Ceyhun Məmmədov: "Yeni Azərbaycan Partiyasının Prezident İlham Əliyevin namizədliyini irəli sürməsinin bir çox mühüm, ciddi, əsaslı səbəbləri var"
Məhərrəm Zülfüqarlı: "İlham Əliyevin həm ölkə daxilində, həm də beynəlxalq aləmdə nüfuzu çox yüksəkdir və bu da onun növbədənkənar Prezident seçkilərinə namizədliyinin irəli sürülməsini şərtləndirən amillərdəndir"
Yeni Azərbaycan Partiyası (YAP) tərəfindən İlham Əliyevin 7 fevral 2024-cü ildə keçiriləcək növbədənkənar prezident seçkilərinə namizədliyi irəli sürülüb və bununla bağlı qərar YAP İdarə Heyətinin genişləndirilmiş iclasında yekdilliklə qəbul edilib.
İlham Əliyevin rəsmən namizəd irəli sürülməsinin nə kimi siyasi, beynəlxalq əhəmiyyəti var?
YAP niyə məhz İlham Əliyevin namizədliyini irəli sürüb?
Millət vəkili Ceyhun Məmmədov baki-xeber.com-a açıqlamasında "Hesab edirəm ki, bu qərarın çox xüsusi əhəmiyyəti və önəmi var. Bu gün Azərbaycan elə bir mərhələyə daxil olub ki, indi bizim qələbəmizin daha da möhkəmləndirilməsi, daha da gücləndirilməsi kimi ciddi missiyalar var. Bu gün Azərbaycan heç zaman tarixdə olmadığı qədər güclüdür, biz torpaqlarımızı azad etmişik. Qələbəmizi daha da möhkəmləndirməliyik, dövlətçiliyimizi daha da gücləndirməliyik. Qeyd etdiyimiz kimi, ilk dəfə Azərbaycan bütün ərazilərində seçki keçirəcək. Bu gün həm regionda, həm də dünyada ciddi proseslər gedir. O baxımdan da belə bir qərarın qəbul edilməsi, addımın atılması, fikrimcə, çox mühüm idi"-deyə bildirdi.
C.Məmmədovun sözlərinə görə, eyni zamanda Azərbaycanda islahatların sürətləndirilməsi kimi mühüm vəzifələr də var. "Yeni Azərbaycan Partiyasının da Prezident İlham Əliyevin namizədliyini irəli sürməsinin bir çox mühüm, ciddi, əsaslı səbəbləri var. Bu səbəblər onu göstərir ki, bu seçkiləri həyata keçirmək lazımdır. Məhz Prezident İlham Əliyevin rəhbərliyi ilə 44 günlük müharibədə Azərbaycan qələbəsini təmin etdi, müstəqilliyini gücləndirdi, bütün ərazilərini azad etdi. 30 il ərzində Azərbaycan çox böyük bir inkişaf yolu keçdi. Bu mənada düşünürəm ki, bu tədbir olduqca önəmli və əhəmiyyətli bir tədbirdir, addımdır"-deyə millət vəkili qeyd etdi.
AVCİYA-nın vitse-prezidenti, siyasi şərhçi, seçki mütəxəssisi, professor Məhərrəm Zülfüqarlı bildirdi ki, YAP tərəfindən Prezidentin namizədliyinin verilməsinin daxili siyasi və beynəlxalq təsirləri böyükdür. M.Zülfüqarlı qeyd etdi ki, İlham Əliyevin rəhbərliyi ilə Azərbaycan dövlətinin ərazi bütövlüyü təmin edildi: "Bu gün Azərbaycan xalqının, eləcə də dünya azərbaycanlıların İlham Əliyevə etimadı tamdır. Ölkəmizdə əminamanlıqdır, sabitlik hökm sürür, əhalinin sosial rifah halının yüksəldilməsi istiqamətində saysız işlər görülüb. Prezident İlham Əliyevin rəhbərliyi ilə 44 günlük Vətən müharibəsində torpaqlarımız işğaldan azad olundu, artıq Azərbaycanın ərazi bütövlüyü təmin olunub.
Eyni zamanda Azərbaycan Cənubi Qafqazın aparıcı dövləti kimi dünya birliyində mövqelərini daha da möhkəmləndirib. Xüsusən də, 44 günlük müharibədən sonra Azərbaycanın nüfuzu beynəlxaq aləmdə çox yüksəlib. Bunlar hamısı İlham Əliyevin rəhbərliyi ilə baş verib. Bu baxımdan hesab edirəm ki, növbədənkənar Prezident seçkilərinə YAP tərəfindən İlham Əliyevin namizədliyinin irəli sürülməsinin həm daxili, həm də beynəlxalq əhəmiyyəti böyükdür".
M.Zülfüqarlının sözlərinə görə, İlham Əliyevin namizədliyinin YAP tərəfindən irəli sürülməsi tamamilə qanunauyğundur. "Əvvəla, bu gün İlham Əliyevin həm ölkə daxilində, həm də beynəlxalq aləmdə nüfuzu çox yüksəkdir və bu da onun növbədənkənar Prezident seçkilərinə namizədliyinin irəli sürülməsini şərtləndirən amillərdəndir. Prezident İlham Əliyev həm də YAP sədridir. Seçki də siyasi kampaniya olduğuna görə siyasi mahiyyət, yönüm daşıyır. Yəni liderin mənsub olduğu partiya tərəfindən namizədliyi irəli sürülməlidir. Əgər Prezident heç bir partiyanın üzvü olmasaydı, onun namizədliyini istənilən təşkilat, qurum irəli sürə bilərdi. İlham Əliyev Prezident seçiləndən sonra demişdi ki, mən bütün azərbaycanlıların Prezidentiyəm, təkcə Azərbaycan Respublikasının vətəndaşlarının yox, dünya azərbaycanlılarının hüquqlarını müdafiə edəcəm. Bir də demişdi ki, mənə səs verənlərin də, verməyənləri də Prezidentiyəm və hər kəsin hüquqlarını müdafiə edəcəm. Bu baxımdan, Yeni Azərbaycan Partiyası olmasaydı belə, İlham Əliyevin namizədliyi xalq tərəfindən, müxtəlif qurumlar tərəfindən irəli sürüləcəkdi. Hətta onun namizədliyi YAP tərəfindən irəli sürüldükdən sonra da bu mümkündür. Çünki İlham Əliyevə xalqın məhəbbəti böyükdür. Amma siyasi prosedurlar var, beynəlxalq təşkilatlar da bu siyasi prosedurları izləyirlər. Ona görə də YAP öz toplantısında prezidentliyə İlham Əliyevin namizədliyini irəli sürüb. Başqa qurumlar İlham Əliyevin namizədliyini irəli sürsəydi beynəlxalq təşkilatlar irad bildirərdi. Ona görə də, birinci bu siyasi mənsubiyyət əsasında olur. Dünyada az liderlər olar ki, İlham Əliyevlə müqayisəyə gələ bilsin. Dünya ölkələrinin rəhbərləri arasında çox böyük reytinqə malik bir prezidentdir. Bu baxımdan da 7 fevral seçkilərində onun uğur qazanacağı şübhəsizdir"-deyə M. Zülfüqarlı qeyd etdi.
İradə SARIYEVA
