Arzuxan Əlizadə: “Bu İranın ikiüzlülüyünün, riyakar mahiyyətinin növbəti bariz nümunəsidir ki, onlar bunu nümayiş etdirdilər”
Prezident İlham Əliyev Təhlükəsizlik Şurasının iclasında İranın Naxçıvan Beynəlxalq Hava Limanına xain terror hücumunu böyük nankorluq adlandırıb. Prezident İlham Əliyev bildirib:
“Onların törətdiyi bu terror aktı bütün başqa çirkin amillərlə yanaşı, böyük nankorluq nümunəsidir. Son hadisələr baş verən kimi biz onlara xəbər göndərdik, başsağlığı verdik. Xarici işlər naziri mənim göstərişimlə həmkarı ilə danışdı. Mən onların səfirliyinə gedib başsağlığı vermək üçün öz mövqeyimi bildirdim. Halbuki məndən başqa heç bir dövlət başçısı İranın heç bir səfirliyinə getməyib. Yəni bunu qiymətləndirməmək, bunu yerə vurmaq, özlərini alçaq, nankorlar kimi aparmaq heç kimə şərəf gətirmir. Bu şərəfsizlər, bizə qarşı bu terror aktını törədənlər peşman olacaqlar. Bizim gücümüzü sınamasınlar. Bizim gücümüzü sınamaq istəyənlərin başı “Dəmir yumruq” vasitəsilə yarıldı. Bugünkü hadisə də eyni nəticəni hasil edəcək. Ona görə bu məsələ ilə bağlı tədbirlər planı hazırlanmalıdır. Bütün göstərişlər verilmişdir. İranın Azərbaycandakı səfiri Xarici İşlər Nazirliyinə çağırıldı, etiraz notası veriləcək, digər diplomatik addımlar atılacaq. Sərhədlə bağlı müvafiq göstərişlər verildi.
Onu da bildirməliyəm, bu gün səhər mənə məlumat verildi ki, İranın xarici işlər nazirinin müavini Bakıya zəng edir, xahiş edir ki, İran səfirliyinin Livanda qalmış əməkdaşlarının təxliyəsinə Azərbaycan kömək etsin. Çünki onların imkanı yoxdur. Mənə məruzə edildi. Mən dərhal göstəriş verdim ki, kömək göstərin, təyyarə göndərin. Hətta onlar dedilər ki, biz bunun pulunu da verməyə hazırıq. Dedim ki, lazım deyil, indi dar gündə biz kömək göstərməsək, bəs nə vaxt kömək göstərməliyik? Bütün bunların müqabilində çirkincə, namərdcə, nakişi kimi Naxçıvana zərbə endirmək?! Bu ləkə onların çirkin və eybəcər simasından heç vaxt silinməyəcək…”
Millət vəkili Arzuxan Əlizadə baki-xeber.com-a bildirdi ki, İranın Azərbaycan ərazisinə, Naxçıvana dron və raket hücumu kerçəkləşdirməklə əslində növbəti dəfə öz riyakar simasını göstərmiş oldu. “Biz onsuz da bu illər ərzində dost olmayan münasibətilə üzləşmişik. Dəfələrlə düşmən mövqedən Azərbaycana qarşı münasibət bildiriblər. Azərbaycan torpaqları işğal altında olduğu müddətdə də işğalçı tərəfə dəstək veriblər. Adında “islam” sözü olan bu respublika əslində islam dininə də qənim kəsilib, atdıqları addımlarla, sərgilədikləri mövqe ilə islam dinini dünyada terrorçu kimi təqdim ediblər. Biz bu illər ərzində görmüşük ki, İran Azərbaycanın müstəqilliyini, regiondakı mövcudluğunu heç bir halda qəbul etmək istəmir. Xüsusilə də İkinci Qarabağ savaşından sonra əldə etdiyimiz möhtəşəm qələbənin ardınca regionun əsas dövlətə, güc və söz sahibinə çevrilməsi də İranın ciddi narahatlığına səbəb olub. Bundan əvvəlki dönəmdə də, yəni bir müddət əvvəl Azərbaycanın İrandakı səfirliyinə qarşı terror aktı həyata keçirmişdi. Bunun da arxasında birmənalı olaraq İranın dövlət qurumları, SEPAH dayanırdı. Son hadisə də Azərbaycan ərazisində gerçəkləşdirən növbəti terror aktıdır. Bu artıq heç bir çərçivəyə sığmayan yanaşmadır. Azərbaycanın onlara göstərdiyi normal münasibətlər müqabilində, bir çox hallarda verdiyimiz dəstəyin əksinə olaraq biz İranın belə bir mövqeyi ilə qarşılaşırıq. Bu İranın ikiüzlülüyünün, riyakar mahiyyətinin növbəti bariz nümunəsidir ki, onlar bunu nümayiş etdirdilər. Təbii ki, cavabları veriləcək və verilməlidir də”.
Prezidentin sədrliyi ilə Təhlükəsizlik Şurasının iclasının çağrıldığına toxunan A.Əlizadənin sözlərinə görə, Azərbaycan Prezidenti nə lazım idisə dedi və İranın Azərbaycana qarşı atdığı addımlarla bağlı bir çox məsələlərə də aydınlıq gətirdi, görüləcək tədbirlərlə bağlı da tapşırıqlar verdi. Azərbaycan Ordusunun bir nömrəli hazırlıq vəziyyətinə gətirildiyini deyən A.Əlizadə bildirdi ki, bununla bağlı artıq Ali Baş Komandanın qərarı var. “Əgər növbəti yanlış addım atılacaqsa mütləq mənada cavab veriləcək və “Dəmir yumruq” başlarına endiriləcək. Onsuz da İrandakı molla rejimi süquta uğramaq üzrədir, son dövrlərlərini yaşayır. Görünən bundan ibarətdir ki, artıq aqonyadadırlar. Bütün qonşularla düşmənçilik mövqeyində dayanan bu rejim Azərbaycanla da münasibətləri kritik həddə gətirib çatırdı. İranla, eləcə də digər qonşularımızla normal münasibətlərdə olduğumuzu təkcə sözdə deyil, əməldə də sübut etmişik. Amma görürük ki, 30 ildən artıq bir müddətdə Azərbaycana düşmən mövqe sərgiləyən molla rejimi faktiki olaraq yanlış islam təfəkkürü və narkotik vasitələrin transferi ilə məşğul olublar, Azərbaycan cəmiyyətini zəhərləməklə Azərbaycan dövlətinə qarşı pisliklər etməklə gündəmdə olublar. Təbii ki, cavabları verilməlidir və veriləcək”-deyə A.Əlizadə vurğuladı.
İradə SARIYEVA
