Əli Orucov: "Özləri barəsində saxta sülhpərvər tərəf imici formalaşdırmağa çalışırlar"
Rəsmi Bakı Ermənistan və Azərbaycan arasında sülh müqaviləsi ilə bağlı erməni tərəfinin son təkliflərinə hələ ki, cavab verməyib.
Bunu Ermənistanın xarici işlər nazirinin müavini Mnatsakan Safaryan deyib.
"Cavab aldıqda ictimaiyyətə məlumat verəcəyik", - o bildirib.
Qeyd edək ki, noyabrın 21-də İrəvan Bakıya Ermənistanla Azərbaycan arasında sülh müqaviləsi bağlamaq üçün altıncı təklifini göndərib.
Erməni rəsmiləri məsələni elə qələmə verir ki, sanki sülh təklifləri ilə çıxış edən tərəf Ermənistandır. Həvəslə öz təkliflərindən bəhs edirlər. Bəs sentyabrın 11-də Azərbaycanın ən sonuncu onlara verdiyi sülh sazişi təklifinə Ermənistandan normal bir cavab gəlibmi? Yəni Ermənistanın bu, dünya ictimaiyyətinin rəyini aldatmaq cəhdlərinin hədəfi nədən ibarətdir? Birinci növbədə ona çalışırlar ki, sülh təşəbbüsünün əsasən onlara məxsus olduğuna hamını inandırsınlar. Nə əcəb dünya buna hələ də lazımı reaksiya vermir? O mənada ki, sülh təşəbbüsləri məsələsində hamı bilir Azərbaycan Ermənistandan öndədir. Azərbaycan dəfələrlə sülh təşəbbüsü ilə çıxış edib, amma Ermənistan hələ də bu yalanlarından əl çəkmir.
"Üç ildir Ermənistan Azərbaycanla sülh sazişi imzalamaqdan yayınır"
Məsələ ilə bağlı "Bakı-Xəbər"ə açıqlama verən AMİP funksioneri Əli Orucov hesab edir ki, bütün bunlar tipik erməni hiləgərliyindən irəli gələn siyasi oyunlardır: "Erməni lobbisinin aparıcı media resurslarına çıxış və təsir imkanları, əfsuslar olsun ki, bir sıra hallarda beynəlxalq ictimai rəyi çaşdırır. Təəssüflər olsun ki, aparıcı media platformalarında ermənilərlə bağlı reportajlar, məlumatlar Azərbaycanla müqayisəolunmaz dərəcədə üstünlük təşkil edir. Əksər hallarda balans pozulur və qarşı tərəfin mövqeyinə yer verilmir. Hesab edirəm ki, bu səbəbdən bəzən Ermənistan özünü sülhpərvər tərəf kimi dünyaya sırıya bilir. Erməni rəsmilər məhz bu amildən maksimum istifadə edərək özləri barəsində sülhpərvər imic formalaşdırmağa xüsusi can atırlar. Guya ki, onlar kompromisə meylli tərəfdilər. Əslində isə bunun reallıqla heç bir əlaqəsi yoxdur. Ermənistan sülhpərvər tərəf olsaydı, indiyə qədər sülh sazişi imzalanardı. Üç ildir Ermənistan Azərbaycanla sülh sazişi imzalamaqdan yayınır. Hər dəfə bir bəhanə uyduraraq məsələni başqa istiqamətə yönəldir. Bu həmin Ermənistandır ki, 30 ilə yaxın ATƏT-in Minsk Qrupunun vasitəçiliyi ilə aparılan danışıqları öz işğalçı niyyətlərini pərdələməyə yönəltdi. İndi də özləri barəsində saxta sülhpərvər tərəf imici formalaşdırmağa çalışırlar".
Vidadi ORDAHALLI
