Məhərrəm Zülfüqarlı: “Azərbaycan müharibənin nə olduğunu hətta Avropa ölkələrindən qat-qat yaxşı bilir”
Prezident İlham Əliyev Avropa İttifaqı Şurasının Prezidenti Antonio Koşta ilə mətbuata bəyanatlarla çıxışı zamanı bildirib ki, bizim kimi ölkələr, sülhü digər ölkələrdən daha çox dəyərləndirir:
“Düşünürəm ki, əgər hər iki tərəf siyasi iradəni və sülhə sadiqliyini nümayiş etdirərsə, bu, dövlətlərin və xalqların barışığına dəlalət edən ən yaxşı göstəricidir. Sülhdən yaxşı heç nə ola bilməz. İnanın mənə, müharibə şəraitində yaşamağın və ya müharibə etməyin nə olduğunu bilirik. Ona görə bizim kimi ölkələr, ola bilsin, sülhü hər hansı digər ölkədən daha çox dəyərləndirir. Bir sözlə, gündəliyimiz həqiqətən çox genişdir. Biz, əlbəttə, sərhədlərimizə yaxın bölgədə təhlükəsizlik məsələlərini müzakirə etdik”.
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Azərbaycan xalqı elə bir vətənə malikdir ki, strateji cəhətdən çox əlverişli ərazidə yerləşib: “Müxtəlif yolların kəsişdiyi nöqtədə, təbiəti, sərvətləri ilə zəngin olan ərazidə yerləşdiyinə görə tarix boyu işğallara məruz qalıb. Yəni 5 min illik tariximiz var. Bunun 3 min ili mərkəzləşmiş dövlətlərin tarixidir. Həmin 3 min ilin 2 min ili işğallar dövrü olub. Min il isə müstəqil dövlətlər dövrüdür. Bu isə onu göstərir ki, Azərbaycan xalqı heç vaxt işğalla barışmayıb və daim mübarizə aparıb, öz müstəqilliyini bərpa edib. Qarabağ məsələsi uzun illər Azərbaycanla Ermənistan arasında münasibətlərin düşmənçilik səviyyəsində olmasına səbəb olub. Ərazilərimizin işğalı, qaçqınların ağır durumu yaddaşlardan silinməyəcək. Yəni Azərbaycan müharibənin nə olduğunu yaxşı bilir. Hətta Avropa ölkələrindən qat-qat yaxşı bilir. Avropada İkinci Dünya müharibəsindən sonra Balkanları çıxmaq şərti ilə müharibə olmayıb. Azərbaycan xalqı məhz Almaniyanın günahı üzündən başlamış iki dünya müharibəsinin hədəfi olub. Bu müharibələrdən xalqımız əziyyət çəkib. Bakı kimi neftlə zəngin olan ərazi 3 dəfə təhlükəyə məruz qalıb. Hətta Bakını bombalamaq planı olub. Deməyim odur ki, Qarabağ müharibəsinə qədər də Azərbaycan əhalisi müharibənin faciələrini yaşayıb. İkinci Dünya müharibəsində 600 mindən çox azərbaycanlı cəbhəyə gedib, onların 400 min nəfəri geri qayıtmayıb. Bu baxımdan Avropa İttifaqı Şurasının Prezidenti Antonio Koştaya bunu xatırlatmaq lazım idi. O mənada ki, biz sülhpərvər və müharibələrdən əziyyət çəkən xalqıq. Heç bir halda müharibələrin başlanmasına, faciələrə imkan verməmək siyasəti yeridirik. Biz Ermənistanla sülh şəraitində yaşamağın tərəfdarıyıq. Çünki müharibələr insanlara faciələr gətirir”.
Vidadi ORDAHALLI
