Azərbaycanın haqlı, ədalətli mövqeyinin beynəlxalq aləmdə qəbul edilməsi üçün Prezident İlham Əliyevin rəhbərliyi ilə çox mühüm işlər görülür. Sözsüz ki, 44 günlük müharibədən və 23 saat 50 dəqiqəlik antiterror tədbirlərindən sonra Azərbaycana qarşı xoşagəlməz kampaniya həyata keçirilir.
Dünyadakı ermənipərəst güclər və antitürk, antiazərbaycan qüvvələri Vətən müharibəsində qazandığımız tarixi qələbəyə kölgə salmağa çalışır, sentyabrda baş verən antiterror tədbirlərinə də başqa cür don geydirməyə çalışırlar. Müharibədən sonra Azərbaycanın həyata keçirdiyi əsas işlərdən biri Ermənistan tərəfindən törədilmiş sülh və insanlıq əleyhinə cinayətləri, habelə müharibə cinayətləri ilə bağlı həqiqətləri dünya ictimaiyyətinə çatdırmaq olub və bu istiqamətdə hər tərəfli şəkildə fəaliyyət göstərlir.
Bu gün əsas diqqət çəkən məqamlardan biri müharibədən sonrakı vəziyyətdir, sülhün əldə olunması üçün Azərbaycanın atdığı addımlardır. Dövlətimiz bütün istiqamətlətdə dünyaya çatdırır ki, müharibədən üç il keçməsinə baxmayaraq Ermənistan hələ də sülh müqaviləsi imzalamaqdan yayınır, amma Azərbaycan sülh istəyir...
Dekabrın 6-da ADA Universitetində Azərbaycan Prezidenti İlham Əliyevin iştirakı ilə ADA Universitetinin və Beynəlxalq Münasibətlərin Təhlili Mərkəzinin birgə təşkilatçılığı ilə "Qarabağ: 30 ildən sonra evə dönüş. Nailiyyətlər və çətinliklər" Forumu keçirilib.
Prezident çıxışında və suallara cavabında müharibədən sonra yaranan reallıqlardan, vəziyyətdən danışıb.
Dövlət başçısı müharibədən sonra Ermənistanla münasibətlərin normallaşması istiqamətində Azərbaycanın atdığı addımları qeyd edib.
Prezident çıxışında müharibədən sonrakı vəziyyətlə, ümumiyyətlə Azərbaycan-Ermənistan münasibətinin normallaşması ilə bağlı hansı həqiqətlər barədə mesajlar verdi?
"Azərbaycan Prezidenti bir daha çatdırdı ki..."
"Müasir İnkişaf" Birliyinin rəhbəri, siyasi şərhçi Mübariz Göyüşlü "Bakı-Xəbər"ə bildirdi ki, məşhur beyin və tədqiqat mərkəzlərini təmsil edən 60-dan artıq xarici qonağın iştirak etdiyi bu forumda Azərbaycan Prezidentinin 44 günlük müharibədən sonrakı vəziyyətlə, Ermənistanla münasibətlərin normallaşdırılması, habelə keçmiş məcburi köçkünlərin qayıdış prosesinin sosial, iqtisadi, təhlükəsizlik və infrastruktur aspektləri ilə bağlı geniş və məzmunlu çıxış etdi. O vurğuladı ki, ölkə başçısı bir daha bütün dünyaya bəyan etdi ki, regionda vəziyyət dəyişir və böyük dərəcədə dəyişikliklərin təşəbbüskarı Azərbaycandır. "Prezident qeyd etdi ki, regionda vəziyyətin dəyişməsi təbiidir, çünki biz Azərbaycanın beynəlxalq səviyyədə tanınmış ərazisinin üzərində suverenliyini tam bərpa etməli idik. "Biz bunu sülh yolu ilə etmək istəyirdik, eyni şəkildə biz təqribən 30 il ərzində Ermənistan ilə münaqişəni dinc yolla həll etmək istəyirdik. Lakin, təəssüflər olsun ki, bu mümkün olmadı. Bunun bir çox səbəbi var idi və biz onları ötən görüşlərimizdə ətraflı şəkildə müzakirə etmişik" - deyə Prezident İlham Əliyev Forumda qeryd etdi. Prezidentin müharibədən sonrakı vəziyyəti dəyərləndirməsi və bütün proseslərə geniş təhlil verməsi, Ermənistanla sülhə nail olmaq üçün addımlar atıldığını bəyan etməsi, sülhə mane olanları birbaşa adları ilə göstərməsi çox mühüm məsələ idi. Prezident açıq dedi ki, əgər Ermənistan Qarabağdan qanunsuz silahlı birləşmələrini zamanında çıxarsaydı, separatçılar öz dağıdıcı fəaliyyətlərindən əl çəksəydilər heç lokal antiterror tədbirlərinə də ehtiyac qalmayacaqdı. Doğurudan da, Ermənistanın və başqa dövlətlərin pozuculuğu nəticəsində məlum proseslər baş verdi. Bununla belə Azərbaycan Prezidenti bir daha çatdırdı ki, biz sülh gündəliyinə sadiqik" - deyə o qeyd etdi.
