Amid Əliyev: "Masada Ermənistanın taleyi həll olunduğu bir zamanda belə kəskin dönüş etmək ağır nəticələrə səbəb ola bilər"
Prezident İlham Əliyev dekabrın 6-da ADA Universitetində keçirilən "Qarabağ: 30 ildən sonra evə dönüş. Nailiyyətlər və çətinliklər" Forumunda deyib ki, əgər Ermənistan yaxşı qonşu olmaq və dəstək vermək bacarığını nümayiş etdirərsə, bu yolla öz suverenliyini qoruyub saxlaya bilər:
"Ermənistan hökuməti xaotik olaraq bir qütbdən digər qütbə gedir. Onlar hesab edirlər ki, bununla xilas olunacaqlar. Bu belə deyil. Onlar, sadəcə, digər böyük qardaşı qazanacaqlar. Bu böyük qardaş əvvəlki qardaşdan yaxşı olacaq? Səmimi olaraq deyək ki, bu belə deyil. O uzaqdadır, bölgəyə o qədər də bağlı olan qardaş deyil və özünün siyasi, bəlkə də şəxsi ambisiyalarının, ideyalarının dalınca gedir. Ən azı Ermənistan öz tərəfindən iradəsini bildirməlidir. Bu, sülh üçün ilk şərtdir".
Prezident " Ermənistan yaxşı qonşu olsa, suverenliyini saxlaya bilər" fikri ilə əslində nəyə işarə edib?
Politoloq Amid Əliyev "Bakı-Xəbər"ə açıqlamasında bildirdi ki, ölkə başçısının görüşdə Ermənistanla bağlı, daha doğrusu, Ermənistanın suverenliyi, xarici siyasət kursu və yeni patronaj axtarışı haqqında fikirləri olduqca əhəmiyyətlidir: "Belə ki, hazırki vəziyyətdə hər şey Ermənistanın atacağı addımlardan asılıdır. 70 gündür ki, Ermənistan sülh şərtləri ilə bağlı növbəti cavabını verməkdə çətinlik çəkir. Əsas səbəb də budur ki, bu məsələdə və ümumiyyətlə Ermənistanın taleyi ilə bağlı qərarları İrəvan yox Paris, Vaşinqton və ya Berlin verir. Nəticədə isə son məqamda ortaya tərəddüdlər və vaxtla bağlı manipulyasiyalar çıxır.
Həqiqətən də Ermənistan müstəqil xarici siyasət yeridən dövlət olsaydı, təbii ki, nəinki sülh sazişi, eləcə də Ermənistanın bir sıra taleyüklü məsələləri ilə bağlı adekvat cavab verə bilərdi.
Hazırda Ermənistanın yaşadığı siyasi, iqtisadi və sosial yönümlü təlatümlərinin də səbəbi bundadır. Ölkə iqtisadiyyatı tamamilə Rusiyadan asılı olduğu bir halda tam şəkildə Qərbə köklənən xarici siyasət yürütmək kökündən səhv addımdır. Masada Ermənistanın taleyi həll olunduğu bir zamanda belə kəskin dönüş etmək ağır nəticələrə səbəb ola bilər. Ermənistanın siyasi rəhbərliyi rasional düşüncə tərzinə malik olsaydı, Azərbaycanın təklif etdiyi sülh sazişinə razılıq verərdilər. Bu da, öz növbəsində, Ermənistanın hərtərəfli inkişafına xidmət etmiş olardı. Yeni patronaj və hami axtarışı Ermənistan üçün heç də yaxşı gələcək vəd etmir. Ən çox qonşuluq münasibətlərinə təsir edə biləcək belə manevrlər sonda Ermənistanın milli müstəqilliyini sual altına qoya bilər. Bölgədəki sülh və təhlükəsizliyin təmin olunması və qorunub saxlanılması region gücləri və qonşularla münasibətlərin sağlamlaşdırılmasından keçir. Okeanın o tayı və ya yaxın qitədən olan dövlətlərin dəstəyinin kökündə isə şəxsi siyasi ambisiyalar və maraqlar dayanır.
Prezidentin səsləndirdiyi fikirlərin kökündə bu mesajların dayanması açıq-aşkar hiss olunur. Ermənistan öz taleyini, suverenliyini və qonşuluq münasibətlərini regiondan kənarda həll etməməlidir".
Məhəmmədəli QƏRİBLİ
