Arzuxan Əlizadə: “Senatorların müraciəti o demək deyil ki, ABŞ hökuməti də bu işə qoşulacaq”
ABŞ senatorları “Meta” və “Alphabet” şirkətlərinə məktub göndərərək, onlara Ermənistanda iyun ayında keçiriləcək parlament seçkisi ilə bağlı çağırış ediblər. Senatorlar şirkətlərdən Rusiya dezinformasiyasının seçki ərəfəsində yayılmasına mane olmağa çağırıblar.
Məktubda Rusiyanın Moldovadan sonra Ermənistandakı demokratik proseslərə “Meta” platformasından istifadə edərək təsir etməyə çalışdığı bildirilib: “Bu seçkilər Ermənistanın gələcəyinin müəyyənləşdirilməsində dönüş ola bilər çünki o, regional sülh təşəbbüsləri və kommunikasiya proyektlərinin, o cümlədən sülh danışıqlarının önəmli komponenti olan TRİPP marşrutunun nəticəsini müəyyən edə bilər. Heç bir xarici gücün Ermənistanın suveren qərarlarının nəticəsinə təsir etməsinə izn verilməməlidir”.
Burada diqqəti çəkən məqam odur ki, Avropa İttifaqından sonra ABŞ da Ermənistanda Rusiyanın seçkiyə müdaxiləsini önləmək üçün hərəkətə keçir.
Sözügedən məsələ ilə bağlı fikirlərini baki-xeber.com-la bölüşən AMİP sədri, millət vəkili Arzuxan Əlizadə hesab edir ki, istər Avropa İttifaqı, istərsə də ABŞ Rusiyanın Ermənistanda keçiriləcək seçkilərə müdaxiləyə cəhd edəcəyinin fərqindədir: “Ona görə ki, Rusiya buna geosiyasi mübarizənin tərkib hissəsi kimi baxır. Belə olmasaydı Rusiya prezidenti Vladimir Putin aprelin 1-də Nikol Paşinyanla görüşündə publik olaraq bir sıra məsələlərlə bağlı narazılığını açıq ifadə etməzdi. Adətən bu kimi məsələlər qapalı danışıqlarda müzakirə mövzusu olur. Putin isə açıq formada Rusiyapərəst qüvvələrin seçkidə iştirakına şərait yaradılmsını istədi. Bu, azmış kimi, Rusiyada yaşayan ermənilərə seçki hüququnun verilməsi məsələsini qaldırdı. Bütün bunlar Ermənistandakı seçkilərin Rusiya üçün nə qədər xüsusi əhəmiyyət kəsb etdiyini göstərir. Artıq bir neçə aydır Rusiyanın media resursları Paşinyan hakimiyyətini hədəf alan tezisləri yayır, revanşistlərə tribuna verirlər və s. Rusiyanın bir sıra tanınmış şəxsləri Ermənistana səfər edib yerli media resurslarına müsahibələr verirlər. Əsas məqsəd mövcud hakimiyyəti gözdən salmaq, Rusiyanın vassalı olacaq siyasi qüvvələri hakimiyyətə gətirməkdir. Ermənistanı Moldovadan fərqləndirən odur ki, orada Rusiyanın hərbi bazaları var, bu ölkəyə iqtisadi təsir imkanları böyükdür. Bu səbəbdən Avropa İttifaqı Ermənistana yardımları artırır ki, seçkidə təşəbbüsü Rusiyapərəst qüvvələr götürməsin. Əgər ABŞ da bununla bağlı yardım etsə, o zaman Rusiyanın təxribatlarını önləmək çətin olmayacaq. Ancaq senatorların müraciəti o demək deyil ki, ABŞ hökuməti də bu işə qoşulacaq. Çünki Tramp Rusiya ilə münasibətləri kəskinləşdirmək istəmir. Ən azından Ukrayna ilə bağlı yeridilən siyasət ortadadır. Üstəlik, İranla qarşıdurma fonunda Tramp administrasiyasının Ermənistanda seçki ilə bağlı Aİ ilə birgə hərəkət edəcəyi o qədər də real görünmür. Baxmayaraq ki, Zəngəzur dəhlizinin reallaşması baxımından Paşinyanın qələbəsi lazımdır”.
Vidadi ORDAHALLI
