Qulamhüseyn Əlibəyli: “Sayın şişirdilməsi ermənilərin xəstə təfəkküründən və maddi maraqlardan irəli gəlir”
2025-ci il oktyabrın 30-na olan məlumata görə, Azərbaycanın Qarabağ bölgəsini könüllü olaraq tərk etmiş 21.916 nəfər Ermənistan Respublikası vətəndaşlığı almaq üçün müraciət edib. Bu barədə 2026-cı il dövlət büdcəsi layihəsinin müzakirəsi zamanı parlamentin daimi komissiyalarının birgə iclasında Ermənistanın daxili işlər naziri Arpine Sarkisyan məlumat verib.
Nazirin sözlərinə görə, onlardan 14.064 nəfər artıq vətəndaşlıq alıb.
Burada maraqlı olan məqam odur ki, 2023-cü ilin sentyabrında antiterror əməliyyatından sonra Ermənistan tərəfi ölkə sərhədini keçən Qarabağ ermənilərinin sayının120 min nəfər olduğunu israrla bəyan edirdi. O zaman bəs necə olur ki, iki il sonra həmin kütlənin yalnız altıda biri Ermənistanda qalmağa qərar verir? Faktiki, bununla dediklərini inkar edirlər.
“30 minə yaxın erməni Qarabağı tərk edib və onların bir hissəsi xarici ölkələrdə, qalanları isə Ermənistanda məskunlaşıb”
Sözügedən məsələni “Bakı-Xəbər”ə şərh edən sabiq millət vəkili, hüquqşünas Qulamhüseyn Əlibəylinin fikrincə, ermənilər özlərinə sərf edən hər şeyi şişirtməyə meylli bir xalq və dövlətdir: “Onlar çalışırlar ki, belə şişirtmə ilə həm özlərinin nüfuzunu, həm saylarını, həm də başqa siyasi məsələlərə təsir imkanlarını həddindən artıq genişləndirsinlər. Bu minvalla özlərini böyük bir xalq kimi göstərsinlər. Ona görə də vaxtilə Osmanlı imperiyasında dövlətə xəyanət etdiyinə görə köçürülmüş bir qrup ermənini “genosid qurbanı” elan etdilər. Saylarını isə, tədricən, zaman keçdikcə milyon yarıma qədər “artırdılar”. Hesab edirlər ki, guya böyük bir xalq olduqları üçün onların sayı da böyük olmalıdır. O cümlədən, keçmiş Dağlıq Qarabağdan könüllü köçən ermənilərin də sayını şişirtməyə başladılar. Bu, həm ermənilərin xəstə təfəkküründən irəli gəlir, həm də maddi maraqlardan. Onların niyyəti Qarabağdan köçən ermənilərin sayını şişirtməklə donor təşkilatlardan, başqa dövlətlərdən, beynəlxalq təşkilatlardan, hətta erməni diasporunun özündən daha çox pul qoparmaqdır. Hesab edirəm, buna da az-çox nail olublar. Çünki bir çox dövlətlər guya Qarabağ ermənilərinin vəziyyətini yaxşılaşdırmaq üçün onlara xeyli yardım göstərib. Qarabağdan köçən ermənilərin sayının şişirdilməsi həm də onunla əlaqədar idi ki, gələcəkdə Azərbaycana təsir imkanlarına malik olsunlar. Guya Azərbaycandan 120 min erməni köçüb və buna görə dünya bizə təzyiq göstərsin. Bu minvalla onların geri qayıtması üçün Azərbaycan tədbir görsün. Antiterror əməliyyatı zamanı Azərbaycanın rəsmi məlumatı ondan ibarət idi ki, 30 minə yaxın erməni Qarabağda qalıb. O baxımdan Ermənistanın daxili işlər naziri Arpine Sarkisyanın qeyd etdiyi rəqəmlər bu reallığa daha yaxındır. Yəni reallığı əks etdirən rəqəmlər hesab edirəm. Doğrudan da 30 minə yaxın erməni Qarabağı tərk edib və onların bir hissəsi xarici ölkələrdə, qalanları isə Ermənistanda məskunlaşıb. Onlar da Ermənistan vətəndaşlığını qəbul etmək istəyirlər. Bu, həm də o deməkdir ki, tək Ermənistan hakimiyyətinin yox, ermənilərin bütövlükdə dünya miqyasında apardığı siyasət də iflasa uğrayıb. Çünki onlar Qarabağ ermənilərinin təzədən geri qayıtmasını istəyirlər, müxtəlif tədbirlər keçirirlər. Hətta Avropa Parlamenti səviyyəsində çağırışlar səslənir. Ancaq Ermənistan daxili işlər nazirinin səsləndirdiyi rəqəmlər onu göstərir ki, Qarabağ erməniləri geri qayıtmaq yox, oranın vətəndaşı olmaq istəyirlər”.
Vidadi ORDAHALLI
