İlqar Hüseynli: “Burada məsafə yaxınlığı da rol oynaya bilər”
Rusiyanın Ermənistandakı səfirliyinin mətbuat xidmətindən verilən məlumata görə, daha 94 Rusiya vətəndaşı İranın Buşehr Atom Elektrik Stansiyasından Ermənistan vasitəsilə Rusiyaya qayıdıb. Rusiyanın Ermənistandakı diplomatik nümayəndəliyinin mətbuat xidmətinin açıqlamasında deyilir: "15 apreldə Buşehr AES işçilərinin təxliyəsinin növbəti mərhələsi zamanı İrandan Nurduz-Aqarak sərhəd keçid məntəqəsindən Ermənistana gələn daha 94 Rusiya vətəndaşı vətənlərinə yola düşüb".
Həmçinin qeyd olunur ki, İrəvandan Moskvaya xüsusi reyslə yola düşən Rusiya vətəndaşları ilə yanaşı, Belarus vətəndaşları da təxliyə edilib.
Rusiya səfirliyinin bəyanatında həmçinin Ermənistan hakimiyyətinə "Rosatom Dövlət Korporasiyası işçilərinin rahat tranzitinin təşkilində göstərdikləri məsuliyyət və köməyə görə" təşəkkür bildirilir. "Rosatom Dövlət Korporasiyası"nın baş direktoru Aleksey Lixaçev əvvəllər 14 apreldə son təxliyə dalğasında 108 nəfərin İsfahandan İran-Ermənistan sərhədinə yola düşdüyünü bildirmişdi. O, onların gecə düşənə qədər sərhədi keçib İrəvan vasitəsilə Moskvaya qayıdacaqlarına ümid etdiyini bildirib.
İran müharibəsi başlayandan hətta Avropa ölkələrinin çoxu özlərinin vətəndaşlarını, diplomatlarını, əməkdaşlarını Azərbaycan vasitəsilə çıxarırdılar. Təbii ki, buna Azərbaycanın daha çox imkanları var, nəinki Ermənistanın. Amma Rusiya İranın Buşehr Atom Elektrik Stansiyasında işləyən əməkdaşlarını Ermənistan vasitəsilə apardı, oradan təxliyə etdi. Halbuki, Azərbaycanın bunda daha çox təcrübəsi var, ondan əvvəl Avropa ölkələri öz səfirlik əməkdaşlarını Azərbaycan ərazisi vasitəsilə çıxardılar. Rusiya niyə burada Ermənistana üstünlük verdi?
Ekspert İlqar Hüseynli baki-xeber.com-a bildirdi ki, Azərbaycan bir dövlət olaraq belə humanist məsələlərdə yaxından iştirak edir. “Hanısa çətin, problemli vəziyyət yarananda Azərbaycan qonşu ölkələrə, onların vətəndaşlarına humanitar dəstəyini həmişə göstərib. Ümumilikdə Azərbaycan ərazindən 2 minə yaxın əcnəbi ölkələrin vətəndaşdaşları təxliyə olunub. Onlardan 323 nəfəri məhz Rusiya vətəndaşı olub. Bu təxliyə Astara komrük məntəqəsi üzərindən həyata keçirilib. Eyni zamanda mart ayının 2-də əlavə olaraq ayrıca 39 Rusiya vətəndaşı Astara gömrük keçid məntəqəsi üzərindən Rusiyaya təxliyə edilib. Bütövlükdə Azərbaycan üzərindən İrandan təxliyə edilən Rusiya vətəndaşlarının sayı təxminən 500 nəfərə yaxındır. Xatırlayırsınızsa, Astara gömrük keçid məntəqəsində həmin Rusiya vətəndaşları üçün ayrıca süfrələr hazırlandı, onlar yaxşı qarşılandı və Heydər Əliyev adına hava Limanından Rusiyaya təxliyə edildi. Belə deyək, onlar duz-çörəklə qarşılanaraq ölkələrinə yola salındılar. Bu Azərbaycanın ənənəvi humanitar siyasətinin növbəti göstəricisi kimi qəbul olunmalıdır. O ki, qaldı Buşehr Atom Elektrik Stansiyasında çalışan Rusiya vətəndaşlarının Ermənistan üzərindən təxliyə olunmasına, düşünmürəm ki, burada Azərbayana qarşı hansısa bir göstəriş nümunəsidir. İstəmirəm ki, bunu belə qəbul edək. Ola bilər ki, həmin layihədə Ermənistanın da iştirakı olub və onlar bu səbəbdən Ermənistan üzərindən təxliyə ediliblər. Eyni zamanda burada məsafə yaxınlığı da rol oynaya bilər. Tehran və digər ərazilərdən Rusiya vətəndaşlarının Astara üzərindən təxliyə etmək daha əlverişlidir, nəinki Ermənistan üzərindən.
Ola bilsin ki, Buşehr Atom Elektrik Stansiyasının Ermənistan sərhəddinə yaxın olması səbəbindən Rusiya vətəndaşları Ermənistan üzərindən təxliyə olunub. Bu bir versiya budur”.
İkinci versiyaya gəlincə, İ.Hüseynli qeyd etdi ki, bu yaxınlarda Ermənistanın baş naziri Nikol Paşinyan Moskvada səfərdə oldu və Kremldə Putinlə görüşdü. İ.Hüseynli hesab edir ki, ola bilsin, bu təxliyə prosesi Paşinyanla Putin arasında əldə olunan razılaşmaya əsasən həyata keçirilib. “Ola bilər ki, Paşinyan Rusiya vətəndaşlarının təxliyə xidmətini təklif edib və Putin də həmin təklifə münasibəti müsbət olub, bu proses də belə baş verib...”-deyə İ.Hüseynli qeyd etdi.
İradə SARIYEVA
