Bəhruz Quliyev: "ABŞ-ın antiazərbaycan siyasəti açıq-aşkar şəkildə özünü göstərir"
Ermənipərəst mövqeyindən bir addım da olsun geri çəkilməyən, illərdir antiazərbaycan ritorikasından əl çəkməyən Amerika Birləşmiş Ştatlarının (ABŞ) mediası yenə də köhnə bayatı çağırmaqdadır.
Gerçəyi görməyə adət etməyən ABŞ mətbuatı, bir qayda olaraq, Ermənistanın siyasətinə dəstək verir.
ABŞ-ın "Vaşinqton Post" nəşrində növbəti dəfə Azərbaycana qarşı sərt və əsassız ittihamlarla dolu məqalə dərc edilib. İddia edilib ki, guya Azərbaycanda söz azadlığı yoxdur, korrupsiya halları geniş vüsət alıb, ölkədə siyasi motivli həbslər baş verib və sair. Heç şübhəsiz, "Vaşinqton Post" və ABŞ-ın başqa media orqanlarında Azərbaycana atılan iftiralar təsadüfi xarakter daşımır.
Hesab etmək olarmı ki, "Vaşinqton Post"un və Amerikanın digər KİV-inin Azərbaycana qarşı bu iftraçı addımlarının, ölkəmizin qaralanması kimi halların arxasında ABŞ-ın dövlət siyasəti dayanır? Bu nə dərəcədə inandırıcıdır?
Ekspertlərin fikrincə, ABŞ mediasının apardığı antiazərbaycan kampaniyasının arxasında birbaşa ABŞ-ın dövlət siyasəti dayanır, "Vaşinqton Post" da, başqa media qurumları da sifarişi birbaşa ABŞ dövlətindən alırlar. Ekspertlər qeyd edir ki, ABŞ dövləti də Azərbaycana münasibətini məhz erməni lobbisinin təsiri altında müəyyən edir və buna görə də Azərbaycanı qaralayırlar. İddia edirlər ki, guya Azərbaycan Ermənistana hücuma keçəcək, guya erməniərin hüququları pozulur, guya Azərbaycanın daxilində dözülməz vəziyyət var.
"Hesab edirəm ki, "Vaşinqton Post" nəşri başdan-başa iftiradan ibarət məqaləni ABŞ dövlətinin sifarişini ilə nəşr edib"
Məsələyə münasibət bildirən SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev "Bakı-Xəbər"ə şərhində bildirdi ki, ABŞ mətbuatı bu cür iftiaralar atmaqla sifarişi ABŞ dövlətindən alıdığını və erməni lobbisinin maraqlarına xidmət etdiyini təsdiqləyir. "ABŞ-ın "Vaşinqton Post" nəşri ABŞ hakimiyyətinə yaxın olan bir qəzetdir. Bu baxımdan hesab edirəm ki, "Vaşinqton Post" nəşri başdan-başa iftiradan ibarət məqaləni ABŞ dövlətinin sifarişi ilə nəşr edib. Qeyd edim ki, sözügedən nəşr ən çox Demokratlar Partiyası tərəfindən çıxış edir. Uzun illərdir ki, "Vaşinqton Post" ( "The Washington Post") qəzeti Respublikaçılara qarşı fəaliyyətini tərəf kimi açıq-aydın göstərib. Eləcə də bu gün Amerikanın antiazərbaycan siyasəti açıq-aşkar şəkildə özünü büruzə verir.
Sirr deyil ki, ABŞ ermənipərəst mövqeli dövlətdir, bu dövlətin rəsmilərinin, konqresmenlərinin əksəriyyəti erməni lobbisi ilə işbirliyi içindədir, ABŞ-ın üzərində erməni lobbisinin təsiri çox böyükdür. ABŞ mediasına erməni lobbisinin təsiri də böyükdür və onlar da mütəmadi olaraq bu ölkənin mətbuatına antiazərbayacan yazıları yazmağı sifariş edirlər. Bir sözlə, "Vaşinqton Post" və başqa nəşrlər Azərbaycanı sifarişlə qaralayırlar"-deyə B.Quliyev qeyd etdi.
