Elşad Həsənov: "Mən belə başa düşürəm ki, gələcəkdə Litva Azərbaycana qarşı fikrini dəyişəcək"
Litva Müdafiə Nazirliyi hərbi qulluqçuların asudə vaxtlarında səyahətinə qadağa qoyulması təklif olunan ölkələrin siyahısını hazırlayıb.
Bildirilib ki, Rusiya, Belarus, Qazaxıstan, Özbəkistan, Tacikistan, Qırğızıstan, Türkmənistan, Ermənistan, Azərbaycan, Gürcüstan, Çin, Moldova və Dnestryanı bölgənin dost olmayan ölkələr siyahısına daxil edilməsi təklif edilib.
Sərəncama əsasən, hərbi qulluqçular, həmçinin, Xarici İşlər Nazirliyinin getməməyi tövsiyə etdiyi və ya dərhal tərk etməyi tövsiyə etdiyi ölkələrə gedə bilməyəcəklər.
Litva ilə bizim normal münasibətlərimiz olub. Belə olan təqdirdə niyə bizi dost olmayan ölkələrin sırasına salıb?
Siyasi şərhçi Elşad Həsənov "Bakı-Xəbər"ə açıqlamasında bildirdi ki, doğrudan da Litva ilə Azərbaycan arasındakı münasibətlər normaldır: "Litvanın prezidenti Azərbaycana səfər etdi. Azərbaycan Prezidenti də böyük nümayəndə heyəti ilə Litvada oldu, iqtisadiyyatın, siyasi, mədəni, biznesin inkişafı üçün qarşılıqlı müqavilələr imzalandı. Həmçinin, Litva bir çox zamanlarda xaricdə olan tədbirlərdə Azərbaycana dəstək olub, tərəfini saxlayıb. Təəssüflər olsun ki, son zamanlar Avropa İttifaqında Fransanın moderatorluğu ilə Azərbaycana qarşı olan basqılardan sonra Litva da belə bir addım atdı və bizi dost olmayan ölkələrin siyahısına daxil etdi. Ancaq görürük ki, Pribaltikadan sonra Sovet ölkələrinin əksəriyyəti bu siyahıya daxil olub. Çünki onların hesabına görə, həmin bu ölkələr hələ ki, bu və ya digər dərəcədə Rusiyanın təsiri altındadır. Ancaq Litvada, Latviyada müəyyən problemlər var. Dünən Rusiya prezidenti Latviyaya xəbərdarlıq etdi, bildirdi ki, orda yaşayan insanlara qarşı münasibət dəyişməsə, lazım olan tədbirlər görüləcək. Latviyada rusdilli əhali sıxışdırılır və bunu görən Putin də xəbərdarlığını əskik etmədi. Bu ölkələrdə şovinizm güclüdür. Həm NATO, həm də Avropa İttifaqının üzvü kimi fəaliyyət göstərirlər. Mən belə başa düşürəm ki, gələcəkdə Litva Azərbaycana qarşı fikrini dəyişəcək. Çünki bizim qarşılıqlı əlaqələrimiz çox güclüdür. İqtisadi dövriyyə ildən-ilə artır. Bütün bunlar bizə əsas verir ki, siyahıda bizim də ölkəmizin olmasına təəssüflənək".
Son illər Azərbaycanın dünya miqyasında nüfuzu artmaqda, beynəlxalq əlaqələri genişlənməkdədir. Prezident İlham Əliyevin müxtəlif ölkələrə ardıcıl səfərləri və ayrı-ayrı dövlətlərin başçılarının Azərbaycana səfərləri bunun bariz nümunəsidir. Eyni zamanda, Azərbaycanın rəhbərliyi ilə həyata keçirilən irimiqyaslı layihələr ölkəmizə marağı getdikcə artırır.
Prezident İlham Əliyevin və birinci xanım Mehriban Əliyevanın Litva Respublikasına rəsmi səfəri ölkəmizin xarici əlaqələrinin coğrafiyasının genişlənməsi baxımından da mühüm əhəmiyyətə malikdir. Belə ki, səfər çərçivəsində bir sıra yüksək səviyyəli görüşlərin keçirilməsi və mühüm sənədlərin imzalanması olub.
Azərbaycan və Litva tarixi əlaqələrə malikdir. Hələ Azərbaycan Xalq Cümhuriyyəti dövründə Litvanın ölkəmizdə konsulluğu fəaliyyət göstərib. Görkəmli şəxsiyyət Vincas Kreve-Mickevicus 1919-cu ildə müstəqil Azərbaycan dövlətində Litvanın konsulu kimi çalışıb. Hazırda Azərbaycan Dövlət İqtisad Universitetində (UNEC) litvalı dövlət xadimi və yazıçı Vincas Kreve-Mickevicusun adını daşıyan auditoriya var.
Məhəmmədəli QƏRİBLİ
