Samir Hümbətov: "...Ermənistanda revanşist qüvvələrin əlini gücləndirməyə, ultra millətçi hərəkatları daha da qızışdırmağa, müharibəyə təhrik etməyə xidmət edir"
Aİ-nin Ermənistandakı nümayəndə heyətinin rəhbəri Vasilis Maraqos "Azadlıq" radiosunun erməni xidmətinə bildirib ki, Brüssel Ermənistan Silahlı Qüvvələrinə humanitar formatda yardım göstərilməsi üçün konkret təkliflər hazırlamaq məqsədilə yaxın aylarda Ermənistana texniki missiya göndərəcək.
Maraqos qeyd edib ki, Aİ Ermənistanla, o cümlədən təhlükəsizlik sahəsində əməkdaşlığı inkişaf etdirmək öhdəliyi götürüb.
Avropa Birliyi Ermənistanı hansı məqsədlə belə "missiya yağışı"na tutub?
Politoloq Samir Hümbətov "Bakı-Xəbər"ə açıqlamasında bildirdi ki, Avropa İttifaqının Ermənistana yeni bir missiya göndərməklə bağlı səsləndirdiyi fikirlər çox maraqlıdır: "Bütün bunlar əvvəl mülki, indi isə texniki missiya adı altında yeni silah - sürsat və hərbi texnika göndərmək cəhdlərindən irəli gəlir. Əslində bu cür addımların atılması, münaqişənin həll olunmasından daha çox, aktiv şəkildə qızışdırılmasına hesablanmış hərəkət kimi dəyərləndirilə bilər. Avropa İttifaqı həqiqətən də münaqişənin tənzimlənməsini, yekun sülh müqaviləsinin imzalanmasını istəyən tərəf olduğunu nümayiş etdirmək istəyirsə, hesab edirəm ki, o zaman açıq şəkildə Ermənistanı gah mülki, gah texniki missiya adı altında müxtəlif qruplaşmalar və hərbiçiləri göndərməsini dayandırmalıdır. Ancaq Avropa İttifaqının açıq şəkildə Ermənistanı silahlandırması göz qabağındadır. Düşünürəm ki, bu heç də yaxşı hal deyil. Bu cür silahlandırma Ermənistanda revanşist qüvvələrin əlini gücləndirməyə, ultra millətçi hərəkatları daha da qızışdırmağa, müharibəyə təhrik etməyə xidmət edir. Avropa İttifaqı bilərəkdən münaqişəni yenidən qızışdırır. Bu artıq gün kimi aydın olan bir məsələdir. Texniki yardım missiyasının göndərilməsi açıq şəkildə Ermənistana dəstəyin göstəricisidir. Ermənistanın texniki yardım alması kimi narahatlıqları var idisə, o zaman sual oluna bilər: 30 ilə yaxın Azərbaycan torpaqları işğal altında olanda nə üçün narahat olmurdular və Azərbaycana bu yardım nə üçün olunmurdu? Hətta Avropa İttifaqının Xarici və Təhlükəsizlik komissarı Cozef Forelinin Azərbaycan əleyhinə verdiyi açıqlamalarda da gördük ki, nə qədər anti-Azərbaycan mövqeyi tuturlar. Bu baxımdan hesab edirəm ki, Avropa İttifaqı əvvəl mülki, sonra texniki missiya, keçmiş hərbiçilər, təhlükəsizlik işçilərinin Ermənistana gətirilməsi ilə müqavilənin imzalanmasına razı olmadıqlarını və ya öz maraqları kontekstindən imzalanmasını istədiklərini bildirəcəklər. Açıq şəkildə onlar öz maraqlarına xidmət edən oyunlar oynayırlar. Ermənistan onlar üçün o qədər də maraqlı deyil. Önəmli olan öz istəklərinin təmin olunmasıdır. Görünən bundan ibarətdir. Çünki Azərbaycan artıq münaqişəni bitirib, ərazilərini işğaldan azad edib. Bu isə onları qane etmir. Ona görə də, yeni addımlar atmağa başlayırlar".
Məhəmmədəli QƏRİBLİ