O bildirdi ki, ABŞ ermənilərin Qarabağdan könüllü köç etməsinə başqa cür don geydirib ondan Azərbaycana qarşı təzyiq vasitəsi kimi istifadə etməyə çalışsa da bu alınmadı, indi də ənənəvi üsullara əl atıb söz azadlığı, insan haqları kimi cəfəngiyatlarla antiazərbaycan mövqeyini ifadə etmək istəyir. Ermənipərəst ABŞ-ın Azərbaycana düşmən kəsilməsinin səbəbinə izah verən B. Quliyev "Əvvəlcə gəlin görək, ABŞ-ın Azərbaycana qarşı olan münasibətinin kökündə nələr dayanır. ABŞ regiona heç vaxt Azərbaycan vasitəsilə daxil ola bilməyib. Sözsüz ki, hər bir super dövlətin regionda vassalı və yaxud da forpostu olmalıdır ki, regiona asanlıqla daxil ola bilsin. Amma biz bu gün görürük ki, Amerika başqa dövlətlərin dəstəyi ilə hansısa formada Qafqaza daxil olmağa çalışsa da heç bir zaman Azərbaycana təsir edə bilməyib"-deyə qeyd etdi.
Bəhruz Quliyevin sözlərinə görə, ABŞ ATƏT-in Minsk Qrupunun üzvü kimi 30 il ərzində Ermənistanla Azərbaycan arasında olan danışıqlar prosesini dondurmaqla məşğul oldu və buna birbaşa vasitəçilik etdi: "Rəsmi Vaşinqtonun bu istiqamətdə mövqeyi artıq bizə bəllidir. Amerikanın bu gün "The Washington Post" qəzeti ilə Azərbaycanı tənqid etməsinin başqa səbəbləri də var. ABŞ-ın hüquq və demokratiya institutları bütün dövrlərdə Azərbaycanın əleyhinə kampaniyalar aparıblar. Hətta rəsmi Bakı Amerikanın agentura şəbəkəsini dəfələrlə ifşa edib və onların maraqlarının əleyhinə mövqe sərgiləyib".
Qurum rəhbəri əlavə etdi ki, ABŞ-Azərbaycan münasibətlərindəki soyuqluq Prezident İlham Əliyevlə Dövlət katibi Entoni Blinken arasında telefon danışığı zamanı da hiss edilib: "Dövlət başçısı 2023-cü il noyabrın 15-də ABŞ Dövlət katibinin köməkçisi Ceyms O’Braynın Nümayəndələr Palatasının Xarici İşlər Komitəsinin Avropa üzrə alt komitəsinin dinləmələrində ölkəmizlə bağlı səsləndirdiyi fikirlərin qərəzli olduğunu, həqiqəti əks etdirmədiyini və Azərbaycan tərəfindən rədd edildiyini bildirib. Rəsmi Bakının ABŞ-ın Azərbaycana münasibətdə yüksək səviyyəli ikitərəfli görüş və təmasları təxirə salması və "ikitərəfli münasibətlərimizdə "əvvəlki kimi" ola bilməz" bəyanatını nəzərə aldığı, bunu adekvat cavablandırdığı vurğulanıb.
Blinken Prezident İlham Əliyevlə telefon söhbəti zamanı münasibətlərin normallaşdırılması məqsədilə dekabrda ABŞ Dövlət katibinin köməkçisi Ceyms O`Braynın Azərbaycana səfərinə icazə verilməsini xahiş edib. Prezident İlham Əliyev həmin təkliflə bir şərtlə razılaşıb ki, bu səfərdən sonra Azərbaycanın yüksək səviyyəli rəsmilərinin ABŞ-a səfərlərinə qoyulan əsassız qadağa aradan qaldırılsın. Beləliklə, Vaşinqtonda elə hesab edirdilər ki, Azərbaycanla istədikləri dildə danışa biləcəklər. Amma alınmadı".
İradə SARIYEVA
