Tural İrfan: “İnancdan doğan siyasi ideoloji xəritəyə və plana görə Maşiaxın gəlməsi üçün "böyük İsrail" qurulmalıdır”
İsrailin Baş naziri Benyamin Netanyahu İsrailin gücündən danışaraq yəhudiliyin dini kitabında (“Tanah”ın Nevi’im (Peyğəmbərlər) hissəsi) bəhsi keçən “Məsihin gəlişi”ndən sonra qurulacaq güclü krallıq məsələsinə də işarə edib və bunun səbirlə əldə olunacağını bildirib:“İnanıram ki, hamımız o krallığa nail olacağımıza, Məsihin gələcəyinə şahidlik edəcəyimizə inanırıq. Ancaq bunlar gələn cümə axşamına olmayacaq. Çünki millətlərin həyatı hər zaman naməlumdur və təhdidlərlə doludur”.
İsrailin Baş naziri “Məsihin gəlişi”ndən misal çəkməsi müsəlmanlar arasında narahatlığa səbəb olub. Netanyahu belə bir fikir səsləndirməsə də, müsəlmanlar bu çıxışdan “Əl-Əqsa” məscidinin dağıdılacağı qənaətinə gəliblər.
Netanyahun “Məsihin gəlişi ərafəsidir və bu günkü İran əməliyyatları Məsihin gəlişi yollarını daha da təmizləmək məqsədi daşıyır” fikri müsəlman dünyasında geniş müzakirə olunur.
Netanyahu tərəfindən Məsih məsələsi ortaya niyə atılıb?
Milli Cəbhə Partiyasının sədr müavini, tanınmış ilahiyyatçı Tural İrfan baki-xeber.com-a bildirdi ki, yəhudi dini inancına görə Kral Maşiyax, yəni Məsih qeybdən zühur etməli və böyük İsrailə rəhbərlik etməlidir. “Bunun üçün də zəmin hazırlanmalı, xüsusən Süleyman məbədi yenidən bərpa olunmalıdır. Süleyman mədəninin qalıqları üzərində də müsəlmanlar üçün Kəbədən və Mədinə məscidindən sonra üçüncü müqəddəs sayılan Məscid Əl-Əqsa tikilib. Sonuncu Peyğəmbər həzrət Muhəmmədin də məhz bu məsciddən Meraca getdiyinə inanılır. Qeybdə olan müqəddəs şəxs inancı səmavi dinlərə məhz yəhudilikdən keçib. Xristianlar İsanı, müsəlmanlar da Mehdini gözləyirlər. İsrail əslində tam teopolitoloq xəritə və teokratik ideoloji xətt üzrə hərəkət edir. İnancdan doğan siyasi ideoloji xəritəyə və plana görə Maşiaxın gəlməsi üçün "böyük İsrail" qurulmalıdır. Guya İbrahim peyğəmbər bütün Orta Şərqi, Nildən Fərata qədər İsrail oğullarına vəd edib. Beləcə bütün qonşu ərəb ölkələrini işğal edib sözü gedən dövləti qurmağa çalışırlar. Artıq Qüdsdə Məscid əl Əqsanın altında tunellər qazılıb. Görünür fürsət tapıb həmin tunel vasitəsi ilə məscidi dağıdacaq yaxud partladacaqlar. İsrail, xüsusən sözü gedən sionizm ideologiyası tamamilə qədim yəhudi dini inancı və mifoloji tarixi üzərindən siyasət yürüdür. Sadəlövh müsəlmanlar yaxud dinlər tarixinə bələd olmayan siyasətçilər bu problemi yalnız Fələstin və İsrailin ərazi üstündəki münaqişəsi kimi anlayır yaxud bu cür təqdim edirlər. Halbuki belə deyil”.
T.İrfan qeyd etdi ki, bu gün Türkiyənin və digər ərəb ölkələrinin əsas narahatlığı məhz "Böyük orta doğu projesi" adı ilə əslində "böyük İsrail" uğrunda İsrailin apardığı siyasətdir. “İran rejimi İmam Mehdinin gəlişinə inandığı kimi, İsrail hakimiyyəti də inanır ki, Maşiax zühur edəcək və bütün dünyaya hökm edəcək. Netanyahunun mütəmadi olaraq bu mövzudakı açıqlamaları heç də inanclı təbəqəni ram etmək üçün deyil, bu sionizmin dövlət ideologiyasının əsasını təşkil edən məqsəd, hədəfdir. Livan, Suriya, Fələstin, İraq, Misir, İordaniya və Türkiyənin bir hissəsi bu xəritədə göstərilib. İnanca görə daha çox qan tökülməlidir ki, Maşiax zühur etsin. Lakin qan tökülür, o yenə də gəlmirsə demək onun hakimiyyəti üçün Süleyman məbədini bərpa etmək lazımdır. İran rejiminin inancına görə də İmam Mehdi Kəbədə zühur etməlidir. Kəbəni ələ keçirmək üçün də Yəməndə Ənsarullah təşkilatı fəaliyyət göstərir. Əslində İranla İsrailin dövlət ideologiyası oxşardır və bəşəriyyət üçün ciddi təhdid yaradır. Reallığa və məntiqə əsaslanan siyasətdən kənar mifoloji, qədim əsatirlər əsasında formalaşan məfkurə üzərindən hərəkət edərək hazırki mənzərəni yaradırlar. Halbuki əslində nə əsl Tövratda nə də Quranda sonda zühur edərək şəxslərdən bəhs olunmur, onlara Allahın hansısa coğrafiyanı xüsusi olaraq vəd etməsi barədə də məlumat yoxdur. Peyğəmbərlərin təbliğat coğrafiyasını təhrif edərək maddi ərazi kimi qəbul edib bu amalla da işğal həyata keçirmək heç bir dini inanca sığmır. İbrahim, Musa və Muhəmməd peyğəmbərlər hökmdar olmayıb, yer üzünü bölüşdürməyiblər. Sadəcə insanları yanlış inancdan, bütpərəstlikdən çəkdirmək üçün həmin coğrafiyada təbliğat aparıblar. İnsanlar sonradan dinləri təhrif edərək öz siyasi məqsədlərini, dünyəvi ambisiyalarını müqəddəs kitablara əlavə ediblər”-deyə T.İrfan bildirdi.
İradə SARIYEVA
