Əli Orucov: “Paşinyanın dəhliz məsələsində çəkingən mövqeyi təkcə İranla yox, həm də Rusiya ilə bağlıdır”
“İranın ətrafındakı vəziyyət nizamlanan kimi Ermənistan TRIPP layihəsinin reallaşmasına başlamağa hazırdır”. Bu sözləri Ermənistanın baş naziri Nikol Paşinyan deyib.
Paşinyan vurğulayıb ki, regionda davam edən hərbi əməliyyatlar strateji layihələri müvəqqəti dondursa da, Ermənistan layihənin texniki və diplomatik bazasını hazırlayıb. O, İran ətrafındakı vəziyyətin tənzimlənməsini bu böyük infrastruktur layihəsinin start götürməsi üçün əsas şərt kimi göstərib.
Paşinyan qeyd edib ki, Yaxın Şərqdəki mürəkkəb vəziyyətə baxmayaraq, alternativ marşrutların hesabına Ermənistanda heç bir ərzaq qıtlığı müşahidə olunmayıb.
Görünən odur ki, Ermənistan hakimiyyəti İran ətrafındakı proseslərin sonunu gözləyir. Yəni ABŞ-İran müharibəsi haçan bitərsə, o zaman Zəngəzur dəhlizinin tikintisinə start veriləcək.
Sözügedən məsələni baki-xeber.com-a şərh edən AMİP funksioneri Əli Orucovun fikrincə, fevralın 28-də ABŞ-ın İsraillə birlikdə İrana qarşı müharibəyə başlaması Zəngəzur dəhlizinin Ermənistandan keçən hissəsinin tikintisinə mənfi təsir göstərdi: “Düzdür, dəhlizin Ermənistandan keçən hissəsi qısadır. Prinsipcə, Ermənistanın öz ərazisindən yol çəkməsinin İrana heç bir aidiyyəti olmamalıdır. Ancaq əfsuslar olsun ki, İran 44 günlük müharibədən sonra davamlı olaraq Zəngəzur dəhlizinə qarşı çıxır. Dəhlizi özü üçün təhdid hesab edir. Guya Zəngəzur dəhlizi işə düşəndən sonra İranın Ermənistanla əlaqəsi kəsiləcək və yaxud da əvvəlki sərbəstlik olmayacaq. Halbuki, bütün bunların heç bir əsası yoxdur. Üstəlik, Rusiya da Tramp yoluna qarşıdır. Düzdür, Rusiya bu məsələdə İran qədər açıq etiraz etmir və yaxud da edə bilmir. Çünki Rusiyanın Ermənistanla quru sərhədi yoxdur. Həm də ona görə sərt etiraz edə bilmirlər ki, Rusiya Ukrayna müharibəsi fonunda ABŞ-la qarşıdurmaya getmək istəmir. Ancaq əslində Rusiyanın məqsədi odur ki, özləri bu dəhlizə nəzarət etsinlər. Bu baxımdan hesab edirəm ki, Paşinyanın dəhliz məsələsində çəkingən mövqeyi təkcə İrala yox, həm də Rusiya ilə bağlıdır. Ancaq istənilən halda ABŞ-la İran arasında qarşıdurma dayana kimi, dəhlizin tikintisinə start veriləcək. Çünki dəhliz təkcə iqtisadi yox, həm də geosiyasi əhəmiyyət kəsb edir”.
Vidadi ORDAHALLI
