Şakir Ağayev: “Azərbaycan İrana o mesajı verdi ki, bu ölkəyə münasibəti xoş məramlıdır və dar gündə ondan yardımınını əsirgəmir”
Azərbaycan Prezidenti İlham Əliyev və İran Prezidenti Məsud Pezeşkian arasında 2026-cı il 8 mart tarixində baş tutmuş telefon danışığına əsasən, qonşu və dost İran xalqının hazırkı ehtiyaclarının təmin edilməsi məqsədilə İrana humanitar yardım yola salınıb.
Azərbaycan Prezidentinin tapşırığına uyğun olaraq Fövqəladə Hallar Nazirliyinin avtomobilləri ilə İrana yola salınan humanitar yardıma 10 ton un, 6 ton düyü, 2,4 ton şəkər, 4 tondan artıq su, 600kq-a yaxın çay, 2 tona yaxın dərman və tibbi ləvazimatlar daxildir.
İndiki şəraitdə Azərbaycanın İrana humanitar yardım etməsini necə dəyərləndirmək olar? Bu addımın İrana mesajları nədir? Bu nə deməkdir?
“Novoye vremya” qəzetinin baş redaktoru Şakir Ağayev baki-xeber.com-a bildirdi ki, Azərbaycan özünün mehriban qonşuluq siyasətinə daim sadiqdir və İranın bu ağır vəziyyətində ondan dəstəyini əsirgəməyib. Azərbaycanın xeyirxahlıq missiyasının Beynəlxalq ictimaiyyət tərəfindən də hər zaman müsbət qarşılandığını deyən Ş.Ağayevin sözlərinə görə, ölkəmiz hər zaman dar günün dostu olduğunu sübut edib. “Azərbaycan humanitar yardımın ilk partiyasını İrana yola salıb. Azərbaycan bu cür addımları, region diplomatiyasını dəfələrlə nümayiş etdirib. Ölkəmiz təkcə qonşu dövlətlərə deyil, humanitar problemlərlə üzləşən bütün dövlətlərə həmrəylik göstərib, çətin vəziyyətlə üzləşən dövlətlərin həmişə yanında olub, onların ağır günündə humanitar yardımlar göstərib. Azərbaycan diplomatiya tarixində bununla bağlı çoxlu faktlar, nümunələr var. Bu cür addımlar ölkələr arasında münasibətlərin daha da yaxşılaşdırılmasına, dərinləşməsinə xidmət edir.
Azərbaycanın İrana humanitar yardım göstərməsi təbiidir və dar gündə olan qonşusunun halına biganə qala bilməzdi. Ölkəmizin humanitar diplomatiyası bütün dünyaya məlumdur.
Azərbaycan İrana o mesajı verdi ki, bu ölkəyə münasibəti xoş məramlıdır və dar gündə ondan yardımınını əsirgəmir. Təəssüf ki, İranın daxilindəki bəzi radikal kütləvi informasiya vasitələri Azərbaycanla bağlı həqiqəti əks etdirməyən, qərəzli çıxışlar da olur. Hətta İranın bəzi rəsmi dairələrində də Azərbaycanı qaramaq istəyən qüvvələr var. Bütün bunlara baxmayaraq Azərbaycan öz humanitar missiyasından qalmadı və dar gündə İrana yardım əlini uzatdı. Bu İrandakı Azərbaycana qarşı olan dairələrə, mətbuata bir ismarıcdır ki, Azərbaycan qonşusunda müharibə getməsini, qonşusunun pis gününü istəmir, əksinə dar günündə onun yanında dayanmağı bacarır. Bu bir daha göstərdi ki, Azərbaycan ərazisindən onların iddia etdiyi kimi İrana qarşı eç bir təhlükə yoxdur, yalnız xoş məram, humanitar dəstək addımları var”-deyə Ş.Ağayev qeyd etdi.
İradə SARIYEVA
