Məhərrəm Zülfüqarlı: "Seçkidə resursları olmayan radikal müxalifət təmsilçiləri müxtəlif bəhanələrlə boykota əl atırlar"
Məlum olduğu kimi, dövlət başçısı İlham Əliyev dekabrın 7-də Azərbaycanda növbədənkənar Prezident seçkiləri elan edilməsi barədə Sərəncam imzalayıb. Sərəncamla 2024-cü il fevralın 7-də Azərbaycanda növbədənkənar Prezident seçkiləri keçiriləcək.
Yeni Azərbaycan Partiyası artıq prezidentliyə öz namizədini irəli sürdü. İlham Əliyevin prezidentliyə namizədliyi irəli sürüldü. YAP öz namizədi ilə bağlı mərkəzi seçki qərargahını formalaşdırdı. Qərargahın ilk iclası keçirildi və qərara gəldilər ki, Azərbaycanın bütün inzibati ərazi vahidlərinə uyğun ilk seçki qərargahları yaradılsın. Yəni seçki qərargahları yuxarıdan aşağı bütün ölkənin ərazisini, bütün ərazi vahidləri - şəhərləri, qəsəbələri, kəndləri əhatə edəcək. Ancaq qarşı tərəfdən, yəni müxalifətdən heç bir hərəkət hiss olunmur. Bax bu qədər erkən və detallı hazırlığın qabağında sabah müxalifətin bu seçki ilə bağlı hər hansı iradla çıxış etməyə mənəvi, siyasi haqqı olacaqmı?
"Halbuki, partiyanın fəaliyyəti varsa, mütləq seçkilərdə iştirak etməlidir və hansısa bəhanə ilə yayınmaq doğru deyil"
Sözügedən məsələyə aydınlıq gətirən AVCİYA-nın vitse-prezidenti, professor Məhərrəm Zülfüqarlı "Bakı-Xəbər"ə açıqlamasında belələrinin danışmağa mənəvi haqlarının olmadığını qeyd etdi: "Seçki kampaniyası belədir ki, bütün ölkə üzrə prezident seçkiləri keçirilir. Parlament seçkiləri olsaydı, bu, dairələr üzrə olardı. Prezident seçkilərində isə bütün dairələrdə namizəd qərargahları olur. Çünki hər bir namizədin hər bir dairədə, məntəqədə müşahidəçiləri olmalıdır. Ona görə də bu, böyük kampaniyadır. Yəni prezident seçkilərinin parlament və bələdiyyə seçkilərindən fərqi bundan ibarətdir ki, namizəd bütün ölkə üzrə kampaniya aparmalıdır. O üzdən, prezidentliyə namizədin böyük bir resursu olmalıdır. Həm insan, həm vaxt, həm də maddi resursu olmalıdır. Dünyada qəbul olunan seçki texnologiyası belədir ki, seçkiyə qatılan namizədin bu üç resursu olmalıdır. Bələdiyyə seçkilərində bu elə də çox deyil. Parlament seçkilərində bu bir qədər artıqdır. Prezident seçkiləri üçün bu, böyük kampaniyadır. Sözügedən resursları olmayan şəxsin buna qatılması ümumiyyətlə absurddur. İlham Əliyevin güclü kampaniya aparmaq üçün böyük resursları, imkanları var. İlham Əliyev əsas dünya liderləri ilə müqayisə olunan dövlət başçısıdır. Çünki qalib dövlətin baş komandanı kimi seçkiyə qatılır və böyük imicə malikdir. Digər tərəfdən, namizədliyini irəli sürmək hələ namizəd kimi seçkidə iştirak etmək demək deyil. Bunun üçün namizəd 40 min imza toplamalıdır. Bununla yanaşı, qeydiyyatdan keçən namizədin ölkə üzrə kampaniya aparmağa resursları olmalıdır. Təkcə 40 min imza kifayət etmir. Prezidentliyə namizədin arxasında on minlərlə insan olmalıdır. Ona görə də özünə hörmət edən şəxs, bu resursları yoxdursa namizədliyini irəli sürməməlidir. Seçkidə resursları olmayan radikal müxalifət təmsilçiləri müxtəlif bəhanələrlə boykota əl atırlar. Ona görə də danışa, ortaya arqument qoya bilmirlər. Halbuki, partiyanın fəaliyyəti varsa, mütləq seçkilərdə iştirak etməlidir. Hansısa bəhanə ilə yayınmaq doğru deyil. Çünki insanlar fəaliyyətlə o şəraiti yaratmalıdılar. Bizim radikal müxalifət təmsilçiləri isə ideal seçkidən dəm vururlar. Bu isə mümkün olan şey deyil. Fikrimcə, boykota gedən partiyaların heç birinin Azərbaycan üzrə güclü kampaniya aparmaq imkanları yoxdur".
Vidadi ORDAHALLI
