Ceyhun Məmmədov: “Prezident İlham Əliyev açıq şəkildə qətiyyətli mövqe nümayiş etdirdi”
İranın Naxçıvan Beynəlxalq Hava Limanını dron hücumuna məruz qoyması həm ölkəmizdə, həm də dünyada ciddi narahatlıqla və etirazla qarşılandı. Terror hadisəsi baş verdikdən sonra Prezident İlham Əliyev Təhlükəsizlik Şurasının iclasını keçirdi və İranın Azərbaycana qarşı törətdiyi terror aktına siyasi qiymət verdi və sərt bəyanatlar səsləndirdi.
“Bu gün (5 mart) İran tərəfindən Azərbaycan ərazisinə qarşı, Azərbaycan dövlətinə qarşı terror aktı törədilmişdir. Naxçıvan Muxtar Respublikasının ərazisini İran dövləti pilotsuz uçuş aparatları ilə atəş altına salmışdır. Atəşin hədəfləri mülki obyektlər idi. Naxçıvan Beynəlxalq Hava Limanı, onun terminal binası, məktəb və digər istiqamətlər İran tərəfindən namərd atəşə məruz qalmışdır. Azərbaycan dövləti bu çirkin terror aktını qətiyyətlə pisləyir, bunu törədənlər dərhal məsuliyyətə cəlb edilməlidir. Azərbaycan tərəfinə İran rəsmiləri tərəfindən izahat verilməlidir, üzr istənilməlidir və bu terror aktını törədənlər cinayət məsuliyyətinə cəlb edilməlidir”-deyə Prezident İlham Əliyev Təhlükəsizlik Şurasının iclasında bildirib.
Prezident Əliyev bəyan edib ki, birinci dəfə deyil, İran dövləti Azərbaycana və azərbaycanlılara qarşı terror aktları həyata keçirir. Prezident Əliyev bildirib: “Hamımız yaxşı xatırlayırıq ki, bir müddət bundan əvvəl Azərbaycanın Tehrandakı səfirliyi terror aktına məruz qalmışdır”.
Prezident İlham Əliyev ekstremal vəziyyətdə İranın Naxçıvanı vurması ilə bağlı Azərbaycanın siyasətinin əsas tezislırini və istiqamətlərini necə müəyyən etdi? Burada Prezidentin cəsarət və qətiyyət kimi şəxsi keyfiyyətləri nə rol oynadı?
Millət vəkili Ceyhun Məmmədov baki-xeber.com-a bildirdi ki, İranın Naxçıvana qarşı törətdiyi terror aktından sonra Prezident İlham Əliyev bu məsələlərə özünün sərt reaksiyasını və mövqeyini ortaya qoydu. “Prezident İlham Əliyev açıq şəkildə qətiyyətli mövqe nümayiş etdirdi. Bu cənab Prezidentin qətiyyətli və prinsipial bir şəxsiyyət olduğunu nümayiş etdirdi. Biz ilk dəfə deyil ki, cənab Prezidentin bu cür prinsipial mövqe nümayiş etdirdiyini görürük. Bu əvvəlki dövrdə də olmuşdu, bu dəfə də Prezident prinsipial mövqe ortaya qoydu və açıq-aydın bildirdi ki, Azərbaycan ordusu bu cür təxribatların qarşısını qətiyyətlə olacaq. Biz ümumi prosesə baxanda, yəni Azərbaycan müharibəyə qədər olan dövrdə, hətta bir neçə günə qədər səylə çalışdı ki, müharibə baş verməsin. Çünki müharibə bölgəmiz üçün yaxşı heç nə vəd etmirdi. Bu mənada Prezidentin atdığı addımlar, verdiyi bəyanatlar xüsusi əhəmiyyət daşıdı. Səfirliyə getdi, İran Prezidenti ilə danışdı. Amma bizim bunun qarşılığında gördüyümüz o oldu ki, İran növbəti dəfə bizə qarşı xəyanət nümayiş etdirdi. Bu xəyanət də ciddi bir məsələ idi”. C.Məmmədov qeyd etdi ki, İran bu cür addımlar atmamalı, ortaya bu cür mövqe qoymamalı idi. O, vurğuladı ki, İranın terroruna qarşı biz növbəti dəfə Azərbaycan Prezidentin prinsipiallığının, qətiyyətli mövqe sərgiləməsinin şahidi olduq. “Bu onu göstərir ki, İlham Əliyev çox qətiyyətli, çox prinsipial bir Prezidentdir. Qarabağ zəfərində də bunu bir neçə dəfə nümayiş etdirmişdi. Azərbaycan Prezidentinin qətiyyətini biz son hadisələr zamanı bir daha gördük. Ona görə də İran cənab Prezidentin xəbərdarlıqlarını görməməzlikdən gəlməməlidir. "Dəmir yumruq" hər zaman hazırdır”-deyə C.Məmmədov bildirdi.
İradə SARIYEVA
