Ramil Məmmədli: "Rusiyanın daxilindəki Qərb dairələrinin gücü o səviyyədə deyil ki, Putinsiz Rusiyaya keçidi təmin etsin"
Ukrayna Prezident Ofisi rəhbərinin müşaviri Mixail Podolyak deyib ki, ölkədə hazırkı hakimiyyətin yeritdiyi siyasətlə bağlı qıcıqlanma artır.
Onun sözlərinə görə, ukraynalıların narazılığı Ukrayna Silahlı Qüvvələrinin cəbhə xəttindəki uğursuzluqları, eləcə də dövlət məmurları arasında artan korrupsiya ilə bağlıdır.
Son vaxtlar Ukrayna hakimiyyətinin digər təmsilçiləri ilə də Zelenskinin münasibətlərində narazılıqlar nəzərə çarpır. Hətta ordu komandanlığı ilə olan narazılıq açıq müstəviyə keçib. Qərbdən də Ukraynaya yönəlik soyiq bəyanatlar nəzərə çarpır. Avropa rəsmiləri deyib ki, ən pis ssenarilərə belə hazır olunmalıdır. Artıq Qərb Ukraynaya ürəklə dəstək vermir. Rusiyanın özündə də müharibə ilə bağlı aqtessiya zəif hiss edilir. Üzümüzə gələn ildə Rusiya həm də prezident seçkilərinə gedir. Ola bilərmi, Qərblə Rusiyanın hansısa siyasi dairələrinin arasında bir bazarlıq prosesi getsin ki, Zelenski də, Putin də hakimiyyətdən uzaqlaşdırılsın və hər iki ölkənin başına yeni qüvvələrin gəlməsi təmin edilsin, onların əli ilə də sülh danışıqlarına start verilsin?
Hərbi-siyasi ekspert Ramil Məmmədli "Bakı-Xəbər"ə açıqlamasında bildirdi ki,
bir sıra ölkədə, həmçinin Qərbdə Rusiya-Ukrayna müharibəsindən yorğunluq artmağa başlayıb: "Bir sıra Qərb ölkəsi Ukraynaya dəstəyi azaltmaq barədə düşünür. ABŞ Konqresi belə, büdcədə Ukraynaya yardımı nəzərdə tutmayıb. Polşa Ukrayna məhsullarının Avropa bazarına çıxarılmasının əleyhinədir, Macarıstan Avropa İttifaqının Ukraynaya dəstəyinin azaldılmasına çalışır. Bildirilir ki, Avropa və Vaşinqtonda Ukraynanın Rusiya ilə danışıqlara məcbur edilməsi ilə bağlı açıqlanmayan planlar hazırlanır.
Avropanın əsas məqsədi Prezident Vladimir Putinin rəhbərlik etdiyi Rusiya rejimi ilə danışıqlar üçün Ukraynanın strateji mövqeyini müəyyənləşdirməkdir. Məqsəd Ukraynanın suverenliyi və ərazi bütövlüyü ilə bağlı müzakirələrdə iştirak etməsidir. Artıq anti-Rusiya koalisiyası işğal edilmiş ərazilərin gələcək statusu ilə bağlı danışıqlar aparmaq üçün birbaşa Ukrayna prezidenti Vladimir Zelenskiyə müraciət etməməyi üstün tutur. Bunun əvəzinə Almaniya və ABŞ, Ukraynaya əsas silah tədarükçüləri olaraq, Qərb ölkələri arasında özünəməxsus mövqeyindən istifadə edərək silah tədarükünün keyfiyyətini və miqdarını məhdudlaşdıraraq Kiyevi danışıqlara məcbur etməyə çalışırlar. Təbii, Qərb istəyər hər iki ölkənin başına yeni adamlar gəlsin ki, sülhün əldə edilməsi asanlaşsın. Hesab edirəm ki, növbəti il Zelenski Ukraynaya rəhbərliklə vidalaşmalı olacaq. Ancaq mövcud şərtlər daxilində Putinlə vidalaşmaq asan olmayacaq. Onun reytinqi çox yüksəkdir. Rusiyanın daxilindəki Qərb dairələrinin gücü o səviyyədə deyil ki, Putinsiz Rusiyaya keçidi təmin etsin".
Məhəmmədəli QƏRİBLİ
