İl başa çatmaq üzrədir və ilin sonunda hər kəs istəyir ki, xoş sürprizlə qarşılaşsın. Əfv ediləcəkləri günü gözləyən məhkumlar da xoş xəbər arzulayanlardandır.
Məlumdur ki, Prezident İlham Əliyevin sərəncamı ilə 2023-cü il "Heydər Əliyev İli" élan edilib. "Heydər Əliyev İli" artıq sona yaxınlaşır, eyni zamanda həm ilin sonudur, həm də Dünya azərbaycanlılarının həmrəyliyi gününə az qalıb. "Heydər Əliyev ili"nin sona yaxınlaşması və Heydər Əliyevin özü tərəfindən elan olunmuş Dünya Azərbaycanlılarının Həmrəylik Günü münasibəti ilə Azərbaycanda əfv sərəncamının verilməsi necə olar? Prezidentin yeni əfv sərəncamı verməsi gözləniləndirmi? Əfv sərəncamının imzalanmasına ehtiyac var, ya yoxdur?
Sahib Məmmədov: "Ehtimal etmirəm..."
Müstəqil ekspert Sahib Məmmədov "Bakı-Xəbər"ə şərhində bildirdi ki, ilin sonunda əfv olacağını ehtimal etmir. "Bu ilin 8 may tarixində məhkum edilmiş bir sıra şəxslərin Azərbaycan xalqının Ümummilli Lideri Heydər Əliyevin 100 illik yubileyi münasibətilə əfv olunması haqqında Prezident Sərəncam imzalayıb. Sərəncama əsasən 801 məhkum əfv olunub, onlardan 463 şəxs azadlıqdan məhrumetmə cəzasından, 220 şəxs azadlıqdan məhrumetmə cəzasının çəkilməmiş hissəsinin yarısından, 118 nəfər azadlıqdan məhrumetmə ilə bağlı olmayan digər cəzalardan (azadlığın məhdudlaşdırılması, islah işləri, cərimə cəzaları və cəzaya şərti məhkum edilmiş şəxslər) azad ediliblər. Heydər Əliyevcin 100 illiyi ilə bağlı imzalanan sərəncam çox böyük əfv sərəncamı idi. Sizin sualınıza cavab olaraq deyim ki, "Heydər Əliyev İli" və Heydər Əliyevin 100 illiyi ilə bağlı əfv sərəncamı artıq bir neçə ay əvvəl verilib. İlin sonunda əfv sərəncamının olmasını, açığı, gözləmirəm. Çünki bu proses hazırlıq tələb edir. Prezidentin özünün müstəsna səlahiyyəti olsa da, özünün yaratdığı Əfv Komissiyasının təklifləri və tövsiyələri də nəzərə alınır. Amma o komissiyanın fəallığını görmürəm. Bu baxımdan, ehtimal etmirəm ki, ilin sonunda əfv ola bilər. Sizin sualınıza ən dəqiq Əfv Komissiyasının üzvü olan şəxslər cavab verə bilər"-deyə S.Məmmədov qeyd etdi.
Əliməmməd Nuriyev: "Növbəti əfv sərəncamının yaxın vaxtlarda verilməsi ehtimalını yüksək qiymətləndirmirəm"
Əfv Komissiyasının üzvü Əliməmməd Nuriyev də "Bakı-Xəbər"ə açıqlamasında ilin sonunda əfvin gözlənilmədiyini qeyd etdi. "Əfv sərəncamına ehtiyac var, yoxsa yoxdur? Əlbəttə, bu, cənab Prezidentin səlahiyyətləri daxilindədir. Onun konstision hüququdur və nə zaman əfv sərəncamı verməsi ilə bağlı özü qərar qəbul edir. Çünki bu bölünməz hüquqdur. İkinci tərəfdən, ulu öndər Heydər Əliyevin anadan olmasının 100 illiyi münasibətilə artıq əfv sərəncamı olub. Bu da əfv tarixinin ən böyük sərəncamlarından biri idi və bu 800-dən artıq şəxsə şamil edildi. Ona görə də, qısa bir müddət keçəndən sonra növbəti əfv sərəncamının olmasını az ehtimal edirəm. Azərbaycanda əfv sərəncamları (əgər mühüm hadisələrin yubileyi olmursa) bir qayda olaraq Novruz bayramı ərəfəsində olur. Sərəncamların xronologiyasına baxsaq bunu görmək mümkündür"-deyən Ə.Nuriyev qeyd etdi ki, hazırda ölkədə növbədənkənar prezident seçkilərinə hazırlıq gedir və bütün ölkə, qurumlar bu istiqamətdə köklənib. O bildirdi ki, Azərbaycan bütövlükdə Cənubi Qafqaza, Yaxın Şərqə təsir göstərə biləcək böyük siyasi bir hadisəni həyata keçirmək ərəfəsindədir. "Ona görə də ölkədaxili və ölkəxarici diqqətlər bu məsələyə yönəlib, bütün resurslar bu bucaq altında qurulub. Digər tərəfdən, Əfv Komissiyası üzvlərinin böyük əksəriyyəti dövlət qurumlarında çalışan yüksək vəzifəli şəxslərdir. Təsəvvür edin ki, bir tərəfdə Əfv Komissiyasının iclası, digər tərəfdə də belə böyük siyasi hadisəyə hazırlıq prosesi gedir. Bu bir az məntiqdən uzaq olan bir məsələdir. Ona görə də əfvin olcağını düşünmürəm. Qeyd etdiyim faktorlara görə növbəti əfv sərəncamının yaxın vaxtlarda verilməsi ehtimalını yüksək qiymətləndirmirəm"-deyə Ə.Nuriyev qeyd etdi.
Novella Cəfəroğlu: "Biz yenə də siyahı təqdim etmişik, amma hələ ki, əfv məsələsi gündəmdə yoxdur"
Hüquq müdafiəçisi və Dilarə Əliyeva adına Azərbaycan Qadın Hüquqlarını Müdafiə Cəmiyyətinin sədri Novella Cəfəroğlu isə "Bakı-Xəbər"ə bildirdi ki, təmsil etdiyi monitorinq qrupu 5 təşkilatdan ibarətdir və hər il hazırladıqları siyahılar Əfv Komissiyasına təqdim edilir. "Biz yenə də siyahı təqdim etmişik, amma hələ ki, əfv məsələsi gündəmdə yoxdur. Düşünürəm ki, növbədənkənar prezident seçkilərindən sonra, Novruz bayramı ərəfəsində böyük əfv və aministiya ola bilər.
Amma bizi daha çox narahat edən bu bir ayın içində jurnalistlərin, əsas da qadin jurnalistlərin, bir də Musavat başqanı Arif Hacilının oğlu Orxanın həbsidir. Biz bu işin içində olduğumuz üçün bilirik. Heç bir günahı olmayan bu gəncin həbsi bizləri çox sarsıdıb. Biz istəyirik ki, bu insanlara, xanımlara ev cəzası verilsin, Orxanı da azad etsinlər. Çünki bu gənc haqda hec bir sənəd ortalığa çıxmayb. Çox istəyirik əfv olsun, ən birinci bütün jurnalistlər və siyasi motivlə həbs olanların hamısı azad olunsun! Bununla da bizim canımiz beynəlxalq təşkilatlardan, onların hər dəfə bizə dediyi "soz azadlığı", "siyasi məhbus" məsələsindən qurtarsın. Baxmayaraq ki, onların yaşadıqları ölkələrdə də bu situasiya var" - deyə N.Cəfəroğlu bildirdi.
Əli TURABOV
