Avropa İttifaqının nümayəndəsi ATƏT-in Nazirlər Şurasında etdiyi çıxışda "Qarabağ ermənilərinin hüquq və təhlükəsizliyi, o cümlədən qayıdış hüququ" məsələsini qabardıb.
Məsələ ilə bağlı Qərbi Azərbaycan İcmasının yaydığı bəyanatda qeyd olunub: "Avropa İttifaqının Azərbaycanın daxili işlərinə qarışması, məsələlərə etnik və dini zəmində yanaşması, Ermənistandan deportasiya edilmiş azərbaycanlıların qayıdışı hüququna toxunmaması tamamilə qəbuledilməzdir.
Bu kimi qərəzli açıqlamalar Avropa İttifaqının Azərbaycan-Ermənistan münasibətlərinin normallaşdırılması prosesində dürüst vasitəçi kimi çıxış edə bilməyəcəyini göstərir".
Avropa İttifaqının nümayəndəsi ATƏT-in son iclasında Qarabağdan könüllü gedən ermənilərin "məsələsini" qaldırıb, amma nədənsə, Qərbi azərbaycanlıların Ermənistana qayıdış məsələsini qaldırmağı unudub, bu məsələyə heç toxunmayıb. Halbuki, bu məsələdən beynəlxalq təşkilatların hamısının xəbəri var. Amma Qərbi azərbaycanlıların problemini dilə gətirməyib.
Avropa İttifaqının nümayəndəsi niyə Qərbi azərbaycanlıların geri qayıtmaq məsələsi barədə danışılmağı unudub? Niyə bu əsas məsələ barədə danışılmayıb?
"Bu yanaşma onun antiazərbaycan mövqeyinin təzahürüdür, belə olmasaydı, Qərbi azərbaycanlıların da geri qayıdış hüququndan danışardı..."
Odlar Yurdu Universitetiin müəllimi, iqtisadi-siyasi sahə üzrə ekspert Elbrus Novruzov baki-xeber.com-a şərhində bildirdi ki, burada təəccüblü heç yoxdur, çünki bu təşkilat ermənipərəstliyi ilə seçilir və uzun illərdir davam edən xristian həmrəyliyi burada özünü göstərir. E.Novruzovun sözlərinə görə, erməni yalanına dəstək verən xristian birliyi bizim əleyhimizə işləyir. "Gizlin deyil ki, onlar bizə indi də səlibçi təfəkkürü ilə yanaşırlar. Ermənistanın arxasında dayanan ermənipərəst Qərbin Azərbaycana qarşı ayrıseçiklik etməsi yeni hal deyil. Bu yanaşma onun antiazərbaycan mövqeyinin təzahürüdür, belə olmasaydı, Qərbi azərbaycanlıların da geri qayıdış hüququndan danışardı...
İndi Ermənistan adlandırılan tarixi Qərbi Azərbaycan torpaqlarından vaxtilə azərbaycanlıları çıxarmaq, deportasiya etmək, o torpaqları türksüzləşdirmək planının arxasında dayanan Qərb dünyası hazırda da o siyasəti davam etdirir.
Sual edirsiz ki, nə üçün Avropa İttifaqının nümayəndəsi məlum yığıncaqda Qərbi azərbayacnlıların yenidən Ermənistan ərazisinə qayıtması məsələsini dilə gətirməyib, bu məsələyə toxunmayıb, yalnız hay tayfasının "deportasiyasından" danışıb və onların yenidən Azərbaycan torpaqlarına qayıtmaq məsələsini qoyub. Avropa İttifaqının erməniyönlü nümayəndəsinin öz məruzəsində Qərbi azərbaycanlıların geri qayıtmaq hüququndan bəhs etməməsində təəccüblü heç nə yoxdur, bizim üçün gözlənilməz də deyildi. Çünki yüz ildir ki, haylar Avropanın əlində türklərə qarşı təzyiq alətidir, Qərb dünyası bir silah kimi daim hay kartından istifadə edir. Avropa İttifaqı Azərbaycan-Ermənistan məsələsində həmişə ayrıseçkiliyə yol verir. Bütün dünya bilir ki, ermənilər Qarabağdan deportasiya edilməyiblər, könüllü köçüb gediblər, amma azərbaycanlılar indiki Ermənistan ərazisindən zorla qovulublar"-deyə E.Novruzov bildirdi.
