Xaqani Cəfərli: "İran rejimi beynəlxalq hüquq baxımından müdaxiləyə açıq rejimdir"
ABŞ və İsrail İrana qarşı ənəliyyatların ilk saatlarında ölkənin ali rəhbərini fiziki olaraq özlərinə qarşı zərərsizləşdirdi. Daha sonra İsrail bəyan etdi ki, yeni ali lider təyin olunan kimi onu da öldürəcəklər. Maraqlıdır, İran eyni taktikanı İsrailin özünə qarşı niyə çevirmir? Buna İranın gücü çatmır, ya müharibənin "dövlət terroru" şəklini almasını istəmir? Əgər İran da bu taktikaya əl atsa, sonu nə olar?
Əslində İsrailin belə bir açıqlaması siyasi mesaj və qorxutma taktikasına oxşayır. Hədəfini dəqiq göstərərək düşməninə qarşı üstünlük yaratmaq istəyir. İran isə eyni yanaşmanı açıq şəkildə tətbiq etmir. Bu, bir neçə səbəblə əlaqədar ola bilər. Birincisi, İranın hərbi və texnoloji imkanları İsrailin imkanları ilə müqayisədə fərqlidir və Tehran hakimiyyəti üçün açıq əməliyyatlar daha risklidir. İkincisi, belə bir addım beynəlxalq aləmdə İranın "dövlət terroru" kimi etiketlənməsinə, ciddi sanksiyalar və diplomatik təcridə səbəb ola bilər.
Əgər İran da bu taktikanı tətbiq etsə, nəticədə regionda gərginlik kəskin artar, qarşılıqlı əməliyyatlar və cavab hücumları başlaya bilər. Bu isə tammiqyaslı müharibəyə və ya uzunmüddətli qeyri-sabitliyə gətirib çıxara bilər. Eyni zamanda, hər iki tərəf üçün dinc əhali itkilərinin artması və beynəlxalq təzyiqin güclənməsi qaçılmaz olar.
Qısacası, bu taktikanın hər iki tərəfə tətbiqi çox riskli və potensial olaraq partlayıcı nəticələr verə biləcək bir addımdır.
Politoloq Xaqani Cəfərli "Bakı-Xəbər" qəzetinə bildirdi ki, İrandakı rejim uzun illərdir terroru maliyyələşdirən təsisat olaraq təsnif edilir: "Ona görə də beynəlxalq hüququn təsirindən kənarda qalır. Bir terror təşkilatının liderinə olan münasibətlə İran teokratik rejiminin təmsilçilərinə münasibət təxminən üst-üstə düşür. İrandakı rejimin əsas təsisatı olan İslam İnqilabı Keşikçiləri Korpusu ABŞ, Avropa İttifaqı, Ukrayna və başqa dövlətlər tərəfindən terror təşkilatı kimi tanınıb. Yəni İran rejimi beynəlxalq hüquq baxımından müdaxiləyə açıq rejimdir.
İsraillə bağlı belə məqam yoxdur. Üstəlik, İranın İsrail kimi imkanları da yoxdur. İran İslam İnqilabından sonra İsraili məhv etməyi rəsmi dövlət siyasəti elan etsə də, kiçik bir uğura da nail ola bilməyib. Üstəlik, İsrail rəsmilərinə qarşı oxşar təşəbbüslər İran üçün daha ağır nəticələr döğura bilər".
Akif NƏSİRLİ
