Sahil Kərimli: "Burada itirən yenə Ermənistan olacaq"
Sülh sazişi üzrə təklifləri 70 gündən artıq müddətdə yubadan Ermənistan tərəfi indi də bu cür pozucu açıqlamaları ilə normallaşma prosesinin perspektivlərinə xələl gətirir.
Bu fikirlər Azərbaycan Xarici İşlər Nazirliyinin Ermənistan Xarici İşlər Nazirliyinin 4 dekabr 2023-cü il tarixli açıqlamasına dair şərhində bildirilib:
"Ermənistan Xarici İşlər Nazirliyinin guya Azərbaycan tərəfinin açdığı atəş nəticəsində erməni hərbçisinin həlak olması ilə bağlı iddianın əks olunduğu 4 dekabr 2023-cü il tarixli açıqlamasını qətiyyətlə rədd edirik. Ermənistan tərəfi bu kimi açıqlamalar ilə həmçinin sərhəd bölgələrində süni gərginlik yaratmaq və üçüncü dövlətlərin diqqətini cəlb etmək məqsədi güdür".
Ermənistan rəhbərliyi prosesi hara qədər yubatmağı düşünür?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Ermənistan rəhbərliyi nəyin bahasına olursa-olsun, Azərbaycanla sülh müqaviləsinin imzalanmasına mane olmağa çalışır: "Bu isə o deməkdir ki, Ermənistan və xüsusilə də onun Qərbdəki havadarları Cənubi Qafqazda sülh və təhlükəszilik istəmir. Çünki son zamanlar Avropa və ABŞ siyasi dairələri Ermənistanı birmənalı olaraq müdafiə edir, Azərbaycana qarşı haqsız və ədalətsiz mövqe sərgiləyir.
Ermənistan məğlubiyyətindən dərs almayaraq yenə də sülh sazişinin imzalanmasından yayınır. Artıq Azərbaycan tərəfi Ermənistanın cavabının yaxın vaxtlarda təqdim olunacağı ümidi ilə ikitərəfli kanallar vasitəsilə sülh sazişinin 5-ci düzəliş edilmiş variantını müvafiq izahatlarla birlikdə qarşı tərəfə təqdim edib. Lakin məsələdən xeyli vaxt keçməsinə baxmayaraq, heç bir razılıq əldə edilməyib.
Bölgəmizdə marağı olan ölkələr Ermənistanı dəstəkləməklə bundan Azərbaycana qarşı təzyiq vasitəsi kimi istifadə edir. Azərbaycanın sülh təklifləri ilə bağlı müraciətinə 3 aya yaxındır ki, rəsmi İrəvan heç bir reaksiya vermir. Son günlərdə isə sərhəddə gərginliyi artırmaq məqsədilə əsassız bəyanatlar səsləndirilir. Ermənistan rəsmiləri tez-tez Qərb ölkələrinə səfərlər etməklə nəyəsə nail olmağa çalışır. Bütün bunlar sülh prosesinə çox ciddi zərbələr vurur. Əlbəttə ki, Ermənistan və ona arxa duran ölkələr bu cür qeyri-konstruktiv siyasətlə heç nəyə nail ola bilməyəcək. Burada itirən yenə Ermənistan olacaq. Şübhə yoxdur ki, proses həmişə olduğu kimi Azərbaycanın diqtəsi və haqlı mövqeyinin tam təmin olunması ilə nəticələnəcək. Çünki Azərbaycan dövlətinin qətiyyətli siyasi mövqeyi və hərbi qüdrəti bütün dünyaya bəllidir".
Ermənistan tərəfi sənədin öz variantının təqdim olunmasını iki aydan artıq gecikdirir. Azərbaycan tərəfi dəfələrlə bəyan edib ki, indi bu, tarixi fürsətdir. Xüsusilə Azərbaycan ərazi bütövlüyünü bərpa etdikdən sonra sülh müqaviləsinin imzalanmasına heç bir maneə yoxdur. Ermənistanın buna nə dərəcədə hazır olması indi ciddi suallar doğurur.
Sülh müqaviləsinin mətnini razılaşdırmaq çətin məsələ deyil. Azərbaycanın təklif etdiyi beynəlxalq hüququn əsas prinsiplərinə uyğun olaraq, intensiv ikitərəfli danışıqlar yolu ilə sülh sazişinin mətni tez bir zamanda bağlana bilər.
Məhəmmədəli QƏRİBLİ
