Şəmsəddin Əliyev: "Məhkəmənin qərarını gözləmədən belə rəylərin verilməsi qərəzli mövqedən xəbər verir"
Müsavat Partiyasının üzvü Tofiq Yaqublu saxlanılıb. Bu barədə onun qızı Nigar Həzi məlumat yayıb. DİN-in Mətbuat xidmətinin əməkdaşı İbrahim Əmiraslanlı Yaqublunun həbsini təsdiq edib.
Nazirlik rəsmisi qeyd edib ki, hazırda araşdırma aparılır. Tofiq Yaqublu dələduzluqda ittiham edilir. Bu baradə onun qızı Nigar Həzi atasının vəkili Aqil Layıca istinadən məlumat yayıb.
Qeyd edək ki, bundan əvvəl "Abzas Media"nın jurnalistləri, ardınca Hafiz Babalı da həbs edilib. Onlar qaçaqmalçılıqda ittiham olunurlar. Elan olunan ittihamlar siyasi deyil, iqtisadi mahiyyətlidir və əsasən ölkəyə qaçaq yolla pul gətirməklə bağlıdır. Ancaq nədənsə, Qərb dairələri bunu tam siyasiləşdirməyə çalışır. İqtisadi yönlü cinayət konkret sübut tələb edir. Belə sübutlar olmasa, hüquq-mühafizə orqanları bu cür tanınmış şəxsləri əsassız olaraq saxlayarmı?
Hüquqşünas Şəmsəddin Əliyev "Bakı-Xəbər"-ə açıqlamasında bildirdi ki, Azərbaycan Respublikası Cinayət Məcəlləsi ilə və cəza təhdidi altında qadağan olunmuş ictimai təhlükəli əməlin törədilməsi cinayət sayılır: "Cinayətin meydana gəlməsi, əməlin cinayət sayılması üçün 4 əlamət çox mühüm əhəmiyyət kəsb edir. Burda cinayəti törədən varlıq subyekt olmalıdır, o subyektin öz əməlinə olan psixi münasibəti olmalıdır. Cinayətin yönəldiyi obyekt və cinayətin törədilməsi üçün obyektiv cəhət mühüm rol oynayır. Bu 4 əlamətdən biri yoxdursa, cinayət yoxdur. Hazırkı məqamda Azərbaycan vətəndaşlarının müəyyən ictimai təhlükəli əməllərə görə cinayət məsuliyyətinə cəlb olunması və onların istintaqının davam etdirilməsi üçün həbs qətimkan tədbirinin seçilməsi müəmmalı deyil. Mən belə başa düşürəm ki, onlar şübhəli şəxs qismində saxlanmayıblar. Əgər məhkəmənin sanksiyası yoxdursa, onların saxlanması 48 saatdan çox çəkə bilməz, sonra onlar sərbəst buraxılmalıdır. Amma görünür, onların əməlində cinayət işinin başlanmasına kifayət qədər əsas olduğundan, onlar barəsində həbs qətimkan tədbiri görülüb. İstintaqın hansı maddə ilə başlanması, davam etməsi, hansı prosesual addımların atılması əvvəlcədən bəlli deyil. Burada istintaqın da gedişinə, onun prosessual davam etməsinə toxunmaq istəmirəm. Çünki burda kifayət qədər istintaq sirri ola bilər. Əgər başqa mövqe sərgiləsək, versiyalar düzgün olmaya bilər və istintaqı normal məcrasından yayındıra bilərik. Ona görə də, nə qədər ki, istintaq orqanları bu sahədə ictimaiyyətə ətraflı məlumat vermirlər, kiminsə müəyyən mənada şərh verməsi arzuolunan deyil. Mən düşünürəm ki, burada cəmiyyətə bəlli olan faktorlar olduğuna görə, mənim də hüquqşunas kimi hər hansı mövqe bildirməm mümkün deyil. Ona görə də, əgər orda ictimai təhlükəli əməl, dediyim kriteriyalar, subyekt, obyekt və obyektiv cəhət varsa, təbii ki, cinayətin istintaqına və onun davam etməsinə imkan yaranır.
Qərb dairələri və onlara bağlı olan şəbəkənin bu həbsləri siyasiləşdirməsi, yanlış bəyanatlar verməsi istintaqın işinə birbaşa müdaxilədir. Məhkəmənin qərarını gözləmədən belə rəylərin verilməsi qərəzli mövqedən xəbər verir. Bu qədər tanınmış adamları heç bir əsas olmadan tutmaq da mümkün deyil. Belə olarsa, istintaq orqanı özünü nüfuzdan salmış olar".
Məhəmmədəli QƏRİBLİ
