Bünyamin Qəmbərli: "Əks halda, Ermənistan problemlər içində əzilib məhv olacaq"
Qarabağ məsələsi bəzi qüvvələr tərəfindən Ermənistanda dövlət yaradılmasının qarşısını almaq üçün istifadə edilib. Bu sözləri Ermənistan Baş naziri Nikol Paşinyan "Mülki müqavilə" partiyasının İcevanda keçirilən iclası zamanı deyib:
"Başqa sözlə, biz dövlət yaratmaq üçün qoymalı olduğumuz bütün resurslarımızı həll olunması mümkün olmayan "dqr"in yaradılması probleminə qoyuruq".
Onun sözlərinə görə, illərdir onlara deyirmişlər ki, yol, məktəb, xəstəxana tikməyin:
"Hətta deyirdilər: "Ordu nəyə lazımdır? Sizin arxanızda biz durmuşuq. Nə probleminiz var?" Nəticədə biz öz resurslarımızı həll edilməyən problemə xərclədik".
Nikol Paşinyan ad çəkməsə də, Rusiyanı nəzərdə tutduğuna eyham vurub. Bunu səmimi etiraf və Ermənistanın utopik fikirdən tam əl çəkməsi kimi qəbul edə bilərikmi?
Müstəqil siyasətçi Bünyamin Qəmbərli "Bakı-Xəbər"ə açıqlamasında bildirdi ki, Paşinyan və Ermənistanda olan bir qrup sağlam təfəkkürlü insan Qarabağ məsələsində olan problemlərin ermənilər tərəfdən daha çox, Azərbaycanın, Ermənistanın və bölgənin inkişafına bir əngəl məqsədi ilə yanaşan xarici güclər, xüsusilə Rusiya tərəfindən yaradıldığını anlayırlar, bilirlər: "Ona görə də, nəyin bahasına olursa-olsun, bu buxovdan, heç vaxt Ermənistan tərəfindən həll olunması mümkün olmayan bir yaradan qurtulmaq istəyirlər. Paşinyanın son dövr cəsarətli açıqlamaları da göstərdi ki, Qarabağ yarasından xilas olmaqla, Ermənistan həm daxildə, həm da xaricdə ciddi potensial resurslar əldə edir və Ermənistanın inkişafı yalnız qonşuları ilə, xüsusilə də Azərbaycan və Türkiyə ilə sağlam münasibətdə, yaxşı qonşuluqda, gözəl iş birliyindədir. Əks halda, Ermənistanın taleyi sual altındadır. Ona görə də, Paşinyanın bu çıxışını səmimi qəbul etmək ən doğrusudur. Çünki Paşinyan və sağlam düşüncəli ermənilər bunun Ermənistan üçün yarardan çox zərər olduğunu anlayırlar. Bu problemin, ad çəkməsə də, Rusiya tərəfindən olduğunu, Rusiyanın onu Azərbaycana da, Ermənistana da bir buxov, inkişafına əngəl kimi yaratdığını görürlər. Ona görə də bu problemdən xilasa çalışırlar. Mən düşünürəm ki, Ermənistanın bundan sonrakı addımları Qarabağdan tamamilə imtina olacaq. Azərbaycanla sülh müqaviləsi üçün bütün gücü ilə çalışacaq. Əks halda, Ermənistan problemlər içində əzilib məhv olacaq. Paşinyan Azərbaycanla, Türkiyə ilə yaxşı mənada iş birliyinə, kommunikasiya xətlərinin açılmasına gedib, Ermənistanın inkişafı üçün çalışacaq".
Qeyd edək ki, bu, baş nazirin ilk səmimi etirafı deyil. Paşinyan müharibədən dərhal sonra da etiraf edib ki, lap əvvəldən Ermənistanın məğlub olacağını bilib, lakin müharibənin son nəticəsindən daha az güzəştlərlə müharibəni dayandırmaq üçün iradəyə, cəsarətə, minimum bilik və bacarığa sahib olmayıb. Təbiidir ki, bu, Azərbaycan dövlətinin həyata keçirdiyi siyasətin nəticəsidir. Ermənistanın artıq başqa yolu qalmayıb. İstənilən halda isə, səmimi, ya qeyri-səmimi olmasından asılı olmayaraq, onların "sülh istəyi" müsbət yanaşma kimi qiymətləndirilməlidir. Deməli, Ermənistan daha başqa yolu olmadığını və Azərbaycanla münasibətləri normallaşdırmalı olduğunu anlayır. Sevindirici haldır ki, biz Azərbaycanın danışıqlarda ortaya qoyduğu qətiyyəti və prinsipial yanaşmasının müsbət nəticələrini alırıq.
Məhəmmədəli QƏRİBLİ
