Azər Həsrət: “İranın xəritəsinin dəyişməsi qaçılmazdır və bu ölkə bölünəcək”
ABŞ prezidenti Donald Tramp jurnalistlərlə söhbəti zamanı İranın xəritəsinin dəyişə biləcəyini istisna etməyib.
Onunla jurnalistlərin arasında belə bir dialoq baş verib:
- Amerikanın hücumundan sonra İranın xəritəsi əvvəlki kimi qalacaqmı?
- Deyə bilmərəm. Düşünürəm ki, yox.
Göründüyü kimi, Tramp açıq şəkildə eyham vurub ki, müharibə bitəndən sonra fərqli bir İran görəcəyik.
Maraqlıdır, ABŞ prezidenti bununla nə demək istəyir?
Sözügedən məsələyə aydınlıq gətirən siyasi şərhçi Azər Həsrət baki-xeber.com-a açıqlamasında buna bir neçə prizmadan yanaşdı: “Şəxsən mən son bir neçə ildə davamlı şəkildə deyirəm ki, İran və Rusiyanın xəritəsi dəyişəcək. Yəni onların yerində yeni müstəqil dövlətlər qurulacaq. Bu fikirləri deyəndə bəlli təhlillərə, xüsusən də dünyanın taleyinə hökm verənlərin davranışlarına əsaslanmışam. Yəni dünyada elə proseslər gedir ki, bundan sonrakı mərhələdə yeni bir şəkillənmə olacaq. Dünya yenidən dizayn ediləcək. Burada İran, Rusiya kimi təcavüzkar dövlətlərə yer yoxdur. Çünki bu dövlətlər beynəlxalq hüquq tanımırlar. Üstəlik də dünya üçün təhdid təşkil edirlər. Yəni hər iki dövlət – istər İran, istər Rusiya sadəcə olaraq region ölkələri üçün deyil, bütün dünya üçün təhlükədir. Əlbəttə ki, belə təhlükəli ölkələrin də bir dövlət olaraq davam etməsi gələcək sülhə təhdiddir. Ona görə də o dövlətlərin yerində yeni və yeni dünya düzəninə uyğun dövlətlərin qurulması vacibdir. Bu baxımdan Trampın dediyi sözü dəyərləndirə bilərik. Tramp hazırda alternativsiz dünya lideridir. Bir nömrəli və rəqibsiz qlobal gücün - ABŞ-ın rəhbəridir. Bunun nəticəsidir ki, Venesuela prezidentini evindən oğurlayaraq həbs etdi. Heç Venesuela belə sorğu-sual etmir ki, bunu niyə etmisən? O baxımdan hesab edirəm ki, Trampın İranın xəritəsinin dəyişə biləcəyi ilə bağlı fikirləri təsadüfü deyil və bu, ciddiyə alınmalıdır. Biz də Azərbaycan olaraq o prosesə hazırlaşmalıyıq. Yəni qəfil nəsə baş verərsə biz forsmajor hala hazır olmalıyıq. Ona görə də İranın xəritəsinin dəyişməsi qaçılmazdır və bu ölkə bölünəcək. Tramp əslində buna işarə edir. Nəinki İranın, Rusiyanın da xəritəsi dəyişəcək. Hələ perspektivdə başqa dövlətlər var, onların da xəritəsi dəyişəcək. Bu isə o deməkdir ki, yeni dövlətlər meydana gələcək. Ümumiyyətlə, dünya durduqca müstəqil dövlətlərin sayı həmişə artıb. Heç vaxt azalmayıb. Məsələn, 19-cu əsrin ortalarında dünyada 80-100 arası dövlət var idi. Bu gün isə BMT üzvü olan 200-ə qədər dövlətdən danışırıq. O baxımdan hesab edirəm ki, yeni dövlətlər yaranacaq və biz də ona hazır olmalıyıq”.
Vidadi ORDAHALLI
