Bəhruz Quliyev: "ABŞ Ermənistanı bu mərhələdə Azərbaycana qarşı deyil, Rusiyaya qarşı strateji alətə çevirməyə çalışır"
Ermənistanın baş naziri Nikol Paşinyan ABŞ-la hərbi və müdafiə əməkdaşlığında əhəmiyyətli irəliləyiş olduğunu bildirib və bu çərçivədə ölkənin ABŞ-dan V-BAT tipli döyüş dronları aldığını açıqlayıb, bu dronların müdafiə qabiliyyətini gücləndirəcəyini vurğulayıb. O qeyd edib ki, bu satınalma ABŞ-ın Xarici Hərbi Satış proqramı çərçivəsində həyata keçirilib və əməkdaşlığın daha da genişləndirilməsi üçün baza yarada bilər. Paşinyan həmçinin ABŞ-la münasibətlərin daha güclü olduğunu və davam edən hərbi təlimləri xatırladıb. ABŞ vitse-prezidenti Cey D. Vensin rəsmi səfəri də bu görüşlərlə əlaqələndirilir.
ABŞ Ermənistanı kimə qarşi silahlandırır - Azərbaycana qarşı, yoxsa mümkün Rusiya-Ermənistan mühatibəsinə hazırlıq gedir?
"Düşünürəm ki, Nikol Paşinyanın ABŞ-dan V-BAT tipli döyüş dronları alındığını açıqlaması Cənubi Qafqazda yeni geosiyasi mərhələnin anonsudur. Bu addımı təkcə Ermənistanın “müdafiə qabiliyyətinin gücləndirilməsi” kimi təqdim etmək sadəlövhlük olardı. Qeyd edək ki, ABŞ-ın Ermənistanla hərbi əməkdaşlığı birmənalı olaraq Azərbaycana qarşı deyil. ABŞ regionda güc balansını və Azərbaycanın hərbi üstünlüyünü yaxşı anlayır və yeni müharibədə maraqlı deyil. Əsas hədəf Rusiyanın Cənubi Qafqazdakı təsir imkanlarının zəiflədilməsidir".
Bu fikirləri "Səs" qəzetinin baş redaktoru, siyasi ekspert Bəhruz Quliyev “Bakı-Xəbər” qəzetinin müxbiri ilə söhbətində deyib.
O bildirib ki, V-BAT dronlarının ABŞ-ın Xarici Hərbi Satış proqramı ilə verilməsi Ermənistanın tədricən Rusiya təhlükəsizlik orbitindən çıxarılması deməkdir. Bu proses KTMT-nin faktiki iflası və Moskva-İrəvan xəttində gərginliyin dərinləşməsi ilə müşayiət olunur.
ABŞ vitse-prezidentinin səfəri və birgə hərbi təlimlər Paşinyana verilən siyasi təminat xarakteri daşıyır. Lakin bu təminatlar Ermənistan üçün real təhlükəsizlik yox, növbəti geosiyasi risklər yaradır.
"Hesab edirəm ki, ABŞ Ermənistanı bu mərhələdə Azərbaycana qarşı deyil, Rusiyaya qarşı strateji alətə çevirməyə çalışır. Tarix isə göstərir ki, adətən böyük güclərin forpostuna çevrilən ölkələr sonda ən ağır bədəl ödəyən tərəf olur" - deyə ekspert əlavə edib.
Akif NƏSİRLİ
