Bakıda Azərbaycan və Türkiyənin xarici işlər nazirləri Ceyhun Bayramovla Hakan Fidanın təkbətək görüşü olub. Bu barədə Xarici İşlər Nazirliyi məlumat yayıb.
Görüşün ardından verdiyi açıqlamada Ceyhun Bayramov "Biz Hakan bəylə hər bir fürsətdən istifadə edərək, beynəlxalq tədbirlər çərçivəsində müzakirələr aparırıq, telefon danışıqları baş tutur. Bugünkü səfər Azərbaycan və Türkiyə arasında gündəliyin nə qədər zəngin olmasının göstəricisidir" deyərək bildirib ki, bu il Azərbaycan-Türkiyə münasibətlərində zəngin bir il olub.
"Şuşa bəyannaməsi ilə strateji müttəfiqlik səviyyəsinə yüksələn əməkdaşlığmız dünyada bir nümunədir", - deyə nazir əlavə edib.
Nazir bildirib ki, bugünkü görüşdə ikitərəfli münasibətlərlə yanaşı, beynəlxalq təşkilatlar çərçivəsində əməkdaşlq məsələləri müzakirə edilib:
"Eyni zamanda, region ölkələri ilə üçtərəfli və dördtərəfli formatda əməkdaşlıq məsələlərini müzakirə etdik. Yaxın aylar ərzində bir neçə üçtərəfli formatda görüşlərimizin keçirilməsi planlaşdırılır", - deyə o əlavə edib.
Nazir Bayramov bildirib ki, Azərbaycanın və Türkiyənin regionda sülh və sabitliyin təmin olunması ilə bağlı mövqeləri eynidir. "Düşünürük ki, Ermənistan tərəfi də eyni fikirlə addımlar atacaq. Belə olan təqdirdə, müsbət nəticələr əldə etmək olar" – o deyib.
Ötən həftə Azərbaycan Prezident Administrasiyası və Ermənistan baş nazirnin ofisi tərəfindən verilən birgə bəyanatı etimad mövcudluğu istiqamətində ciddi naliyyət adlandıran
Ceyhun Bayramov deyib ki, sərhədlərin delimitasiyasının müzakirəsi, əsirlərin dəyişdirilməsi də bu istiqamətdə atılan vacib addımlardır.
"Noyabr ayının sonunda biz 70 günlük fasilədən sonra nəhayət ki, Ermənistandan sülh müqaviləsi ilə bağlı növbəti təkliflər paketini qəbul etmişdik. Təbii ki, mən onun mahiyyətinə varmaq istəməzdim. Hazırda onun üzərində iş gedir. Qısa olaraq onu qeyd etmək istərdim ki, bu sənədlər paketinə, bu təkliflər paketinə nəzər salanda görürük ki, bundan öncə təklif olunan təkliflər paketinin birə-bir təkrarlanması deyil. Burada bəlli bir müsbət irəliləyiş müşahidə olunur. Bütün bu faktorları biz nəzərə alaraq bir nikbinlik var, ancaq eyni zamanda burada mən hər hansı bir vaxt səsləndirmək istəməzdim. Hesab edirik ki, bu addımlarla biz çox vacib, çox mürəkkəb məsələni, neqativ tarixi keçmişi olan bir məsələni addım-addım irəli apara bilərik. Azərbaycan tərəfinin yanaşması burada aydındır, biz dəfələrlə bəyan etmişik. Ermənistan yalnız öz istəklərini deyil, Azərbaycanın legitim maraqlarını, tarixi ədaləti və beynəlxalq hüquqa hörmət etməyi sərgiləyərsə düşünürəm ki, müsbət nəticələr əldə etmək mümkündür", - deyə nazir əlavə edib.
İrəvanın sərhəddə qoşunların geri çəkilməsi təklifini qəbuledilməz adlandıran
Ceyhun Bayramov bildirib ki, danışıqlar zamanı müzakirə edilən məsələlərdən hər hansı bir elementi çıxararaq xüsusilə təqdim etmək çaşqınlıq yaradır.
"Ermənistan sərhədləri ilə bağlı açıq suallar var, tam razılıq olmadığı halda qoşunların geri çəkilməsi mümkünsüzdür, kim zəmanət verə bilər həmin ərazilərin təhlükəsizliyinə? Qoşunlar geri çəkilsin fikri qəbul edilən deyil. Bu gün Azərbaycan ordusu sərhədlərimizi qoruyur. Növbəti məqam ondan ibarətdir ki, Azərbaycan ordusu kiminsə istəyi və ya dəvəti ilə gəlməyib, 30 illik işğaldan sonra öz torpaqlarını işaldan azad edib və sərhədlərini qoruyur. Digər bir məqam ondan ibarətdir ki, Azərbaycan sərhədləri yalnız Azərbaycan əsgərləri tərəfindən qoruna bilər, üçüncü tərəfə həvalə edilmə biməz. Azərbaycanın bu prinsipal mövqeyi Ermənistan tərəfinə yaxşı məlumdur. Yaxşı olardı ki, Ermənistan bizim tkliflərimizə konstruktiv yanaşsın və belə olan halda müsbət nəticələr əldə etmək mümkün olar", - deyə nazir əlavə edib.