Ekspertin sözlərinə görə, bu bölgədə türklərin bir-birindən ayrı salınması, onların ayrı etnos kimi qələmə verilməsi üçün hayları gətirib iki türk dövlətinin arasına xəncər formasında sancıblar. E.Novruzov bildirdi ki, türk dünyasının güclənməsi Qərbin xoşuna gəlmir və dünya nizamında öz hökmranlıqlarını həyata keçirmək üçün addımlar atılır. E.Novruzov qeyd etdi ki, ABŞ başda olmaqla, Qərb dünyası hər zaman antiazərbaycan mövqeyi tutub. O əlavə etdi ki, ABŞ-ın 907-ci Düzəlişlə bağlı qərarı buna nümunələrdən biridir.
Azərbaycan dövlətinin gücü sayəsində ərazi bütövlüyümüzün bərpa edildiyinə diqqət çəkən müsahibimiz qeyd etdi ki, indi Avropa İttifaqı və Qərb dövlətlərinin məqsədi yenidən torpaqlarımızda hay toxumu əkmək, daim bölgəni gərginlikdə saxlamaq və təzyiq vasitəsilə bizi və türk dünyasını öz istəklərinə razı salmaqdır. O vurğuladı ki, yenə də ikili standartlar və qərəz davam edir. "Əlbəttə, ona görə də Qərbi azərbaycanlıların yenidən öz doğma torpaqlarına qayıtmaq haqqının üstündən sükütla keçirlər. Avropa İttifaqına, ermənipərəst Qərbə sərf etmir ki, ermənilərin Qarabağa qayıtması məsələsi ilə Qərbi azərbaycanlıların yenidən öz yurdlarına qayıtması məsələsi paralel səsləndirilsin. Türk birliyi Avropanı daim narahat edir".
"Onların hansı mövqe tutmasından asılı olmayaraq, Azərbaycan yürütdüyü düzgün və ağıllı siyasətlə balansı saxlayır" - deyən müsahibimiz qeyd etdi ki, bu balanslaşdırılmış siyasət Azərbaycanın öz ərazisində tam olaraq suverenliyini bərpa etməsinə gətirib çıxardı.
E.Novruzov əlavə etdi ki, Avropa İttifaqının nümayəndəsinin davranışı gözələnilməz deyildi. Qərbin bu məsələni görməzdən gəlməsinin, bu məsələyə toxunmamasının Qərbi azərbaycanlıların geri qayıtmaq arzusuna və haqqına heç bir əngəl ola bilməyəcəyini deyən E.Novruzov "Qərbi azərbaycanlıların öz doğma yurdlarına qayıtması zamanın özünün hökmüdür. Biz vaxtilə Qarabağın və Şərqi Zəngəzurun azadlığını "qaranlıq bir gələcək" kimi gördüyümüz halda, görün tarix bizim üçün necə sürprizər ortaya qoydu, Qarabağ da, Şərqi Zəngəzur da azad edildi. Bu gün Qərbi azərbaycanlıların öz dədə-baba yurdlarına qayıdışı zaman məsələsidir. İnanıram ki, Zəngəzur dəhlizi də açılacaq, Qərbi azərbaycanlıların öz tarixi torpaqlarında məskunlaşması da baş tutacaq. Bu proses baş tutacaq. XXI əsr türk əsridir. Bunların hamısını nəzərə alaraq Avropa Türk birliyinin yaranmasından, inkişaf etməsindən və güclənməsindən, dünyada söz sahibi olmasından əndişələnərək bu addımları atır. Ona görə də bizim məsələmizi gündəmə gətirmirlər, dağılan yurd yerlərimizə səfər etmirlər, missiya göndərmirlər..."-deyə E.Novruzov əlavə etdi.
İradə SARIYEVA
