Məhərrəm Zülfüqarlı: “Təəssüf ki, baş verənlərə dünya ictimaiyyətinin reaksiyası qənaətbəxş deyil”
Bir neçə gün əvvəl İranın cənubunda, Hörmüzqan əyalətinin Minab şəhərində qızlar məktəbinə endirilən hava zərbəsi nəticəsində 189 məktəbli qızın həlak olub. İran tərəf bəyan edir ki, 189 məktəbli qızın həyatını itirdiyi bombardman ABŞ və İsrail tərəfindən törədilib. Digər tərəfdən ABŞ rəsmiləri hadisənin araşdırıldığını deyir və mülki hədəfləri vurmadıqlarını bildirirlər. Eyni zamanda ABŞ iddia edir ki, hadisəni İran tərəfi özü törədib.
Hadisənin kimlər tərəfindən törədilməsi barədə suallar çoxdur. Burada söhbət 189 məsumun faciəli taleyindən gedir ki, buna dünya ictimaiyyəti, beynəlxalq qurumlar səssiz qalmamalıdır. Hadisənin üzərindən iki həftədən artıq vaxt keçməsinə baxmayaraq hələ də ona lazımı münasibət özünü göstərmir.
İranın Minab şəhərində 189 qız uşağının bombardmanda öldürülməsinə dünyanın reaksiyası yetərli sayıla bilərmi?
Ekspertlər hesab edirlər ki, bu hadisəyə gözlənilən reaksiya verilməyib. Onların fikrincə, 189 qızın həyatına son qoyan məsələyə bütün dünya səsini qaldırmalıdır, çünki söhbət dinc insanların faciəsindən gedir.
Tarix elmləri doktoru, professor, siyasi ekspert Məhərrəm Zülfüqarlı baki-xeber.com-a bildirdi ki, regionda, xüsusilə də Yaxın Şərqdə baş verən müharibə bizim sərhədlərə də yaxınlaşır. M.Zülfüqarlı hesab edir ki, Amerika-İsrail və İran müharibəsi bütün bəşəriyyəti narahat etməlidir. “Hər bir vicdanlı insan müharibənin tez başa çatmasını arzulamalıdır. Burada günahsız qanlar tökənlər qınamalıdır.
O ki, qaldı Minab şəhərində qız məktəbinin vurulmasına, 189 qız uşağının öldürülməsinə, bu dünya ictimaiyyətini ciddi narahat etməlidir. Buna bais olan cinayətkarların tapılıb cəzalandırılması tələb edilməlidir. Amma təəssüf ki, baş verənlərə dünya ictimaiyyətinin reaksiyası qənaətbəxş deyil. Əslində çox sərt reaksiya verilməli idi”.
İran dövlətinin, ABŞ və İsrailin bu məsələyə münasibətinə gəlincə, M.Zülfüqarlı qeyd etdi ki, burada da bütün müharibələr tarixində rast gəlinən bir nüans var. “Məsələn, 1939-cu ilin 1 sentyabrında faşist Almaniyası Polşaya hücum edəndə öz əsgərlərinə polyak əsgərlərin formasını geydirərək sərhəddə münaqişə yaratdı və bütün Almaniyaya bəyan etdi ki, guya polyak əsgərləri onlara hücuma keçib, bunlar da əks-hücum adı ilə təcavüzə başladılar. Yəni bu cür siyasi riyakarlıqlar hər dövrdə olub. Bu riyakarlıq İrana qarşı ABŞ-İsrail müharibəsində də var. İndi belə faktları aşkara çıxarmaq çox çətindir.
Bununla belə müasir texniki qurğular var ki, onlar bu kimi hadisələrin necə və kim tərəfindən törədildiyini aşkara çıxara bilir. Məsələn, peyk çəkilişləri köməyə yetə bilər. Sadə insanlar bu hadisənin kimlər tərəfindən törədildiyini müəyyən etməkdə çətinlik çəkirlər, hətta ekspertlər özləri də. ABŞ kimi ölkələr bəyan ediblər ki, insan hüquqları məsələsi heç bir ölkənin daxili işi deyil, harada insan haqları pozulursa biz ora müdaxilə etməliyik, insanların haqlarını qorumalıyıq. İnsan haqlarının heç bir ölkənin daxili işi olmadığını bəhanə edib işğal həyata keçirmək qəbul olunmazdır. Bu siyasət elə ifrat dərəcəyə çatıb ki, dəhşətli hadisələr görürük. Başqa ölkəyə daxil olub onun prezidentini oğurlamaqla, təcavüzlə, raket atmaqla, nüvə hədəsi ilə öz məqsədlərinə nail olmaq istəmələri beynəlxalq hüquqa tamamilə ziddir. BMT bu məsələlərə qarşı ciddi nəzarət mexanizmləri hazırlamalıdır. Təssüf ki, bu yetərli deyil. Belə görsənir ki, İsrail və ABŞ İranda insan haqlarının pozulmasına etiraz edir. Əslində isə məqsədləri başqadır. Onlar İran neftini ələ keçirmək niyyəti güdürlər”-deyə M.Zülfüqarlı əlavə etdi.
İradə SARIYEVA