"Ümummilli lider Heydər Əliyevi hörmət və ehtiramla yad edirik. Onun liderliyi və vizyonu Azərbaycana bu gün hər kəsin qibtə etdiyi yolu açıb. Azərbaycan Prezidenti İlham Əliyevin də Qarabağ zəfərindəki liderliyi başda olmaq üzrə Azərbaycan və Türk dünyası üçün etdikləri ilə adını tarixə yazıb", - deyən Türkiyə xarici işlər naziri bildirib ki, Türkiyə-Azərbaycan münasibətlərini hər sahədə daha da qüvvətləndirmək xalqlarımıza qarşı ortaq məsuliyyətimizdir:
"Hər şeydən əvvəl kommunikasiya və enerji xətləri baxımından təhlükəsizlik çox önəmlidir. Qars-Naxçıvan dəmir yolu ilə bağlı niyyət protokolu Türkiyə Prezidentinin Naxçıvana səfəri zamanı imzalanıb. Bu layihəni ən qısa zamanda həyata keçirmək niyyətindəyik. Xəzər neftinin TANAP vasitəsilə Türkiyəyə, oradan isə Avropaya ötürülməsi strategiyamızın əsas ünsürlərindən biridir".
Hazırda regionda sülh üçün tarixi fürsət yarandığını ifadə edən türkiyəli nazir "Bu fürsət çox güclənib. Bütün tərəflər sülh və sabitlik üçün çalışmalıdır. Təəssüf ki, Qərbdə olan erməni diasporu erməni xalqını istismar edib bəzi ölkələri Azərbaycana qarşı qoyur. Bunlarla məşğul olmaq yerinə erməni xalqının qonşuları ilə normal münasibətlər qurması üçün eneerji sərf etmələri daha yaxşı olar.
44 günlük müharibədən sonra bölgə üçün yeni imkanlar yaranıb. Sülhün olduğu Cənubi Qafqaz hər kəs üçün vacibdir. Regiondan kənar bütün faktorlarda regiondakı balansa uyğun olan və normallaşma prosesinə təşviq edən siyasət yürütməlidirlər.
Azərbaycan-Ermənistan arasındakı son razılaşmanı da yüksək qiymətləndiririk. Bu cür qərarların davam etməsini arzu edirik.
Biz bölgədə sülh və sabitliyə çox yaxınıq. Bu istiqamətdə Azərbaycanla əlaqələrimizi yaxından davam etdirəcəyik", - deyə bildirib.
Sərhədlərin açılmasından danışan Hakan Fidan qeyd edib ki, Türkiyə Azərbaycanın haqlı davasında yanında duraraq, Azərbaycanın ərazi bütövlüyünü dəstəklədi.
"Bundan sonrakı dövr sülhlə regionda sabitliyin başlanğıcı olmalıdır. Türkiyə olaraq regionda davaya, qarşıdurmaya gərək qalmadığını düşünürük. Bundan sonrakı yol sülhlə davam etdirilməlidir. Azərbaycan və Ermənistan arasında normallaşma olduğu zaman Türkiyə ilə də Ermənistan arasında normallaşma olacaq.
Biz Azərbaycanla Ermənistan arasında normallaşma yönündə müzakirələri dəstəkləyirik və bu sahədə üzərimizə düşən hansı vəzifələr varsa, yerinə yetirməyə hazırıq. Bəzi ölkələrin yanlış yanaşmalarına qarşı da mövqeyimizi ortaya qoyuruq",- deyə nazir əlavə edib.
Nazir deyib ki, Türkiyə və Ermənistan arasında sərhədlərin açılması mövzusunda Azərbaycanla koordinasiyalı hərəkət edirik. O qeyd edib ki, Azərbaycan və Ermənistan arasında davam edən sülh danışıqlarına uyğun qərar verəcəyik. Orta dəhlizdən bəhs edən nazir bildirib ki, burada çox böyük potensial var.
"Orta dəhlizin tam potensialı ilə həyata keçirilməsi çox önəmlidir. Region ölkələrinin uzun müddətdən sonra ilk dəfə bu qədər önəmli inkişaf layihələrini diqqət mərkəzinə qoymaları və bunun üzərində əməkdaşlıq qurmaları mühim addımdır", - deyə H.Fidan əlavə edib.
