Elşad Həsənov: "Burada söhbət əsasən Birləşmiş Ştatlardan gedir"
Prezident İlham Əliyev dekabrın 6-da ADA Universitetində keçirilən "Qarabağ: 30 ildən sonra evə dönüş. Nailiyyətlər və çətinliklər" Forumunda bəyan edib ki, bəzi tərəfdaş ölkələrlə anlaşılmazlıqlar yaşayırıq:
"Bu gün biz bir neçə beynəlxalq çağırışla üzləşirik. Təəssüf olsun ki, biz tərəfdaş hesab etdiyimiz bəzi ölkələrlə müəyyən anlaşılmazlıq yaşayırıq. Biz öz mövqeyimizi onlara çatdırırıq və bütün ölkələrə qarşı beynəlxalq hüququn şamil olunmasının vacibliyini qeyd edirik. Bu, selektiv olmamalıdır. Azərbaycan bütün məsələləri BMT Nizamnaməsinin 51-ci maddəsinə uyğun olaraq özünümüdafiə hüququndan istifadə etməklə həll edib. Bu, Azərbaycanın suveren hüququ idi ki, öz ərazisinə tam şəkildə nəzarəti həyata keçirsin".
Maraqlıdır, Prezident "biz tərəfdaş hesab etdiyimiz bəzi ölkələrlə müəyyən anlaşılmazlıq yaşayırıq" deyərkən hansı ölkələr nəzərdə tutulur?
"Azərbaycan Fransa ilə çox böyük iqtisadi-siyasi əlaqələrə malik olmasına baxmayaraq..."
Sözügedən məsələyə aydınlıq gətirən siyasi ekspert Elşad Həsənovun fikrincə, burada söhbət əsasən Birləşmiş Ştatlardan gedir: "Əvvəla, Prezident İlham Əliyev forumda çox əhatəli, geniş çıxış etdi və müəyyən məsələlərə də aydınlıq gətirdi. Həqiqətən də Azərbaycan öz ərazilərini işğaldan azad edəndən sonra bizə qarşı basqılar oldu. Azərbaycana tərəfdaş olan ölkələr ölkəmizə yönəlik sərt açıqlamalarla çıxış etdilər. Məsələn, ABŞ-ın belə sərt mövqe sərgiləyəcəyini gözləmirdik. Halbuki, Azərbaycan öz suveren ərazisinə nəzarəti bərpa etdi. Azərbaycanla tərəfdaş olan ABŞ Senatda müzakirələr zamanı qərəzli mövqe sərgilədi. Prezident İlham Əliyev dövlət katibi Entoni Blinkenlə telefon danışığı zamanı bununla bağlı öz iradlarını bildirdi. Bunun nəticəsi olaraq ABŞ Dövlət katibinin köməkçisi Ceyms O’Brayn Bakıya səfər etdi, Prezident Əliyev və digər rəsmilərlə görüşlər keçirdi. Digər tərəfdən, Azərbaycan Fransa ilə çox böyük iqtisadi-siyasi əlaqələrə malik olmasına baxmayaraq, Paris ölkəmizə qarşı sərt bəyanatlarla çıxış etməyə başladı. Halbuki, Fransanın 50-dən artıq şirkəti Azərbaycanda fəaliyyət göstərir. Nəhəng "Total" şirkəti Xəzərdə neft-qaz hasilatında iştirak edir. Fransa tərəfdaş ölkə olsa da, Vətən müharibəsi başlayan kimi əleyhimizə fəaliyyət göstərməyə başladı. Bunlar Ermənistanın, necə deyərlər, böyük bacısı rolunda çıxış edirlər. Bir sözlə, Azərbaycana qarşı təxribatlardan əl çəkmirlər. Halbuki, müharibə bitən kimi Azərbaycan 5 prinsipdən ibarət sülh təklifləri ilə çıxış etməyə başladı. Yəni Azərbaycan zorun tərəfdarı olmayıb. Rəsmi Bakı beynəlxalq hüququn və suverenliyin tərəfdarı olub. Bu təmin edilmədikdə isə, öz ərazimizdə antiterror əməliyyatları həyata keçirmişik".
Vidadi ORDAHALLI
