Mirkazım Seyidov: "Təzyiqləri neytrallaşdırmaq üçün belə bir addım atmalıdır"
Bu günlərdə MDB ölkələrinin təhlükəsizlik və xüsusi xidmət rəhbərləri ilə görüşən Belarus prezidenti Lukaşenko sensasiya sayıla biləcək fikirlər səsləndirmişdi:
"Azərbaycan və Ermənistan vaxtında deyilənləri etsəydilər, münaqişə ilə bağlı bugünkü vəziyyətləri yaşamazdılar. Paşinyan bu məsələdə günahkar deyil. Ona pis siyasi irs qalmışdı. Mən o zaman Əliyevlə Sarkisyanın arasında qalmışdım. O zaman üçün mümkün formada münaqişəni həll etməyi onlara tövsiyə edirdim. Qəbul etmədilər. Ermənistana yaxşı oldu? Yox. Heç Azərbaycan üçün də asan deyil"- deyə Lukaşenko kəşfiyyat rəhbərlərinin yanında bildirib. Gəlin, məsələyə indiki reallıqdan bir daha baxaq.
Qeyd edək ki, bir müddət əvvəl Rusiya Prezidenti Vladimir Putin də Paşinyanın başına sığal çəkən bir açıqlama verdi. Onun sözlərinə görə, Ermənistanda çətin daxili siyasi proseslər gedir:
"Ermənistanda Qarabağla bağlı çətin proseslər gedir. Qarabağdan imtina edən biz deyildik. Bu torpaqların Azərbaycanın bir hissəsi olduğunu Ermənistan tanıyıb. Bizə isə onların belə bir qərar verməyə hazırlaşdıqları məlumatı verilməyib. Düşünmürəm ki, Ermənistanın MDB, Avrasiya İqtisadi Əməkdaşlıq Təşkilatı və KTMT-dəki üzvlüyünə xitam vermək onun maraqlarına uyğundur. Bu, yenə də dövlətin seçimidir".
Böyük ehtimalla, həm Putin, həm də onun sadiq müttəfiqi olan Lukaşenko Paşinyanı dekabrın sonlarında Sankt-Peterbuqda keçiriləcək Avrasiya İqtisadi Birliyinin iclasında iştiraka aparmaq üçün belə açıqlamalar verirlər. Bilirlər ki, Paşinyanın həmin tədbirdə iştirakı onun Qərblə münasibətlərini korlaya bilər.
Müstəqil siyasətçi Mirkazım Seyidov "Bakı-Xəbər"ə açıqlamasında bildirdi ki,
Paşinyanın Qərbə "satılma", Rusiyaya "xidmət" oyunu davam edir:
"Ermənistan eyni vaxtda həm ABŞ-a, həm də Rusiyaya xidmət edib, öz maliyyə-iqtisadi və hərbi-siyasi maraqlarını reallaşdırmağa çalışır. Ancaq rəsmi İrəvanın bu "paralel manipulyasiya"sından ABŞ və Qərbin, yoxsa Rusiyanın daha çox faydalandığı yalnız hansı tərəfin daha sərt reaksiya verməsilə məlim ola bilər.
Maraqlıdır ki, bu nəhəng regional qarşıdurmada məhz Ermənistan geopolitik alət rolunu öz üzərinə götürüb. Rəsmi İrəvan ABŞ və Qərbin təlimatları və sifarişləri ilə israrla Ermənistanı Rusiyadan uzaqlaşdırma xətti tutub. Paşinyan hakimiyyəti hər imkanda Rusiyanı Ermənistanın bütün siyasi uğursuzluqlarında və hərbi məğlubiyyətlərində ittiham edir. Hətta Rusiyanın patronajlığı altında olan qurumların toplantılarını boykot etməyə üstünlük verir.
Rəsmi İrəvan Rusiyaya ardıcıl xəyanət mövqeyi tutsa da, Kreml Ermənistana münasibətdə maksimum səviyyədə tolerant davranmağa çalışır. Hər halda, Rusiya tərəfindən Ermənistana qarşı indiyə qədər hər hansı radikal və prinsipial addımlar atılmayıb. Onlar anlayır ki, Paşinyan sürüşkən adamdır, əlini buraxsalar və ya onu bir az qısnasalar Qərbin quçağına qaçmış olacaq. Bu səbəbdən də onu "tumarlamaqla" öz tərəflərinə çəkirlər. Bu baxımdan hesab etmək olar ki, Rusiya-Ermənistan gərginliyi böyük ölçüdə siyasi manipulyasiya xarakteri də daşıya bilər. Ermənistan eyni vaxtda hər iki düşmən düşərgəyə xidmət edib, öz maraqlarını reallaşdırmağa çalışdığını düşünmək olar. Paşinyan belə manevr etməyə məcburdur. Rusiyanın nəzarətində olan hansısa tədbirdə iştirak onu Qərbin gözündən sala bilər. Amma onun başqa yolu da qalmayıb. Çünki təzyiqləri neytrallaşdırmaq üçün belə bir addım atmalıdır".
Məhəmmədəli QƏRİBLİ
