Akif Nağı “Məqsədi odur ki, prosesi pozsun, Rusiyanın Ermənistana qarşı daha sərt mövqe göstərməsinə nail olsun”
Ermənistanın Baş naziri Nikol Paşinyanın Ermənistandan Azərbaycan və Türkiyə sərhədlərinə qədər dəmir yolu hissələrinin bərpası ilə bağlı Rusiyaya müraciət etdiyini və artıq bu məsələni Rusiya prezidenti Vladimir Putinlə, eləcə də iki ölkənin hökumət səviyyəsində müzakirə olunduğunu bildirməsi bu ölkənin siyasi dairələrində birmənalı birmənalı qarşılanmayıb.
Belə ki, Rusiya parlamentinin MDB İşləri Komitəsinin sədr müavini Konstantin Zatulin hesab edir ki, Ermənistanın baş naziri Nikol Paşinyan üçün problem halında “günahı başqasının üzərinə atmaq” məqsədilə Rusiyanı Ermənistandan Azərbaycan və Türkiyə sərhədlərinə qədər dəmir yolu hissələrinin bərpasına cəlb etmək vacibdir.
Zatulinin sözlərinə görə, ABŞ və Ermənistan arasında qismən açıqlanan müqavilələr göstərir ki,bu dəhliz boyunca tranzitdən qazanc əldə edəcək şirkətin 76%-i ABŞ-a, 24%-i isə Ermənistana məxsus olacaq: “Başqa heç kim bu işdə iştirak edə bilməz. Rusiya müəyyən funksiyalarda iştirak edə bilər, amma əlbəttə ki, bu şirkətin təsisçiləri və səhmdarları arasında ola bilməz. Bundan sonra Paşinyan Rusiyanın maraqlarını görməzdən gəlməsi ilə bağlı tənqidləri yayındırmaq üçün bir növ jest etməyə can atırdı. Ermənistan hər şeyə görə günahı Rusiyanın üzərinə atmaq istəyir; Moskvanın maraqları ilə maraqlanmır. Söhbət Azərbaycan və Türkiyəyə bitişik ərazilərdən gedir. Paşinyan Rusiyanı bu işlərə cəlb etmək istəyir ki, sonra hər yerdə Rusiyanın iştirak etdiyini iddia edə bilsin. Kobud desək, o, günahı Rusiyanın üzərinə atmaq istəyir. Bu, təxminən əvvəlcə Qarabağa dəvət edilən və sonra onun iştirakı faktiki olaraq nəzərə alınmayan sülhməramlı kontingentimizlə baş verənlərlə eynidir. Sadəcə başa düşməliyik ki, Paşinyan bizim maraqlarımıza uyğun hərəkət etmir; o, Qərblə müttəfiqliyə və dostluğa “stavka” edib. Gizli bir gündəmin olmamasını təmin etmək üçün onun təklifləri dəfələrlə təhlil edilməlidir”.
Zatulin niyə belə deyir? Dəmir yollarının bərpasında səhv nədir ki? Zatulin burada niyə qıcıqlanır, Rusiyanın dəmir yollarının bərpasında iştirakı niyə belə problemli təsəvvür olunur?
“Rusiyanın maraqlarını Zatulin sanki görmək istəmir”
Azad Vətən Partiyasının sədri Akif Nağı baki-xeber.com-a bildirdi ki, Paşinyanın Rusiyaya bu müraciəti Rusiyada birmənalı qarşılanmır. “Paşinyanın müraciəti ilə bağlı hakimiyyət dairələrində müəyyən fikirlər var, Putin özü də konkret şəkildə mövqeyini ortaya qoymur. Zatulin kimiləri də fürsətdən istifadə edib öz mövqelərini ortaya qoymağa, prosesə mane olmağa çalışırlar. Eyni zamanda”mən də varam” mövqeyindən çıxış edirilər və regionda sabitliyin pozulması üçün cəhdlər göstərirlər. Yəni Zatulin açıqlaması bundan xəbər verir.
