İran ABŞ-a qarşı hərtərəfli müharibə planı hazırlayıb. Britaniyanın "The Telegraph" qəzeti yazır ki, İran hakimiyyətinə yaxın əlaqələri ilə tanınan "Tasnim" Xəbər Agentliyi tərəfindən dərc edilən plan, ABŞ hərbi hədəflərinə qarşı genişmiqyaslı hücumları nəzərdə tutur.
Plan, münaqişə baş verəcəyi təqdirdə, Yaxın Şərqdəki ABŞ hərbi bazalarına ballistik raketlər və dronlardan istifadə etməklə hücumları əhatə edir.
Hədəflərə Qətərdəki Əl-Udeid Hava Bazası, Küveytdəki Əli Əl-Salim Hava Bazası və Arifcan Düşərgəsi, Birləşmiş Ərəb Əmirliklərindəki obyektlər və Suriyadakı ABŞ bazası daxildir.
Qeyd edilir ki, İranın ssenarisində müharibə yalnız öz ərazisi ilə məhdudlaşmayacaq. Livan, Yəmən, İraq və Suriyada proksi qüvvələrin eyni vaxtda aktivləşdirilməsi də planda yer alır. Bundan başqa, “Hizbullah”ın İsrailə qarşı raket hücumları ilə cəbhəni genişləndirəcəyi ehtimal edilir.
Planın ən vacib aspektlərindən biri Hörmüz boğazı ilə bağlıdır. İran gərginlik yaranacağı təqdirdə boğazı bağlamaq, neft tankerlərinə hücum etmək və dəniz nəqliyyatını dayandırmaq seçimini özündə saxlayır. Ekspertlərin fikrincə, gündəlik təxminən 21 milyon barel neftin keçdiyi boğazın bağlanması qlobal enerji bazarlarına birbaşa təsir göstərəcək.
İranın planına kiber müharibə də daxildir. Nəqliyyat şəbəkələri, enerji infrastrukturu, maliyyə sistemləri və hərbi rabitə xətləri hədəf alınacaq. Məqsəd ABŞ-ın hərbi logistikasını və müttəfiq ölkələrdəki nizamını pozmaqdır.
İranın 5 mərhələli müharibə planı belədir: İran tərəfindən hazırlanan ssenaridə ilk addım ABŞ-ın hücumuna qarşı hərbi potensialın qorunmasını əhatə edir. İkinci mərhələ müharibəni ölkə xaricinə yaymaq və Yaxın Şərqdəki ABŞ bazalarını hədəf almağı əhatə edir. Üçüncü mərhələdə kiberhücumlar vasitəsilə ABŞ-ın enerji, nəqliyyat və maliyyə infrastrukturunu iflic vəziyyətinə salmaq planlaşdırılır. Dördüncü mərhələdə Hörmüz boğazı vasitəsilə qlobal neft ticarətinin pozulmasını hədəflənir. Son mərhələ isə ABŞ-ı və müttəfiqlərini çoxcəbhəli təzyiq vasitəsilə uzunmüddətli münaqişədən imtina etməyə məcbur etmək planlaşdırılır.
ABŞ əməliyyatları başlayacağı halda bölgədəki bazalar, hava məkanı və ya lojistik dəstək verən ölkələr "qanuni hədəflər" elan ediləcək.
Tahir TAĞIYEV
