Şəmsəddin Əliyev: "Ekologiyamıza, təbii sərvətlərimizə dəyən ziyana görə həmin şirkətlər cərimə olunmalıdır"
Prezident İlham Əliyev ADA Universitetində keçirilən "Qarabağ: 30 ildən sonra evə dönüş. Nailiyyətlər və çətinliklər" Forumunda işğal dövründə qanunsuz fəaliyyətlə məşğul olan xarici şirkətlərin işinin diqqət mərkəzində olduğunu xüsusi qeyd etdi:
"İşğal olunmuş ərazilərdə qeyri-qanuni fəaliyyət göstərən şirkətlərlə bağlı hüquqi prosedurlar İkinci Qarabağ müharibəsi başa çatdıqdan dərhal sonra başlanıb. Xüsusilə mədənçilik, qızıl və digər qiymətli metalların hasilatı ilə məşğul olan şirkətlərlə bağlı prosedurları nəzərdə tuturam. Məlumdur ki, hüquqi proseslər kifayət qədər vaxt aparır. Amma təbii sərvətlərimizi qanunsuz şəkildə mənimsəyənlərin məsuliyyətə cəlb edilməsi üçün artıq üç ilə yaxındır ki, müxtəlif hüquq şirkətləri ilə fəal iş aparırıq. Oradakı zavodların sahibləri yalnız yerli separatçı liderlər deyil, habelə müxtəlif ölkələrdəki erməni diasporunun nümayəndələri idilər. Onlar məsuliyyətə cəlb olunmalıdırlar. Prosesin uzanacağını başa düşürük, lakin eyni zamanda, onları təqib etməyə davam edirik".
Burada diqqəti çəkən məqam disporu təmsil edən ermənilərlə bağlı hüquqi prosedurların həyata keçirilməsidir. Xüsusilə də diaspor erməniləri ilə bağlı hansı tip cəza tədbirləri hüquqi olaraq mümkündür? Yəni onların cərimələnməsi, həbsi mümkündürmü? Məsələ ondadır ki, yerli ermənilərin iqtisadi baxımdan ora srmayə qoymaq imkanı yox idi. Məhz varlı diaspor erməniləri bu qanunsuz işləri görürdü. O baxımdan diasporda olan imkanlı erməniləri cəzalandırmağın Azərbaycan tərəfindən hüquqi olaraq hansı formaları mümkündür?
"Beynəlxalq müqavilələrin tələblərinə uyğun həmin şəxslərin məsuliyyətə cəlb olunması mümkündür"
Sözügedən məsələyə aydınlıq gətirən hüquqşünas Şəmsəddin Əliyev "Bakı-Xəbər"ə açıqlamasında bununla bağlı bir sıra məqamlara toxundu: "Bu, çox mürrəkkəb və ağrılı məsələdir. Azərbaycan Respublikası Cinayət Məcəlləsinin tələblərinə görə, ölkəmizin ərazisində cinayət və qanunsuz əməllər törədən şəxslər bizim qanunlara müvafiq olaraq cinayət məsuliyyətinə cəlb olunmalıdır. Elə qüvvədə olan Cinayət Məcəlləsinə görə müvafiq işlər görülməlidir. Bu baxımdan uzun müddət işğal altında olan Azərbaycan ərazilərində erməni havadarlarının dəstəyi ilə diaspor təmsilçiləri yeraltı sərvətlərimizi talan ediblər. Özü də bunu kifayət qədər böyük ziyanla həyata keçiriblər. O üzdən, beynəlxalq müqavilələrin tələblərinə uyğun həmin şəxslərin məsuliyyətə cəlb olunması mümkündür. Həmin şirkət təmsilçiləri Azərbaycana ekstradisiya olunmalıdır. Bəli, bu çox çətindir, amma mümkündür. Əsas odur ki, həmin diaspor təmsilçilərinin yaşadıqları ölkələrin rəsmi qurumları məsələyə siyasi don geydirməsinlər. Burada hansısa siyasi motiv axtarmasınlar. Buna baxmayaraq, qüvvədə olan Cinayət Məcəlləsinə uyğun olaraq prossesual addımlar atmalıyıq. Onları müvafiq dövlətlərdən tələb etməliyik. Ekologiyamıza, təbii sərvətlərimizə dəyən ziyana görə həmin şirkətlər cərimə olunmalıdır. Prezident də qeyd etdi ki, işğal olunmuş ərazilərdə qeyri-qanuni fəaliyyət göstərən şirkətlərlə bağlı hüquqi prosedurlar davam edir. Əvvəl-axır bu istiqamətdə görülən işlər öz nəticəsini verəcək".
Vidadi ORDAHALLI