Məsələnin mahiyyəti ondan ibarətdir ki, Ermənistanın dəmir yolları Rusiyanın ixtiyarındadır və Paşinyan o mövqedən çıxış edərək Rusiyadan dəmir yolunun bərpasını öz üzərinə götürməyi xahiş edir. Və bilir ki, Rusiya o xahişi yerinə yetirməyəcək. Bəlkə də məqsəd ondan ibarətdir ki, Rusiya Ermənistanın dəmir yolları üzərindəki hüquqlarından imtina etsin. Bu da ola bilər. Digər tərəfdən Paşinyan ikili siyasət yürüdür. Ermənistandan təxminən 70 faiz Qərblə münasibətlər qurur, 30 faiz isə Rusiya ilə münasibətləri saxlamağa çalışır. Ona görə də, bu Rusiya ilə münasibətləri saxlamağa yönəlik bir addımdır ki, Paşinyan bu “təşəbbüslə” Rusiyanın “könlünü” almağa çalışır. Yəni biz sizinlə hərəkət etmək istəyirik, bizim əldə edəcəyimiz gəlirdən sizə də pay düşə bilər, Rusiya tərəfində bu prosesdə iştirakını istəyirik. Təbii ki, Rusiya regionda Zəngəzur dəhlizi ilə bağlı prosesdən kənarda qalmaq istəmir, o istiqamətdə ayrı-ayrı vaxtlarda açıqlamalar verir”.
A.Nağı hesab edir ki, Paşinyanın bu hərəkəti. Bu mövqeyi həm də “biz Rusiyanın kənarda qalmasını istəmirik” məsələsinə xidmət edir. A.Nağının sözlərinə görə, baxmayaraq ki, artıq Amerika şirkətlərinə bununla bağlı işlər həvalə olunur, razılaşmalar var, keçən ilin 8 avqustunda imzalanan razılaşma mövcuddur. “Bu yaxınlarda ABŞ-ın yüksək səviyyəli heyəti Ermənistanda və Azərbaycanda oldular. Bu məsələ orada konkret şəkildə müzakirə olundu, hətta qeyd edilən kimi faizlər də vurğulandı. Zatulin də onu qeyd edir ki, bu dəhliz boyunca tranzitdən qazanc əldə edəcək şirkətin 76%-i ABŞ-a, 24%-i isə Ermənistana məxsus olacaq. Bu o qədər də rəsmi deyil, amma səsləndirilir. Bu məsələnin texniki cəhətdən də öz həllini tapdığını göstərir. Məsələ ABŞ-ın patronajlığı ilə həllini tapır. Amma Ermənistan xüsusilə də seçki ilində Rusiyanı da sərt şəkildə qıcıqlandırmaq istəmir. Ona görə də müəyyən jestlər edir. Zatulinin də məqsədi odur ki, prosesi pozsun, Rusiyanın Ermənistana qarşı daha sərt mövqe göstərməsinə nail olsun. Çünki Zatulinin Paşinyan hökumətinin özünə qarşı da şəxsi qərəzliyi var. Bunlar oradakı revanşist müxalifəti dəstəkləyirlərlər, onlarla daim əlaqələri var. Zatilinin Sarkisyan, Köçəryan hakimiyyəti dövründə mənfəəti də olub. Zatulin onların hakimiyyətə qayıtmasında maraqlıdır, onlara xidmət edir. Ona görə də məqam düşdükcə Paşinyan hökumətinə qarşı haqlı haqsız iradlarını bildirir. Dəmir yolu ilə bağlı da məntiqlə bu proses gedirsə, Orta Dəhliz və Zəngəzur dəhlizinin açılıb işə düşməsində Rusiyanın da qazancları olacaq, o da o prosesdə maraqlıdır, üstəlik, burada iştirak da etmək istəyir. Ona da Ermənistan bu müraciəti ilə etiraz etmək istəmir. Sadəcə olaraq, buradaRusiyanın maraqlarını Zatulin sanki görmək istəmir. Bu onun Paşinyan hakimiyyətinə mənfi münasibətinin göstəricisidir”-deyə A.Nağı bildirdi.
İradə SARIYEVA
