Avropanın bütün təşkilatları Ermənistana doluşub - Rusiya "yatıb"...
Mehman İsmayılov: "Avropa İttifaqının ən müxtəlif strukturlarının nümayəndələrinin Ermənistana ardıcıl səfərlər etməsi təsadüfi deyil"
Ermənistanda antirusiya siyasəti günü-gündən daha tünd rəng almağa başlayıb. Sözsüz ki, bunun səbəbi Ermənistanın Avropa ölkələri ilə həddən artıq yaxınlaşmasıdır.
Son zamanlar Avropa ölkələri təşkilatlarının, xüsusən də Avropa İttifaqı qurumlarının Ermənistanla əməkdaşlığı dərinləşdirməsi diqqətdən qaçmır. Eyni zamanda Avropa qurumları Ermənistanı su yoluna çevirib, biri gedir, o biri gəlir.
27-29 noyabr tarixlərində Avropa İttifaqının (Aİ) Xarici Fəaliyyət Xidmətinin nümayəndə heyəti və Avropa Komissiyasının nümayəndələri Ermənistana gəliblər. Nümayəndə heyətinin tərkibində Avropa Yenidənqurma və İnkişaf Bankının (AYİB), Avropa İnvestisiya Bankının (AİB) və Avropa İttifaqının xarici sərhəd təhlükəsizliyi agentliyi olan "Frontex"in nümayəndəsi də təmsil olunub.
Görüş iştirakçıları əməkdaşlığın daha da gücləndirilməsi və islahatların həyata keçirilməsi yollarını, o cümlədən enerji, nəqliyyat, rəqəmsal texnologiyalar, tədqiqatlar və investisiyalar vasitəsilə innovasiya sahələrində müzakirə ediblər. Aİ və Ermənistan ədliyyə və polis islahatları sahəsində əməkdaşlığın davam etdirilməsində, miqrasiya məsələləri üzrə əməkdaşlığın gücləndirilməsində və Ermənistanla viza rejiminin liberallaşdırılması üzrə dialoqun başlanması imkanlarının araşdırılmasında maraqlı olduqlarını bildiriblər. Bu barədə Aİ nümayəndə heyəti açıqlama verib.
Gördüyünüz kimi, Avropanın neçə qurumu - maliyyə, hərbi, siyasi xarakterli qurumlar Ermənistana gəliblər. Nə baş verir?
"Baş verən odur ki, bu səfərlər, bu dəstəklər, səsləndirilən bəyanatlar Ermənistandan antirusiya, antiiran müstəvsində platforma yaratmaq üçündür"
Politoloq Mehman İsmayılov "Bakı-Xəbər"ə şərhində bildirdi ki, Avropa İttifaqının ən müxtəlif strukturlarının Ermənistana ardıcılı səfərlər etməsi, Avropa məmurlarının Ermənistana dəstək məqsədilə səsləndirdikləri bütün bəyanatlar, həyata keçirilən siyasi texnologiyalar Ermənistandan antirusiya, antiiran müstəvsində platforma yaratmaq üçündür: "Avropa İttifaqının ən müxtəlif strukturlarının nümayəndələrinin Ermənistana ardıcılı səfərlər etməsi təsadüfi deyil. Baş verən odur ki, bu səfərlər, bu dəstəklər, səsləndirilən bəyanatlar Ermənistandan antirusiya, antiiran müstəvsində platforma yaratmaq üçündür. Avropa İttifaqının Ermənistanın iqtisadiyyatına verəcəyi dəstək, təbii ki, Ermənistanın əli ilə Rusiyanın Güney Qafqazdan sıxışdırılıb çıxarılmasına xidmət edir. Ermənistanın təbii resursları yoxdur, intellektual potensialı da Avropanı cəlb edəcək dərəcədə deyil. Ermənistanın sərhədlərinin möhkəmləndirilməsi, Ermənistana investisiyaların qoyulması, hərbi potensialının gücləndirilməsi, bütün bu məsələlər onu Rusiyaya qarşı qızışdırılmağa sövq edən Avropayönlü təşviqat və təbliğatdır. Bu, Ermənistanın gələcəyinə hesablanmış addımlar deyil. Onun gedə biləcəyi ən doğru və ən qısa yol Azərbaycanla və Türkiyə ilə münasibətləri normallaşdırmaq, sülh müqavləsi imzalamaq, ərazi iddialarından əl çəkməkdir. Ermənistanın gedə biləcəyi başqa bütün yollar yanlış yollardır. Qərb Azərbaycana Avropa İttifaqının, Avropa parlamentarilərinin əli ilə də təzyiq düzənləyir ki, ölkəmizə edilən təzyiq erməni cəmiyyəti tərəfindən ermənilərə edilən bir dividend kimi qəbul edilsin. Digər tərəfdən, bunlar Azərbaycanı da antiiran, antirusya müstəvisində hərəkət etməyə məcbur etmək istəyirlər. Təbii ki, Azərbaycanın özünün müstəqil siyasəti var və xarici qüvvələrin diqtəsi ilə siyasət yürüdən ölkə deyil".
"Birləşmiş Şatatlar, Avropa İttifaqı istəyirlər ki, Azərbaycan da Güney Qafqazda Ermənistanın oynadığı destruktiv oyunu oynasın" - deyən M.İsmayıov qeyd etdi ki, o səbəbdən də Azərbaycana ermənilərin əli ilə təzyiq edirlər. "Azərbaycana qarşı aparılan qara təbliğat kampaniyası ermənilərə verilən "mükafat" kimi dəyərləndirilir. Nə qədər Azərbaycana qarşı təzyiq həyata keçirilirsə, ermənilər bir o qədər həvəslə Qərbin yaxasından asılırlar və antirusiya-antiiran müstəvisində hərəkət edirlər. Bu addımlar hamısı perspektivsizdir, onlar Güney Qafqaza sülh gətirmək üçün deyil. Kollektiv Qərbin ayrı-ayrı üzvlərini nə Güney Qafqazda, nə də dünyanın başqa yerlərində sülh prosesləri maraqlandırmır".
Azərbaycanın Qərbə çox gərəkli ölkə olduğunu vurğulayan M.İsmayılov əlavə etdi ki, Azərbaycana təzyiq edib onu Qərbin çətirtinin altına girməyə sövq etmək istəyirlər. Azərbaycanı da Ukraynalaşdırmaq, Suriyalaşdırmaq istəyirlər deyən M.İsmayılovun fikrincə, Qərbin hansısa demokratik proseslərə dəstək vermək istəyi var idisə, Gürcüstan ərazisinin 20 faizin işğalda qalmasına dözməməli, Ukraynanın Krım yarımadasının işğalına yol verməməli idi. "Bütün bunlar oyunlardır, özü də Ermənistanın lehinə olmayan oyunlardı. Avropa İttifaqının müvafiq strukturtlarının Ermənistanda tapa biləcəyi hər hansı iqtisadi-siyasi, geosiyasi bir dividend yoxdur. Nə Avropa İttiifaqı Ermənistanı dəstəkləməklə, qızışdırmaqla pozitiv nəticə əldə edə biləcək, nə də ermənilər bu dəstəkdən özləri üçün tarixi mükafat qazanacaq. Bu yanlış yoldur"-deyə M.İsmaylov qeyd etdi.
İradə SARIYEVA
