Azər Həsrət: “Erməni lobbisi elə bir gücdə deyil ki, bu cür böyük layihənin qarşısını ala bilsin”
Erməni lobbisi ABŞ Konqresində “Tramp yolu” layihəsi əleyhinə tədbirləri gücləndirir. Erməni Milli Komitəsi (ANCA) Konqresdə təşkil olunan “Cənubi Qafqazda ədalətsiz sülh” adlı tədbir keçirib. ANCA TRIPP layihəsinin ( “Tramp yolu”) əleyhinə çıxıb, “layihəni zəif düşünülmüş və uğur şansı çox aşağı olan təşəbbüs” kimi qiymətləndirib.
“Layihə həyata keçirilsə belə, Ermənistan bundan heç bir fayda əldə etməyəcək, əksinə sərhədləri və suverenliyi zəifləyəcək, ölkə özünü müdafiə etmək imkanlarını itirəcək” deyə, bildirilib. Bir sıra konqresmenlər Erməni Milli Komitəsinin təşəbbüsünü dəstəkləyib.
Ümumilikdə, erməni diasporu Zəngəzur dəhlizi layihəsinin reallaşmasına, onun yubadılmasına hansısa formada mane ola bilərmi? Bu, prinsipcə mümkündürmü?
Sözügedən məsələni baki-xeber.com-a şərh edən siyasi ekspert Azər Həsrətin fikrincə, erməni lobbisinin bu məsələdə pozucu mövqedən çıxış edəcəyi gözlənilən idi: “Onlarla iş birliyində olan konqresmenlər, senatorlar da boş dayanan deyil. Ümumiyyətlə, Birləşmiş Ştatlar maraq və mənafelərin üstünlük təşkil etdiyi bir siyasi ortamdır. O baxımdan hər kəs öz marağını güdür. Konqresmenlər, senatorlar, ayrı-ayrı siyasi xadimlər erməni lobbisindən bəslənirlər. Onlar ermənilərlə məhz maraqlarına görə işləyirlər. Kimisi rüşvət şəkilində pul alır, kimisi də digər formada. Eləsi də var ki, başqa maraqlarını təmin etməkdən ötrü erməni lobbisindən istifadə edir. Qaldı ki, onların Zəngəzur dəhlizinə mane olub-ola bilməməsinə, bu, baş tutan deyil. Çünki erməni lobbisi elə bir gücdə deyil ki, bu cür böyük layihənin qarşısını ala bilsin. Ümumiyyətlə, nəqliyyat dəhlizi məsələsini həll edən əsas iki ölkə var. Bu, Azərbaycan Respublikasıdır, bir də Ermənistandır. Bu iki dövlət bu qərarı veribsə və onlar bu yolu çəkirlərsə, hər iki dövlət bu yolun əhəmiyyətini anlayırsa, o zaman hansısa üçüncü qüvvə buna mane ola bilməyəcək. Üçüncü tərəflərin atılıb düşməsinin mənası yoxdur. Bu baxımdan hesab edirəm ki, erməni lobbisinin Konqresdə irəli sürdüyü təşəbbüsün bir nəticəsi olmayacaq. Heç Konqres bunu öz gündəliyinə belə salmayacaq. Çünki Zəngəzur dəhlizi çox önəmli layihədir. Bir sözlə, onların praktik cəhətdən bu layihəyə qarşı ata biləcəyi heç bir addım yoxdur. Bu baxımdan erməni lobbi qurumlarının cəhdləri fiaskoya uğrayacaq”.
Vidadi ORDAHALLI
