verməyə niyə çəkindi? Vaxt qoymamasının səbəbi nədir?
“Alyans” SAM-ın sədri Abutalıb Səmədov baki-xeber.com-a bildirdi ki, burada əsas səbəb İranın yenidən insanlardan canlı qalxan düzəltməsi məsələsidir. “Aparılan danışıqlar, irəli sürülən şərtlər göstərir ki, burada razılığa gəlmək ehtimalı son dərəcə aşağıdır. Bu şəraitdə Tramp atəşkəsi müddətsiz uzatdığını bildirdi. Nədən belə bir addım atdı? Məlumdur ki, atəşkəs ərəfəsində Tramp İranı elektrik stansiyalarını və körpüləri vurmaqla hədələmişdi. İran hakimiyyəti də obyektləri qorumaq üçün insanlardan canlı qalxan düzəltmişdi. Təbiidir ki, bu da Trampı vəd etdiyi addımı atmaqdan çəkindirmişdi. Yəni Tramp İran vətəndaşlarına daha artıq dəyər vermişdi, nəinki onların öz "doğma hakimiyyətləri".
İndi də Tramp danışıqlar baş tutmasa ilk addım kimi elektrik stansiyalarını və körpüləri vuracağını deyir. Ancaq təbiidir ki, burada İranın canlı qalxan yaradacağını da unutmamalıdır. Bu səbəbdən də görünür ki, atəşkəsin müddətsiz olduğunu deyir”.
A.Səmədov vurğuladı ki, "danışıqlar baş tutmadı" deyib Tramp dərhal İrana hücum etmək imkanını özündə saxlamağa çalışır. “Çünki aydındır ki, əgər vaxt qoyarsa vaxt bitən kimi İranda artıq yenə də canlı qalxanlar yaradılmağa başlayacaq və Tramp da İrana zərbə endirə bilməyəcək. Görünür, bu səbəbdən konkret vaxt qoymayıb. Ancaq bu müddət çox uzana da bilməz”.
A.Səmədovun qeyd etdi ki, çünki ümumiyyətlə İran danışıqlara getmək istəmir, orada hakimiyyətin kimə məxsus olması da bir az mübahisəlidir. “Bəziləri iddia edirlər ki, bütün hakimiyyət İslam İnqilabı Keşikçiləri Korpusunun (SEPAH) əlindədir. Onlar da danışıqların aparılmasına etiraz ediblər. Yaxın günlərdə əgər bu vəziyyət davam etsə, İran danışıqlar aparmaq istəməsə təbiidir ki, ABŞ uzun müddət gözləməyəcək və görünür gözlənilmədən İrana zərbələr endirəcək”-deyə A.Səmədov bildirdi.
İradə SARIYEVA
