Elşad Musayev: "Bəyannamənin bu qədər gec dərc olunması əsasən texniki xarakterli məsələdir"
Noyabrın 23-də Minskdə KTMT Kollektiv Təhlükəsizlik Şurasının iclası keçirilib, lakin yekun bəyannamə yalnız indi dərc olunub.
"Biz KTMT-yə üzv dövlətlərin sərhədləri yaxınlığında təhlükəli insidentlərə və hərbi-siyasi gərginliyin artmasına səbəb ola biləcək təxribat xarakterli hərəkətləri qəbul etmirik. Biz xarici terrorçu döyüşçülərin silahlı münaqişə zonalarına hərəkəti ilə bağlı dərin narahatlığımızı bildiririk", - Şuranın yekun bəyanamədə deyilir.
Burada iki maraqlı nüans var. Birincisi, noyabrın 23-də keçirilən KTMT iclasının bəyannaməsi indi yazılır və yayılır. Niyə bunlar bu qədər gec edilir? İkincisi, orada qeyd edilir ki, KTMT-yə üzv olan ölkələrin sərhədindəki təxribatlardan narahatıq və bunlar pis nəticələrə gətirib çıxara bilər. Bunu müəyyən mənada Rusiyanın həm də Azərbaycana xəbərdarlığı kimi qəbul etmək olarmı? Bəzi erməni mənbələri artıq bundan Ermənistanın könlünü almaq məqsədilə Azərbaycana yumşaq xəbərdarlıq edildiyi nəticəsini çıxarırlar. Yəni bu doğrudanmı Azərbaycana xəbərdarlıqdır, yoxsa erməni sosial şəbəkələrində ortaya atılan uydurmadır?
"Burada söhbət Avropa İttifaqı missiyasının Ermənistan-Azərbaycan sərhədində artan fəallığından gedə bilər"
Sözügedən məsələyə aydınlıq gətirən Böyük Azərbaycan Partiyasının sədri Elşad Musayev buna birmənalı prizmadan yanaşmadı: "Bəyannamənin bu qədər gec dərc olunması əsasən texniki xarakterli məsələdir. Düşünmürəm ki, bəyannamənin gecikməsi xüsusi anlam daşıyır. O boyda KTMT-də olan ölkələr gözləməzlər ki, kiminsə xətrini xoş etmək üçün indi bəyannamə yazsınlar. O baxımdan hesab edirəm ki, bu, texniki xarakterli məsələdir. KTMT ölkələrinin sərhədlərindəki təxribat xarakterli narahatlığa gəldikdə, burada söhbət təkcə Ermənistan sərhədindən getmir. Həmçinin burada söhbət Avropa İttifaqı missiyasının Ermənistan-Azərbaycan sərhədində artan fəallığından gedə bilər. Təbii ki, erməni tərəfi çalışacaq bununla bağlı Ermənistanın maraqlarına uyğun nəticə çıxarsın. Desinlər ki, Rusiya Ermənistanın könlünü almaq istəyir. Belə də ola bilər, amma onu da nəzərə alaq ki, ən böyük müharibə bu gün Rusiya və Ukrayna arasında gedir. Hər iki tərəfdə xarici muzdluların da olması sirr deyil. Eyni zamanda, Rusiyanın uzun sərhədləri var və onlar indi bağlanıb. Bununla bağlı da işarə verilə bilər. Ancaq bütün hallarda biz Rusiyanın bu bölgəyə yanaşmasını nəzərə almalıyıq. Bütövlükdə, təbii ki, Rusiya Cənubi Qafqazı öz nəzarətində saxlamaq istəyir. Ona görə də, fürsət düşən kimi, öz varlığını sübut etmək istəyir. Biz bütün hallarda ən çətin vəziyyətə hazır olmalıyıq. Rusiyanın indi bizlə münasibətləri yaxşıdır. Ancaq bu o demək deyil ki, Rusiyanın bizə xüsusi bir sevgisi var. Yox. Sadəcə, yaranan reallıqların nəticəsində bu belədir. Yəni biz öz siyasətimizi milli və dövlət maraqlarımıza uyğun həyata keçirməliyik".
Vidadi ORDAHALLI
