Akif Nağı: “Gözləmək olar ki, Vens qondarma qurumun ləğv olunduğunu onların yadına salsın”
Artıq tarixin gedər-gəlməzinə gömülən keçmiş qondarma rejiminin oyuncaq “prezidenti” Samvel Şahramanyanın 2023-cü ilin sentyabrında “imzaladığı fərman”la 2024-cü ilin yanvar ayının 1-dən “Artsax”ın mövcudluğu başa çatıb, saxta strukturların hamısının buraxılıb, vəzifələr ləğv edilib. Amma buna baxmayaraq yenə də onların tör-töküntüləri özlərini “vəzifə” sahibi kimi qələmə verərək, ölmüş “Arsaxın” adından danışır, müraciətlər edirlər. Özlərini Qarabağdan könüllü köçüb getmiş ermənilərin “rəhbəri” sayan bəzi qüvvələr hələ də təxribatlarından qalmırlar.
ABŞ-ın vitse-prezidenti Ceyms Devid Vensin hazırda İrəvanda rəsmi səfərdə olmasından sui-istifadə edən mövcudluğu başa çatan “Arsaxın” tör-töküntülərindən olan və özünü “parlament sədri” kimi qələmə verən Aşot Danielyan ona müraciət edib. A.Danelyanın Vensdən xahiş edib ki, Qarabağdan köçüb getmiş ermənilərin “təhlükəsiz qayıtmasını" mümkün etsin.
A.Danelyan iddia edib ki, Qarabağdan guya ermənilər zorla çıxarılıb və sair.
Məktubda yazır ki, guya “150 mindən çox erməni məcburi köçkünlük şəraitində yaşayır”. Onların guya “beynəlxalq səviyyədə təmin edilmiş təhlükəsizlik, ləyaqət və öz müqəddəratını təyinetmə şərtləri altında Qarabağa təhlükəsiz və daimi qayıtmaq hüququ var”.
Artıq silinmiş, yox olmuş “Artsax Parlamentinin” “sədri” kimi özünü qələmə verən bir şəxsin ABŞ vitse-prezidentinə açıq məktub yazıb ondan belə bir absurd istəkdə bulunması gülünc haldır.
Dediyimiz kimi, 2023-cü ildə qondarma rejimin "prezidenti" vəzifəsini yetinə yetirən adam "fərman" verdi və qondarma rejimi buraxdı, bütün "təsisatları" ləğv etdi.
Bu gün amerikalılar, daha dəqiq desək, Vens nə yaxşı onlardan soruşmur (lar) ki, bu nə müraciətir edirsiniz? Siz axı özünüzü buraxıbsınız. Özünü buraxan "qurum" adından necə müraciət oluna bilər?
Azad Vətən Partiyasının sədri Akif Nağı baki-xeber.com-a bildirdi ki, bu “kartdan” Ermənistanda müəyyən qüvvələr hələ istifadə edirlər, gələcəkdə də istifadə olunacaq. “İnsanlar düşünürlər ki, necə oldu ermənilər bir anlığa könüllü şəkildə Qarabağı tərk etdilər? Aydın məsələdir ki, onların əksəriyyəti cinayət içində idilər və cəzadan qorxduqları üçün getdilər. Digər tərəfdən də erməniləri Qarabağdan çıxmağa təhrik edənlər oldu ki, toplum şəklində Ermənistanda və yaxud digər yerlərdə yerləşdirilsinlər, onlardan Azərbaycana qarşı, eləcə də regionda situasiyanı nəzarətdə saxlamaq üçün istifadə etsinlər. Bu gün Paşinyan hakimiyyəti də görüntü yaradır ki, guya onların əleyhinədir, fəaliyyətlərini məhdudlaşdırmağa çalışır. Amma əslində bu Paşinyanın da maraq dairəsindədir. Paşinyan hakimiyyəti dəyişərsə onun yerinə gələnlər də bu kartdan Azərbaycana qarşı açıq şəkildə istifadə edəcəklər. Müəyyən beynəlxalq və regional təşkilatlar, Avropa Şurası, Avropa Parlament Assambelyası, ATƏT var. Onlar da məqam gözləyirlər ki, bu ermənilərdən Azərbaycana qarşı istifadə etsinlər. Məqsəd də burada Azərbaycana təsir etməkdir. Azərbaycan bunu bilir”.
A.Nağının sözlərinə görə, özünü “parlament sədri” kimi qələmə verən şəxsə rəsmi İrəvan özü şərait yaradıb ki, o, ABŞ-ın vitse-prezidentinə bu cür absurd məsələ ilə bağlı müraciət etsin. “Onlara şərait yaradırlar ki, bu müracəti etsin, mətbuat da bunu yaysın. Burada Rusiyanın da, İranın da marağı var. Onlar da bu məsələni körükləyirlər. Biz bunları bilirik, Azərbaycanın siyasi rəhbərliyi də bu yöndə tədbirlər görür.
Erməniləri həddən artıq yaxına buraxmaq olmaz. Onlar bizim humanistliyimizi başa düşmürlər”.
A.Nağının fikrincə, ola bilsin, indi Vens onların bu yalanına cavab verməyib, amma ehtimal ki, cavabsız qoymayacaq, yalanlarını üzlərinə vuracaq: “Gözləmək olar ki, Vens qondarma qurumun ləğv olunduğunu onların yadına salsın. ABŞ-da qondarma rejimin ləğv olunduğunu da, oyuncaq “prezidentin” verdiyi “fərmanı” da, ermənilərin Qarabağı tərk etdiyini də yaxşı bilirlər. Lazım olanda onu nəzərə alır, çox vaxt da nəzərə almırlar. Amma bütün hallarda ABŞ rəsmisi qondarma “parlament sədrinin” müraciətinin əsassız olduğunu onlara xatırlatmalı idi”-deyə A.Nağı bildirdi.
A.Nağı qeyd etdi ki, qondarma rejimin öz mövcudluğunu başa çatdırdığını ABŞ başda olmaqla bütün dünya ölkələri, beynəlxalq qurumlar yaxşı bilir.
İradə SARIYEVA