"Prezident Əliyev Forumdakı çıxışı ilə çox həqiqətlər barədə mesajlar verdi"
M.Göyüşlü bildirdi ki, Azərbaycan Prezidenti yenə də ədalətli, hümanist və beynəlxalq hüququn prinsiplərinə uyğun şəkildə fikirlərini səsləndirib. "Prezidentin çıxışında kifayət qədər aydın mesajlar var. Ermənistan hakimiyyətinin nümayəndələri bu çıxışda onlara ünvanlanan mesajları və humanist təklifləri, fikirləri dərk edib doğru yola gələrlərsə hesab edirəm ki, bölgəmiz dinc, rifahlı bir vəziyyətə gəlmiş olar. Bizim onlara xəbərdarlıqlarımız çox oldu. Amma nə Ermənistan, nə də havadarları bu çağırışlara diqqət yetirmək istəmədilər. Nəticədə 44 günlük müharibə baş verdi. Təbii, əgər Ermənistan vaxtında tələblərə əməl etsəydi bu baş verməzdi. Prezident bir məsələni də yenidən vurğuladı ki, Azərbaycanın Ermənistanın ərazisində gözü yoxdur: "Mən dəfələrlə demişəm ki, bizim Ermənistan ərazisini ələ keçirmək kimi heç bir planımız yoxdur, çünki bəzən bizi bu məsələdə əsassız olaraq ittiham edirlər..."
Prezident eyni zamanda Qərbi azərbaycanlıların öz tarixi torpaqlarına qaytarılması məsələsindən də danışdı, bildirdi ki, Ermənistan oradan deportasiya olunmuş yüz minlərlə azərbaycanlının təbii humanitar tələbatlarının qarşısını almalı deyil. Prezident bu vacib məsələni vurğuladı.
Burada eyni zamanda separatçılarla da bağlı fikirlər oldu, Prezident vurğuladı ki, biz onlara separatimi dayandırmaları, ərazilərimizi tərk etmələri üçün üç il vaxt verdik, amma onlar bunu dəyərləndirmədilər, bunun acı nəticələrinə də qatlaşdılar. Prezident Əliyev forumdakı çıxışı ilə çox həqiqətlər barədə mesajlar verdi. Bu mesajar Ermənistana və onun havadarlarına gerçəklikləri bir daha göstərdi. Əgər onlar bunu dəyərləndirərsə, anlarsa, daha faydalı nəticələr ola bilər. Əks halda silahlanma, hərbi təcavüz ritorikası ilə davam edərlərsə, hər şey başqa cür olar...Odur ki, Azərbaycan Prezidentinin növbəti çıxışından hər kəs öz payını götürməlidir. Fransa, ABŞ və başqa ölkələr Ermənistanı silahlandırmağa yox, onu sülhə məcbur etməlidir" - deyə M.Göyüşlü əlavə etdi.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
