Artıq heç kimə sirr deyil ki, Avropa Parlamenti kifayət qədər korrupsiyaya məruz qalmış bir quruma çevrilib. O da bəllidir ki, Avropa Parlamentinin ali rəhbərliyi, konkret olaraq vitse-prezidenti səviyyəsində korrupsiya faktları üzə çıxıb.
Görünən odur ki, Avropa Parlamentində məkrli dairələr müxtəlif məsələlər ətrafında ölkəmizə təzyiq etmək, Azərbaycanın beynəlxalq imicinə xələl gətirmək üçün çeşidli vasitələrə baş vururlar.
Avropa Parlamentində Azərbaycan əleyhinə müzakirələrin aparılması və müxtəlif qətnamələrin qəbul edilməsi burada bəzi dairələrin Azərbaycana qarşı qərəzli mövqeyindən xəbər verir. Başqa sözlə, bu hal növbəti dəfə onu göstərir ki, Avropanın bəzi qurumlarının fəaliyyətinin timsalında "demokratiya", "insan haqları" oyunu müstəqil milli dövlətlərə, o cümlədən Azərbaycana qarşı təzyiq missiyasına xidmət edir. Ümumiyyətlə, proseslərin gedişi təsdiq edir ki, Avropa Parlamentində qərəzli sənədlər Azərbaycanın inkişafını və müstəqil siyasətini həzm edə bilməyən bəzi xarici ermənipərəst dairələrin sifarişi əsasında qurumun islamofob, həmçinin, anti-Azərbaycan mövqeli bir qrup deputatı tərəfindən hazırlanır və olduqca məhdud sayda parlament üzvlərinin iştirakı ilə keçirilən iclasda qəbul edilir. Halbuki, Azərbaycanın Avropa üçün əhəmiyyəti olduqca böyükdür. Elə bu səbəbdən Avropa Parlamentinin ölkəmizə qarşı mövqeyi anlaşılmazdır. Elə Prezident İlham Əliyevin ADA Universitetində keçirilən "Qarabağ: 30 ildən sonra evə dönüş. Nailiyyətlər və çətinliklər" Forumunda Avropa Parlamenti ilə bağlı səsləndirdiyi fikirlər də təsadüfi xarakter daşımır. Dövlət başçısı qeyd edib: "Biz Avropa Komissiyası ilə eyni zamanda müxtəlif istiqamətlərdə fəaliyyət göstəririk, genişlənmə istiqamətində enerji əməkdaşlığı edirik. Avropa Komissiyasından xahiş qəbul etmişik ki, Avropaya qaz ixracı artırılsın, çünki orada sıxıntıları var. Biz bağlılıq haqqında danışırıq, ticarət müzakirə edirik, sərmayələri müzakirə edirik". Lakin Avropa Parlamentinin bir təsisat kimi buna mane olduğunu vurğulayan dövlət başçısı deyib: "Bu, bir növ məsuliyyətsiz insanlar qrupudur. Onların bəziləri özünü manyak kimi aparır. Çünki onların anti-Azərbaycan hissləri və bəyanatları insanın normal psixoloji statusundan kənara çıxır. Mən maksimal dərəcədə diplomatik lüğətdən istifadə etmək istəyirəm. Biz nə edə bilərik? Onlar 10-dan çox anti-Azərbaycan qətnamə qəbul ediblər. Biri çox, biri az. Bu, bizim üçün elə bir vacib deyil. Biz buna təəssüf edirik. Sadəcə, onu bəyan edə bilərik ki, biz bunu Avropa İttifaqının üzvlərinin hamısına şamil etmirik". Avropa Parlamentində korrupsiya hallarına toxunan prezident İlham Əliyev deyib ki, bu qurum ilkin olaraq öz korrupsiya məsələlərini həll etməlidir. Hər hansı digərlərini müəyyən bir günahda ittiham etmək əvəzinə, öz məsələləri ilə məşğul olmalıdır. Xatırladaq ki, daha əvvəllər də Avropa Parlamentinin bir çox üzvü, davranış kodeksinin əksinə olaraq, böyük miqdarda ödənilən pullar hesabına iri şirkətlərin maraqlarına uyğun qanunların qəbul olunması üçün lobbiçilik fəaliyyəti ilə məşğul olub. 2022-ci ilin aprelində Belçika polisi və alman müstəntiqləri Almaniyada başladılan istintaq çərçivəsində sağ mərkəzçi Avropa Xalq Partiyasının Brüsseldəki qərargahına basqın etdilər. Xeyli sayda deputat korrupsiya faktına görə saxlanıldı. Bunlar Avropa Parıamentində sadəcə çoxsaylı korrupsiya faktlarından bəziləridir. Uzun müddətdir ki, Avropa Parlamentinin bir sıra üzvləri erməni diasporunun korrupsiyasından istifadə edərək Azərbaycana qarşı qərəzli mövqe formalaşdırır.
Ekspertlər hesab edir ki, Azərbaycanın üzv olmadığı və qarşısında heç bir öhdəlik daşımadığı Avropa Parlamentinin bütün etik normalara, diplomatik qaydalara, Avropa İttifaqı ilə bir çox sahələr üzrə əməkdaşlıq əlaqələrinin ruhuna zidd, ikili standartların bariz nümunəsi olan qətnamələr qəbul etməsi yolverilməzdir. O da faktdır ki, qərəzli və obyektivlikdən uzaq fəaliyyəti ilə Avropa Parlamenti öz nüfuzuna sarsıdıcı zərbə endirir, erməni lobbisinin və onu dəstəkləyən qüvvələrin əlində oyuncağa çevrildiyini göstərir. Avropa Parlamentinin anti-Azərbaycan və islamofob siyasətinin nəticəsidir ki, sözügedən qurum ilə Azərbaycanın münasibətləri çox aşağı səviyyədədir. Bunu şərtləndirən məqam da budur ki, Avropa Parlamentində təmsil olunan bir sıra deputatlar Avropa seçicilərinin deyil, lobbi qruplarının maraqlarını təmsil edir. Bu yanlış siyasəti ilə Avropa Parlamenti Avropa İttifaqının Cənubi Qafqaz siyasətini təhlükə altına atır. Digər tərəfdən, bu qurum kampaniya xarakterli anti-Azərbaycan fəaliyyəti ilə ölkəmizin ədalətli mövqeyinə təsir göstərməyə, Ermənistanın lehinə güzəştlər əldə etməyə çalışır. Lakin Avropa Parlamenti unudur ki, Azərbaycan bu gün apardığı aktiv xarici siyasətlə, Avropanın enerji təhlükəsizliyindəki rolu, qlobal təşəbbüsləri ilə beynəlxalq arenada yüksək nüfuza malikdir. Onu da qeyd edək ki, Fransa istisna olmaqla, Avropada əslində, heç bir dövlət Azərbaycan əleyhinə fikirlər səsləndirmir. Amma Avropa və ayrı-ayrı dövlətlərin parlamentləri açıq şəkildə ermənipərəst mövqedən çıxış edirlər. Burda isə səbəb daha çox korporativ maraqlardır. O da məlumdur ki, Avropada erməni diasporu kifayət qədər fəaldır. Ümumiyyətlə, erməni milyarderlər maaşla dolanan istənilən Avropalı parlamenartini asanlıqla ələ ala bilirlər. Amma ermənilərin sifarişi əsasında fəaliyyətlə Avropa Parlamenti Avropanın özünə ziyan vurur.
Nahid SALAYEV
