Elşən Manafov: “Sülh müqaviləsinin imzalanması ərəfəsində Bakı münasibətlərə gərginlik gətirə biləcək hər hansı addım atmaq istəmir”
Xocalı soyqırımının 34 ili tamam oldu. Azərbaycan ərazi bütövlüyünü və suverenliyini bərpa edəndən sonra sanki Xocalı soyqırımının xaricdə təbliğində, bununla bağlı diaspor qurumları çərçivəsində tədbirlərin keçirilməsində, soyqırımın daha çox ölkə tərəfindən tanınmasının təmin edilməsində bir passivlik var. Halbuki, əvvəl bu, belə deyildi. Xocalıda törədilən qırğının, insanlıq əleyhinə cinayətlərin dünyada təbliğinə xüsusi önəm verilirdi. İndi isə biz bunu görmürük.
Ümumilikdə, belə yanaşma doğrudurmu? Ermənistanla sülh sazişi imzalanacaq deyə soyqırımın təbliğinin arxa plana keçməsi tarixi nöqteyi-nəzərdən, digər məsələlər baxımından təhlükəli deyilmi?
Sözügedən məsələ ilə bağlı fikirlərini baki-xeber.com-la bölüşən politoloq Elşən Manafov buna bir neçə prizmadan yanaşdı: “Xocalı soyqırımının beynəlxalq birlik tərəfindən tanınması Azərbaycanın xarici siyasətinin həmişə prioritet istiqamətlərindən biri olub. Bu istiqamətdə aparılan iş nəticəsində Xocalı hadisələri soyqırım olaraq Avropa, Asiya və Amerikanın bir sıra dövlətləri tərəfindən tanınıb. Pakistan və Somali dövlət olaraq, Çexiya, Rumınıya, Bosniya-Hersoqovina, Cibuti, İordaniya, Kolumbiya, Qana, Meksika və digər dövlətlər isə parlamentləri səviyyəsində habelə, ABŞ-ın 22 ştatı Xocalıda yaşananları soyqırım olaraq tanıyıblar və bu istiqamətdə iş bundan sonra da, davam erdiriləcək. Lakin Ermənistanla sülh müqaviləsinin imzalanması ərəfəsində rəsmi Bakı münasibətlərə gərginlik gətirə biləcək hər hansı addım atmaq istəmir. Çünki hazırda region ətrafında geosiyasi qarşıdurmanın kifayət qədər kəskin bir mərhələyə daxil olduğu, habelə Ermənistanda parlament seçkiləri ərəfəsində Azərbaycanla münasibətlərin nizama salınmasında maraqlı olan Paşinyan iqtidarının əleyhinə işləyəcək amilləri nəzərə alaraq məlum faciəni təbliğatı məsələlərdə əvvəlki tərzdə müvəqqəti olaraq qabartmır. Ona görə ki, 34 il əvvəl xalqımıza qarşı Xocalı soyqırımını törətmiş millətçi, revanşist qüvvələr Ermənistanda yenə də hakimiyyətə can atırlar. Onlara dəstək verən daxili və xarici qüvvələrin səyləri artır. Qonşu ölkədə militarist, millətçi dairələrin hakimiyyət başına gəlmə ehtimalları hələ də aktualdır. Bu şəraitdə bəlli qüvvələrin xeyrinə işləyə biləcək addımları atmamaq, rəsmi İrəvanla Vaşinqton razılaşmalarının prinsiplərindən çıxış edərək siyasi, habelə iqtisadi əlaqələri artırmaq ölkənin və regionun təhlükəsizlik maraqları baxımından vacibdir. Zəngəzur dəhlizi, habelə bölgə ilə bağlı digər infrastruktur, loqistik layihələrin reallaşdırılması və bu zaman geosiyasi dividentlər əldə etmək zərurəti hazırda Ermənistanla münasibətlərimizdə prioritet əhəmiyyət kəsb edən faktordur”.
Vidadi ORDAHALLI
