Elşən Həsənov: "Azərbaycandan heç kim ermənilərə zülm etməyib, onları "etnik təmizləmə"yə məruz qoymayıb"
Ermənistan parlamentinin komissiyası "Ayakve" mülki təşəbbüsü çərçivəsində irəli sürülən Qarabağ ermənilərinin öz müqəddəratını təyinetmə hüququndan imtinaya görə cinayət məsuliyyətini nəzərdə tutan qadağanı ona görə dəstəkləməyib ki, əks halda bu, Azərbaycanla növbəti müharibəyə səbəb olacaqdı.
Hakim "Mülki müqavilə" fraksiyasından olan deputatlar müxalifətin təklifini neytrallaşdırıblar.
Əgər Ermənistan parlamenti Qarabağla bağlı təxribatçı dəyişikliyi qəbul etsəydi, Azərbaycan buna seyrçi qalmayacaqdı. Belə bir "dəyişikliyin" qəbulu iki ölkə arasında sülh sazişinin imzalanmasını da mümkünsüz etmiş olardımı?
Təhlükəsizlik məsələləri üzrə ekspert Elşən Həsənov "Bakı-Xəbər"ə açıqlamasında bildirdi ki, bütün bunlar keçikmiş təkliflərdi: "Ermənilər başını qatmağa mövzu axtarır. Daha doğrusu, erməni lobbisi görür ki, uzun müddət əllərində bayraq etdikləri qondarma "soyqırım" iddiaları artıq köhnəlib. Dünya parlamentlərini gəzib danışmağa yeni mövzu çıxıb. Bunun üzərindən həm də yaxşı qazanmaq imkanı əldə edirlər. İmkanlı ermənilərdən bu adla vəsait toplayırlar. Qarabağdakı ermənilər bir dəfə özlərinin "təyin etmə" hüququndan istifadə etməyə çalışdılar, sonu gördünüz necə oldu. Nəticədə Qarabağdan da çıxıb getməyə məcbur qaldılar. Halbuki, qalıb Qarabağın bir hissəsində normal yaşaya bilərdilər. Təbiidir ki, onların bu tələbləri keçərli deyil. Parlament səviyyəsində bunu qəbul etsəydilər, bu, Azərbaycana qarşı yeni müharibə elan etmək anlamına gələ bilərdi. Ermənistan heç Qarabağı və ətraf rayonları işğal etdiyi dönəmdə belə oranın "müstəqilliyini" tanımadı. İndiki zəif dönəmində bunu etməklə onlar özlərini məhvə apara bilərlər. Paşinyan hakimiyyəti bunu gözəl anladığı üçün təşəbbüsü yerindəcə boğub. Qarabağ erməniləri öz müqədəratını seçib, Azərbaycanda yaşaya bilərdilər. Biz dəfələrlə bu yöndə çağırışlar da etmişik. Qiyabi olaraq özünə yeni "müqəddarat" təyin etmək uğursuz bir seçimdir. Maraqlıdır ki, Qarabağdan köçən ermənilər özləri də Ermənistanın media qurumlarına bölgəni könüllü tərk etdiklərini bildiriblər. Onların açıqlamaları ermənipərəst dairələrə verilən ən tutarlı cavab hesab oluna bilər. Etiraf ediblər ki, Azərbaycan onların gedişini arzulamırdı. Eyni zamanda, bildiriblər ki, Bakı ən yüksək səviyyədə Qarabağın erməni sakinlərinə Azərbaycan vətəndaşlığını qəbul etməyi və orada qalmağı təklif edib. Həmin açıqlamaları dinlədikdə bu qənaət hasil olur: Azərbaycandan heç kim ermənilərə zülm etməyib, onları "etnik təmizləmə"yə məruz qoymayıb, məcburi köçkünə çevirməyib, indiki miskin həyatı yaşamağa məcbur etməyib. Əgər bunu edən olubsa, o da keçmiş separatçı xunta rejiminin "qlavar"ları və Ermənistandakı "Qarabağ klanı" olub. Atalar "yüz dəfə eşitməkdənsə, bir dəfə görmək yaxşıdır" – deyiblər. Ancaq xaricdəki anti-Azərbaycan dairələri bunu görmək istəmirlər. Sözsüz ki, bu da onların qərəzli olmasından irəli gəlir. Qoy, onlar özlərini görməzliyə vursunlar. Biz də öz işimizi görərək, bəzi erməni sakinlərin müsahibələrindən çıxarışlar edib diqqətə çatdıraq ki, həqiqətlər ortada olsun".
Məhəmmədəli QƏRİBLİ
