Sahil İsgəndərov: “TDT bununla bağlı narahatlığını ifadə etməli və bəyanat verməlidir”
ABŞ-İsrail birləşmələrinin İrana qarşı apardığı müharibə artıq regiona da təsirini göstərir. Müharibə İraq türkmənlərinin yaşadığı bölgələrə, Kərkükə də sıçrayıb. ABŞ qüvvələri Bağdadın Fələstin küçəsində yerləşən Həşd əş-Şabi qərargahını bombalayıb.
ABŞ təyyarələri bölgədəki Həşti əş-Şabi qərargahlarını bombalayır və türkmənləri hansı təhlükə gözləyir?
Politoloq Sahil İsgəndərov baki-xeber.com-a bildirdi ki, bu kontektdə Kərkükdə yaşayan türkmənləri yalnız bu gün yox, ümumiyyətlə tarixən belə dəhşətlər, kabuslar izləyib. S.İsgəndərov qeyd etdi ki, bunu vaxtilə İraq ərazisində türkmənlərə qarşı həyata keçirilən soyqırımlar da sübut edir. “Əksər hallarda “insan haqları”nı, “insanların təməl hüquqları”nı və etnik azlıqların bu və digər şəkildə hüquqlarını qoruduğunu car çəkən böyük dövlətlər təəssüflər olsun ki, ənənəvi qaydada belə çətin vaxtlarda özlərini heç də yaxşı tərəfdən nümayiş etdirməyiblər. Bu baxımdan, onların bəyanatları ilə addımları, hərəkətləri arasında yerlə-göy qədər fərqlərin olduğu nəzərə çarpıb. Bu da göstərir ki, dünyanın aparıcı dövlətləri, mərkəzləri üçün əsas meyar onların öz maraqlarının reallaşdırılmasıdır. Uzağa getməyək, İraqda hakimiyyət çevirilişindən sonra indiki İraqın üç yerə parçalanması bunu sübut edir. Praktiki olaraq İraq üç yerə bölünüb. Burada Kürdüstan muxtariyatı yaradıldığı halda çox təəssüflər olsun ki, türkmanların hüquqlarının qorunması, onlara milli-mədəni muxtariyyatın verilməsi barədə heç bir addım atılmadı.
ABŞ-ın zərbələri orada hansısa terrorçu qruplara, İranı dəstəkləyən proksi qüvvələrə qarşı yönəlib. Amma niyə indiyə qədər İraq hökuməti həmin qüvvələrin zərərsizləşdirilməsi, tərkisilah olunması barədə heç nə düşünməyib və addımlar atmayıb? İndi ABŞ-ın endirdiyi zərbələrdən turkmənlər əziyyət çəkir, məhv olur, öldürülür, qətlə yetirilir. Məqsəd odur ki, guya orada terrorçu qruplar, İranın proksi qüvvələri məhv olsun. Amma sözsüz ki, bu zərbə ətrafda yaşayan insanlara da dəyir. Orada hava zərbələri çox vaxt dəqiq yerinə yetirilmir. Bu baxımdan türkmənlari orada növbəti təhlükə və faciə gözləyə bilər. Türk Dövlətləri Təşkilatları (TDT) bununla bağlı narahatlığını ifadə etməli və bəyanat verməlidir. Yeri gələrsə TDT İraq hökuməti qarşıında bu problemli məsələni qaldırmalıdır, türkmənlərin təhlükəsizliyi kontektində əməli addımların atılmasını tələb etməlidir. Eyni zamanda da ABŞ və İsraillə bu kontektdə əlaqə yaradıb oradakı türkmənlərin sözün əsl mənasında növbəti dəfə soyqırımlar və qətllərlə üzləşməsinin qarşısını almağa çalışmalıdır”-deyə S.İsgəndərov vurğuladı.
S.İsgəndərov qeyd etdi ki, əslində İraqın üç yerə parçalanması ABŞ-ın öz layihəsidir, bu baxımdan artıq orada türkmənlərin təhlükəsizliyin təminatı barədə ciddi tələblər ortaya qoyulmalıdır, bununla bağlı addımlar atılmalıdır. “Oradakı türkmənlərə ən azı mədəni muxtariyyat verilməsi barədə düşünülməlidir. Əks halda yenə də deyirəm, İraqdakı türkmənlərə qarşı növbəti soyqırım həyata keçirilə bilər. Soyqırım siyasəti məqsədli şəkildə aparılan siyasətdir. Orada hansısa dövlətlərin münaqişələri konstekstində əgər türkmənlərin yaşadıqları ərazilərə zərbə endirilirsə, onlar qətlə yetirilirsə bu dinc əhalinin məhvi ilə nəticələn hadisədir. Bu baxımdan düşünürəm ki, TDT tərəfindən tələblər irəli sürülməlidir. Ümumiyyətlə, gələcəkdə türkmənlərin belə bir vəziyyətlə üzləşməməsi, növbəti soyqırıma məruz qalmaması üçün onların taleyi ilə bağlı konkret qərarlar qəbul edilməlidir”-deyə S.İsgəndərov vurğuladı.
İradə SARIYEVA
