Faiq Ələkbərli: “Qzoyanın istefasının əsl səbəbi bu muzeyə marağın olmaması, gəlib gedənin kəskin azalması ilə bağlıdır”
İrəvanda fəaliyyət göstərən Erməni “Soyqırımı” Muzey-İnstitutunun direktoru Edita Qzoyan vəzifəsindən istefa verib. Qzoyanın istefasının səbəbini erməni mediası müxtəlif şəkillərdə qələmə verməyə çalışır. Məsələn, “Hraparak” qəzeti Ermənistanın təhsil, elm, mədəniyyət və idman naziri Janna Andreasyanın Edita Qzoyana istefa ərizəsi təqdim etməsini təklif etdiyini və istefa ərizəsi təqdim etmədiyi təqdirdə işdən çıxarılacağı ilə hədələdiyini yazıb. Yazırlar ki, Qzoyan qondarma “soyqırım” muzeyinin tikintisinə lazımı nəzarət etmədiyinə görə vəzifədən uzaqlaşdırılıb. Başqa bir fikrə görə, o, hökumətin adamı olmadığı üçün işdən çıxarılıb.
Ermənistanın Baş naziri Nikol Paşinyan isə martın 12-də İrəvanda keçirdiyi brifinqdə bildrib ki, ABŞ-ın vitse‑prezidenti Vensə Azərbaycanın Qarabağ bölgəsi ilə bağlı kitab hədiyyə etdiyi üçün Qzoyanın istefasını tələb edib. “Onun Vensə Qarabağ haqqında kitab hədiyyə etməsi Ermənistan hökumətinin siyasətinə zidd və təhrikedici addımdır. Bu hərəkət hökumətin mövqeyinə qarşıdır və sülh prosesinə ziyan vura bilər. Mən ondan istefa ərizəsi yazmağı tələb etmişəm”, - deyə Paşinyan bildirib.
Həm erməni mediasının yazdıqları, həm Paşinyanın səsləndirdiyi fikirlərin özü də mübahisəlidir. Bu mənada ki, Qzoyanın istefasının səbəbləri barədə daha inandırıcı versiya ortadadır.Belə ki, sosial şəbəkələrin erməni siqmentində belə bir fikir var ki, son vaxtlar qondarma genosid muzeyinə xaricdən gələnlərin sayı kəsin şəkildə azalıb, turistlərin də, İrəvana səfər edən qonaqların da ora marağı yoxdur, bir sözlə, saxta soyqırın muzeyinin qapısını açan yoxdur. Muzeyə baş çəkənlərin sayının demək olar ki, olmaması, ora beynəlxalq və ictimai marağın son dərəcə aşağı düşməsi nəticəsində Qzoyan istefa ərizəsi yazıb. Yəni onun vəzifədən çıxmasının əsl səbəbi bu muzeyə insanların daha maraq göstərməməsi ilə bağlıdır.
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru Faiq Ələkbərli baki-xeber.com-a bildirdi ki, bütün dünya bu muzeyin saxta mahiyyətindən xəbərdardır. F.Ələkbərli hesab edir ki, ermənilər artıq dünyanı öz nağılları ilə tora sala bilmir. “Qondarma soyqırım muzeyinin öz əhəmiyyətini itirməsi həm daxili, həm də xarici amillərlə bağlıdır. Ermənistanın öz daxilində də sözdə genosid məsələsinin əhəmiyyəti qalmayıb. Çünki bununla bağlı o qədər yalan və uydurma məsələlər var ki, artıq əvvəlki təsirinu saxlaya bilmir. Erməni xalqı da yaxşı bilir ki, bu muzeydə əks olunanlar qondarma və şişirdilmə məsələlərdir. 1914-1915-ci illərdə Osmanlıların erməniləri köçürmə məsələsini çox təhrif edib öz məqsədləri üçün şişirdiblər. Köçürmənin mahiyyəti aydınlaşdıqca Ermənistanın daxilində də, xaricin də də insanlar bunların gerçək olmadığını öyrənirlər. Paşinyanın apardığı siyasət də saxta genosidin yüksək səviyyədə təbliğatına şərait yaratmır. Ermənistanın baş naziri münasibətləri qonşu dövlətlərlə yaxşılaşdırmaq niyyətindədir. Yəni xarici dövlətlər də qondarma genosid məsələsində Ermənistanı maşa kimi istifadə edə bilmirlər”.
F.Ələkbərli qeyd etdi ki, həm Ermənistanda, həm də xaricdə qondarma soyqırım məsələsi aktual deyil, bu baxımdan, Ermənistana gələnlər bu muzeylə maraqlanmırlar. “Bu muzey öz əhəmiyyətini itirdiyi üçün artıq ona yerli və beynəlxalq maraq yoxdur. Qzoyanın istefasının əsl səbəbi bu muzeyə marağın olmaması, gəlib gedənin kəskin azalması ilə bağlıdır. Maraq yoxdursa, bu o deməkdir ki, onun qalması da artıqdır”-deyə F.Ələkbərli qeyd etdi.
İradə SARIYEVA
