Fikrət Yusifov: “Rusiyanın müvəqqəti olaraq bəzi məqamlardan öz xeyrinə istifadə etməsi mümkündür, amma...”
İstəsək də, istəməsək də, haradan baxsaq görürük ki, ABŞ-İran müharibəsi Rusiyanın əlini gücləndirir. Birincisi, dünya bazarında neftin qiyməti kəskin şəkildə bahalaşıb və bu da Rusiyada yaranan büdcə kəsirini bağlamağa imkan verir. İkincisi, ABŞ Hindistandan Rusiyadan neft idxalını dayandırmaqla bağlı tələbini müvəqqəti olaraq dayandırdı. Yəni Hörmüz boğazı bağlı olduğu üçün Hindistan Rusiya neftini idxal edə bilər.
Üçüncüsü, istər-istəməz baş verənlərlə əlaqədar Qərbin Rusiya-Ukrayna müharibəsinə diqqəti azaldı və bütün diqqət İrana yönəlib. Dördüncüsü, Ukrayna üçün olduqca vacib olan “Petriot” hava hücumundan müdafiə raketlərinin tədarükü ən aşağı səviyyəyə endi. Bir sözlə, ABŞ-İsrail-İran müharibəsi Putinin “əlinə oynayır”.
Sözügedən məsələyə aydınlıq gətirən sabiq maliyyə naziri, professor Fikrət Yusifov baki-xeber.com-a açıqlamasında bununla bağlı bir sıra məqamlara toxundu: “Təbii ki, bu gün İran ətrafında baş verən hadisələr Rusiyanın Ukraynaya qarşı artıq beşinci ildir ki, davam edən işğalçı müharibəsini müəyyən qədər arxa plana keçirdi. Lakin bu o demək deyil ki, bu problem dünya güclərinin diqqətindən kənarda qalıb. Əslində İranı məğlub etməklə ABŞ son nəticədə Rusiyanın əsas dəstək qanadını sındırmış olacaq. İranla ABŞ arasında müharibə davam etdikcə Rusiyanın müvəqqəti olaraq bəzi məqamlardan öz xeyrinə istifadə etməsi mümkündür və indi bu gerçəkdən baş verir. Lakin hər kəs bilir ki, ABŞ İranla başlatdığı müharibəni bitirdikdən sonra Rusiyanın tabutuna son mismarı Kubaya nəzarəti tam ələ almaqla vuracaq. Və bundan sonra Rusiyanın dünyada Şimali Koreyadan başqa heç bir dostu qalmayacaq. Bu hal Rusiyanın rəhbərliyini bərk hiddətləndirsə də onlar böyük güclərin onun məhvinə yönələn bu addımlarının qarşısını almaqda acizdirlər. Bu gün bütün yollar Rusiyanın sonunu yaxınlaşdırmağa aparır. Rusiya bunun fərqindədir. Ancaq acizdir, heç nə edə bilmir. Qarşıdakı bir neçə ay ərzində Rusiya iqtisadiyyatının tam çöküşü baş verəcək və dövlət özünü müflis elan etmək zorunda qalacaq. Bu isə inqilab deməkdir – acların, imkansız qalmışların başladacağı inqilab! Rusiyada keçən əsrin ikinci on illiyinin sonlarında başlayıb çarı yıxan acların inqilabı! Rusiya bunun bir addımlığındadır. Əgər böyük güclər İrana qarşı müharibəni indi başlatmasaydılar, Rusiyada artıq çoxdan barəsində danışdığımız çöküş baş vermişdi. Lakin unutmayaq ki, bu mütləq baş verəcək, özü də tezliklə! İranla problem çözüldükdən sonra növbədə bir günlük hərbi müdaxilə ilə Kuba və onun ardınca isə Rusiyadır”.
Vidadi ORDAHALLI
