Şakir Ağayev: "Bu nə vaxtsa sülh üçün təhlükəyə çevrilə bilər"
Ermənistanın Baş naziri Nikol Paşinyan və ABŞ-ın vitse-prezidenti Ceyms Devid Vens Ermənistan və ABŞ hökumətləri arasında nüvə enerjisinin dinc məqsədlərlə istifadəsi sahəsində əməkdaşlıq haqqında saziş üzrə danışıqları yekunlaşdıran birgə bəyanat imzalayıblar.
İrəvanda səfərdə olan Vens bildib ki, nüvə əməkdaşlığı praktiki səviyyəyə çatdıqdan sonra Amerika və Ermənistan şirkətləri tərəfindən gələcək layihələrin həyata keçirilməsi üçün imkanlar açılacaq.
"İlkin investisiya 5 milyard dollar, ikinci mərhələdə isə əlavə 4 milyard dollar olacaq. Bu, həm Ermənistan, həm də mənim ölkəm üçün enerji təhlükəsizliyi və dayanıqlılığı baxımından qarşılıqlı faydalı bir vəziyyətdir. Bundan əlavə, həm ABŞ-da, həm də Ermənistanda çoxsaylı iş yerləri yaradılacaq. Amerika texnologiyası Ermənistana gələcək - ölkəmiz nadir hallarda başqa bir ölkəyə müəyyən texnologiyalar ixrac etmək üçün bu qədər əmindir", - deyə Vens bildirdi.
Ermənistana tökülən milyardlarla sərmayə - sülh üçün təhlükıyə çevrilə bilərmi?
"Novoye vremya" qəzetinin baş redaktoru Şakir Ağayev baki-xeber.com-a bildirdi ki, dünən Paşinyan və Vensin görüşündə bir sıra məsələlər müzakirə olundu və nüvə əməkdaşlığına dair sənəd imzalandı. "Səhv etmirəmsə, ABŞ-ın Ermənistana ümumilikdə 9 milyard dollarllıq sərmayə qoymaq məqsədi var. Məsələ bundadır ki, bu 9 milyard dollarlıq sərmayə Ermənistana müasir PUA-ların, texnologiyaların ixracı ilə bağlıdır. Bu bir az da Ermənistanın regionda güclənməsinə qoyulan sərmayə kimi nəzərdə tutulub. Uzun illər təcavüzlə məşğul olmuş bir dövlətə son nəsil texnologiyaların, PUA cihazların alınması, nüvə elektrik stansiyasının tikintisi üçün bu qədər sərmayə qoyulması arzuedlən hal deyil. Ermənistanın və ermənilərin mahiyyətinin nə olduğunu biz azərbaycanlılar çox yaxşı bilirik. Fikrimcə, bu nə vaxtsa sülh üçün təhlükəyə çevrilə bilər. Birincisi, bu gün Ermənistana Paşinyan hakimiyyətidir, amma sabah kimlərin hakimiyyətə gələcəyi məlum deyil. Əgər Paşinyandan sonra hakimiyyətə revanşistlər gələrlərsə onlar indiki baş nazirdən fərqli düşüncədə olan insanlar olacaqlar. Bununla da yenidən Cənubi Qafqazda qeyri-sabitlik yaratmaq məqsədləri olarsa sözsüz ki, bu sülh üçün təhlükə yarada bilər".
Ş.Ağayevin fikrincə, Ermənistanla bu saziş imzalanmamışdan əvvəl onun qarşısına şərt qoyulmalı idi ki, Azərbaycanla sülh müqaviləsi imzalandıqdan sonra sözügedən vəsait bu ölkəyə yatırılsın, bu daha yaxşı olardı. "Amma çox təəssüf ki, belə olmadı. Bilirsiz ki, bundan əvvəl Avropa İttifaqı da Ermənistana milonlarla maliyyə vəsaiti yardım etdi. Bu gün də ABŞ-ın bu sərmayəsi gələcəkdə hansısa təhlükənin yaranması ehtimalını actual saxlayır. Güman edək ki, bu baş verməyəcək. Yenə də deyirəm, biz Ermənistanı və erməniləri yaxşı tanıyırıq. Bu səbəbdən də şübhələri inkar etmək olmaz"-deyə Ş.Ağayev qeyd etdi.
İradə SARIYEVA
