Naxçıvandan Qarsa səyahət müddətini 85 dəqiqəyə endirəcəyini nəzərdə tutan Türkiyəni Azərbaycanla birləşdirəcək Qars-İğdır-Naxçıvan dəmir yolu layihəsi ilə bağlı mühüm addımlar atılır. Türkiyənin “Karar” qəzeti yazır ki, Qars-İğdır-Aralık-Dilucu dəmir yolunun (Naxçıvan Muxtar Respublikası ilə həmsərhəd) tikintisi sürətlənir. Nəşr 224 km uzunluğunda olan dəmir yolu Zəngəzur dəhlizində “əsas halqa” adlandırılıb.
Nəşr qeyd edir ki, yeni xəttin istifadəyə verilməsi ildə 5,5 milyon sərnişin və 15 milyon ton yük daşınmasına imkan verəcək: “Bu xətt üzrə sərnişin qatarlarının sürəti saatda 160 km, yük qatarlarının sürəti isə saatda 100 km-ə çatacaq”. Qəzetin məlumatına görə, Qarsdan Naxçıvana gedən dəmir yolu Bakı-Tiflis-Qars dəmir yoluna alternativ və tamamlayıcı olacaq, həmçinin Çin ilə Avropa ölkələri arasında yükdaşımaları üçün yeni imkanlar açacaq: “Şərqi Anadoluda yeni dəmir yolu Orta Dəhlizin səmərəliliyini artıracaq, regiondakı vəziyyətə birbaşa təsir göstərəcək və Türkiyənin qardaş Azərbaycan, bütövlükdə Türk dünyası ilə əlaqələrini gücləndirəcək”. Qəzetdə yeni nəqliyyat arteriyasının Türkiyənin şərq vilayətlərinin, xüsusən də beynəlxalq əhəmiyyətli logistika mərkəzlərinin yaradılacağı İğdırın inkişafına töhfə verəcəyi də vurğulanır.
Bu marşrut mövcud Bakı-Tiflis-Qars dəmir yolu xəttinə alternativ kimi nəzərdə tutulub və Orta Asiya ilə Avropa arasında sərnişin daşımalarının müddətini 18 gündən 12 günə endirəcək. Layihə çərçivəsində Türkiyə ərazisində 5 stansiya inşa edilir: Digor, Tuzluca, İğdır, Aralıq və Dilucu. Qars-İğdır-Naxçıvan dəmir yolu Zəngəzur dəhlizinin bir hissəsidir və yalnız Türkiyə ilə Azərbaycanı birləşdirməklə kifayətlənmir, eyni zamanda qlobal nəqliyyat və ticarət marşrutlarının əsas arteriyalarından birinə çevriləcək. Qars-İğdır-Naxçıvan dəmir yolu xətti istifadəyə verildikdən sonra burada saatda 160 km sürətlə hərəkət edən qatarlar işləyəcək.
Ramil QULİYEV
