Abutalıb Səmədov: "Müxalifətin bir qrupunun seçkini boykot səbəbləri sadəcə bəhanədir"
Növbəti il fevralın 7-nə təyin olunan prezident seçkilərində iştirak edib-etməyənlər bəlli olmağa başlayır. Artıq dörd siyasi partiyanın növbədənkənar prezident seçkilərində iştirakı, iki partiyanınsa boykot qərarı aldığı məlumdur.
Müxalifətdə olan Milli Şura və REAL Partiyasının rəsmi qərarı hələ məlum deyil.
Ötən şənbə günü qurultay keçirən Azərbaycan Xalq Cəbhəsi Partiyası elan edib ki, növbədənkənar prezident seçkilərinə qatılmayacaq.
Ötən cümə günü Müsavat Partiyası da növbədənkənar prezident seçkilərini boykot qərarı alıb.
İqtidarda olan Yeni Azərbaycan Partiyasının sədri, hazırkı Prezident İlham Əliyev partiyanın qərarı ilə növbəti dəfə namizəd olacaq.
Bundan başqa, Böyük Quruluş Partiyasının sədri, deputat Fazil Mustafa və Sosial Tədqiqatlar Mərkəzinin rəhbəri, deputat Zahid Oruc da növbədənkənar prezident seçkilərində nəmizəd olacaqlarını açıqlayıblar.
Milli Cəbhə Partiyasının sədri, deputat Razi Nurullayevin və Böyük Azərbaycan Partiyasının sədri Elşad Musayevin də namizəd olacağı barədə məlumatlar yayılıb.
Göründüyü kimi, iki əsas müxalifət partiyası - Müsavat və AXCP seçkini boykotla bağlı qərar verdi. Onlar normal seçki mühitinin olmadığını əsas gətirirlər. Bu həqiqətən əsaslı arqumentdir, yoxsa onlar İlham Əliyevin real nüfuzundan qorxurlar? Onların boykotu seçkiyə qeyri-legetimlik qazandıra biləcəkmi?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, AXCP və Musavatın seçkilərdə iştirakdan imtina etmələri onların daha çox reallığı anlamaları ilə əlaqədardır: "Hər iki partiyanın liderləri dərk edirlər ki, onaların bu seçkilərdə heç bir qələbə şansları yoxdur. Bu, müxalifətin iddia etdiyi kimi, qeyri-demokratik seçki ilə əlaqədar deyil. Hər iki partiyanın ortaya çıxarmağa namizədi yoxdur. Seçkiləri boykot barədə qərar qəbul olundu. Hətta bu qərarı da son dərəcə istedadsız, səviyyəsiz tədbirlərlə qəbul etdilər. AXCP qurultay keçirdi və orda biz Əli Kərimlinin saxta, bəzən də gülməli çıxışına baxdıq. Musavatın tədbirində də təşkilatçılığın nə qədər aşağı olması göz qabağında idi. Heç olmasa boykotu siyasi partiyaya layiq səviyyədə reallaşdırmağı ortaya qoya bilərdilər, onu da bacarmadılar. Çünki istedad, qabiliyyət, savad yoxdur. Böyük siyasətçilər hər şeydən xal qazanmağı bacarmalıdırlar. Seçkidə iştirak edib öz potensiallarını ortaya qoyanda da udurlar, boykot barədə qərar qəbul edəndə də, elə edirlər ki, cəmiyyət real namizədin imtina etdiyini dərk edir. Ancaq AXCP lideri toy tamadaları kimi çıxış edir, səviyyəsiz arqumentlər gətirir. Hər cümləsindən saxtakarlıq, riyakarlıq tökülür. Sonra da elə təsəvvür yaratmağa çalışırlar ki, guya iki real potensialı olan partiya seçkidən imtina etdi. İmtina etməsələr də, ortaya çıxarmağa adam tapmayacaqdılar. 1992 - ci il seçkilərində Nizami Süleymanov iştirak etdi. İstedadı ortada idi və qısa müddətdə hamısını darmadağın etdi. Seçkini uddu, amma imkan vermədilər. Ola bilsin, Azərbaycanın da xeyrinə oldu o dövrdə AXCP - nin seçkini saxtalaşdırmağı. Ancaq ortada istedadlı, seçki kampaniyasiyanı aparmağı bacaran, əhalinin əhvalını hiss edən bir şəxsiyyət var idi. İndi elə biri yoxdur. Əgər səçkinin demokratik olacağına inanmırsansa da, qatıl, böyüklüyünü nümayiş etdir, partiyanı təbliğ et, hamı sənin gücünü görsün. Seçki kampaniyasi ciddi məhdudiyyətlər olanda belə, çox böyük meydandır. İki partiya bundan imtina etməsinin səbəbi aydındır. Ortaya çıxarmağa adamları yoxdur. Onların bu qərarı seçkilərin gedişatına təsir göstərə bilməz. Qərbdə o qurumlar ki, seçkini qeyri-demokratik hesab edir, onların rəyi çoxdan hazırdı. Nəyin baş verməsindən asılı olmayaraq, onların rəyi heç vaxt dəyişməyəcək. Ancaq reallıq bundan ibarətdir ki, bu seçkidə İlham Əliyevə qalib gəlmək qeyri-mümkündür. Dünya tarixinin ən böyük uğurlarına nail olan siyasətçini necə udmaq olar? İlham Əliyev iki yüz illik bəladan Azərbaycanı qurtardı. İndi də artıq bir neçə nəfər qatılmaq istəyini etiraf edib. Yəqin ki, onların sayı arta da bilər. Seçkilərin nəticəsi artıq hamıya məlumdur. Müxalifətin bir qrupunun seçkini boykot səbəbləri sadəcə bəhanədir. Onlar öz potensiallarını, güclərini bilirlər. Hər iki partiyanın seçkiqabağı necə kampaniya aparacağı barədə görüntünü biz onların tədbirlərindən aydın müşahidə etdik. Sönük, saxta, səviyyəsiz və insanlara heç bir enerji, ümid verməyən tədbirlər keçirdilər. Bu cür siyasətçilərlə heç bir ciddi nəticə əldə etmək olmaz. Onlar da bunu bildikləri üçün, seçkiyə getməmək barədə qərar qəbul etdilər".
Məhəmmədəli QƏRİBLİ
